جزء ٨ - الوعاء الوسيط

من بعيد وسط الضلمه بدأت اشوف بيوت , بعضها بيوت بسيطه والاخرى عليها بعض من التعديلات الراقيه  كا عاده اي بيت في كفر, حطام لكام بيت مهدوم ومتفرق في اماكن كتير ,  البيوت مقفوله كلها ومفيش حد بره , احنا بالليل برضو طبيعي يبق... سمعت صوت فجأه بس مش , مش عارف هو جاي منين ..
طبقه صوت مش ممكن اتخيلها بالشكل الصحيح بس قريبه لصوت النحيب مع حشرجه وممزوجه بصفير يصدع اي حد يقف قدامه .
مش قادر , مشششش مستحمل الصوت , من يميني وشمالي, قدامي  وو , تحتي , الاصوات كلها من تحت .
في ايد خرجت مسكتني وثبتتني مكاني ,   فجوه في الارض بحجم البلاعه مخدتش بالي منها .
دقات قلبي عليت , الايد دي سابتني وطلعت اجري باقصى سرعه , اتكعبلت في ايد تانيه ووقعت على الأرض .
عيني وقعت على بيت من البيوت المقفوله وشخص موارب باب بيته وعينيه بتلمع في الضلمه , ماسك مقبض الباب بأيده الي بترعش .
بعدها قفل الباب ودخل جوه , على الناحيه التانيه كنت انا بتسحل في الارض من ايد طالعه من فجوه تانيه وو .. حاولت افك نفسي والايد بطلت تسحبني,  لكنها اتجمدت مكانها بدون ما تفكني  .
ل. ر : فك نفسك
في ظل الي اتكلم جوايا كان في صوت تاني ظهر ... باب البيت اتفتح والراجل اياه خرج ببندقيه وهو بينادي وبيعلي صوته .
: كلللله يطلللع ببرررره , لو مش عايزين يموت عدد منكو اخرجو بزيت الحرمل وارموه على النذر , اررموووه على النذر .
كذا بيت من البيوت في الكفر خرجو في لهفه زي ما يكونو مستنيين الاشاره
.. على الناحيه التانيه لسه واقع في الارض وسامع صوت مميز وسط الصريخ الجماعي الي سامعه , و عرفت ايه الي كان بيشدني , لمحت واحد طلع ايديه الاتنين من بعيد وقام عشان يبان شكله الكامل , عنده رجل اطول من التانيه , مشيته مشيه متعرجه وغير متزنه .
ملامحه بتفكرني ب .... لا ده هو الي عزام خبطه , زياده عليه ملامحه الي وضحت او ملامحها ... وش مشوهه تماما عباره عن لحم متعفن مغطي وش وشعر طويل اسود شبه القش , جسم متهالك وهزلي .
صوتها المميز وسط الاصوات التانيه خليتهم يسكتو .
كانت بتقرب مني بهدوء , على الناحيه التانيه الشاب الي كان ماسك البندقيه بيقرب هو كمان,  وبياخد من بعض الرجاله الي خرجت من البيوت ازازه وفتحها .
قولتله : متقربش اكتر هيقتلوك , بدأت اضرب الرجل المتحجره دي لحد ما كسرتها وحاولت اقوم , خدت ضربه بضهر البندقيه وقعت تاني .
: متتحركش انت , انت مش من هنا , جيت ليه ؟ انا متأسفلك بس مفيش حل كده كده انت هتموت لو حاولت .
قولتله : انت , انت مش كنت هتلحقني , ولا انت كنت هتقدمني قربان ؟  هتضحي بيا ؟ ارجعو كلكو وسيبوني حتى ,  انا جاي اقابل ال..
: متتكلمش كتير ,  العرجاء هتقبلك وهناخد مهله 3 ايام لحد القربان الجاي .
معلش بقا , بس حياتك مش اغلى من حياتنا ومعاناه سنين .

فتح برطمان وكان هيقلبه عليا لقيت طلقه اخترقت دماغه من وسط الناس .
وقع على الارض واتقلب السائل ده على جسمه وحصل هرج ومرج في المكان كله ,  واتسحبت جثته بعيد من كذا ايد لحد ما وصلت للكائن الي فيهم كان واقف او زي ما قال عليها العرجاء .
مسكت راسه خلعتها من مكانه وكل ايد ظهرت من فجوات الأرض  دي خلعت كل حته منه وقطعته  لاشلاء في خلال ثواني .
انا شايف المنظر البشع ده ومجاش في بالي اقوم او اهرب .
شدني واحد من الرجاله الي كانت واقفه , سحبني بعيد عنهم .
في اللحظه دي زي ما يكون انتهو من مهمتهم ورجع الكائن ده مكان ما جه
..
الي خرجو من بيوتهم كانو اكتر من 10 و15 واحد اتكلم واحد منهم وقال :
الله يرحمه سعيد بقا هو نصيبه كده , حظك حلو يا اخينا انك عايش لحد دلوقتي , انت كنت في قبضتهم حقك علينا,  مكناش نعرف انه انت الي الشيخ الضو طلبك .

كان باين من وسطهم بيشيل سلاحه على ضهره بعد ما قتل قدامي بني ادم دلوقتي .
بيبصلي وضحك ضحكه خفيفه وقالي : حبيت اسبق الي معاك في انه يدافع عنك وانت في عهدتي دلوقتي يااا زياد , اتمنى تكون اللمحة الي انت شوفتها دي متخلكش مستغرب , انت اكيد سمعت عننا  ووصلتك رسالتي .
كانت عينه الشمال مقفوله نظرا لأنه اعور  وحاطت عمامه على دماغه ظاهر منها شعره الطويل  .

قولتله : اعذرني ، كنت متخيل حاجات كتير زي اني اخش الاقيك حاطت بخور قدامك في وضع مريب , مش بالهيئه دي .

الضو : الي سمعته عني مهما كانت الافواه تناقلتها بس مفيش حكابه بتتنقل كامله او بدون تحريف ، انا هاوي مش دجال ، شخص  بستخدم الي بيقراه  وقت ما يحس ان من واجبه يستخدمه  .
اتفضل خش بيتي المتواضع وهتفهم كل حاجه .

اتمشيت معاه واحنا متجهين لبيت الضو , مش عارف انا مأمنله ليه وانا عارف كويس ان كل الي بيحصل في الكفر بسببه ,  في كذا شخص تقريبا من رجالته ماشيين حولينا مش عشاني بس موجهين سلاحهم في كذا اتجاه مختلف .
سامع في الخلفيه صوت زعيق , وفي نفس الوقت نحيب .
وجه الضو اشارته للباقي انه يتجه ناحيه الصوت , من على بعد كام بيت قدامنا في تجمع بره بيت على شخص , بل شخصين .
شاب في مقتبل العمر مميل دماغه على جسم واحده واقعه عالارض , بنت شابه من الواضح اخته وبعد مواساه كام شخص من رجاله الكفر عرفت انها اخته .
سرحت وانا بقرب ولقيت نفسي في وشه .
قولتله : العرجاء قتلتها ؟ هما لحقو ؟
بصلي بصه فهمت منها ان انا متخلف او لسه مش عارف حاجه وشبه تجاهلني , بعدها بشويه قال : اكيد هيلحقو , مكانش ينفع نستنى للحظه دي , لو انتو شايفين ان الوقت كافي لايجاد حلول , لا , محدش هيستنى , ولا انا حتى , ودم نورهان وانتحارها ده السبب فيه كلكو , كل واحد منكو , اييوه .
انتو عارفين كويس الحل والي فتح اللعنه علينا قادر يقفلها .
بموته بقا , بأي حاجه , لكن موتنا كلنا ده معناه انه هيعيش بعدها ؟
سامعني يا ضو , ايوه انت مش هتعيش لو متنا كلنا .
رد الضو بغضب : لو انا مت يا بهاء , محدش فيكو هيخلصكو , زيكو زي المسجونين وانا والي هستعين بيه هيكون مفتاح خروجكو , وكل الي حاولت المه على مدار سنين كان يقلل من اعداد القرابين الي بتتقدم بدل ما تحصل مجازر تانيه انتو مش قدها .
اختك انتحرت يا بهاء وده مش معناه انها صح ,
في اعتقادها ان مفيش مخرج .
هنجرب وهيساعدنا الوعاء الجديد , احب اعرفكم  " زياد " ,
الوعاء المختار .

بهاء : ويا ترى قولتله ان كل الي حاولو قبليه فشلو وماتو بأبشع الطرق , وكل محاوله فاشله بتصعب من فرصه التعامل معاهم .
كلام بهاء كان موجه للضو لكن نظراته كانت ليا , وهنا بدأت ارد عليه .
زياد : كان كله بيموت  بحساباته الضعيفه لنسبه نجاته , نسبه ممكن تعرضك للموت فعلا لمجرد التفكير فيها وتابعاتها تردد من الوعاء .
يمكن انا كنت بغلط كده بس , حتى دي مش قادر احسها دلوقتي , مينفعش حد يخش طرف تالت وهو عنده اعتقاد انه ممكن ينجو او لا , بمعنى اصح موت المشاعر هو اكتر طريق هيساهم في نجاح الوعاء .
رد الضو : الكيان الداخلي اقوى بكتير لمجرد بيعك لمشاعرك, ولو محصلش على الجانب التاني اهل الارض بيسيطرو عليك لخضوعك ليهم  ,  انت عملت كده فعلا  واصبحت بدونها , يبقى انا واثق من اختياري .

قام بهاء من على الارض , وساب ايد اخته , وضوح علامات جرح عميق في الاورده , الجرح اثره مبين ان الدم كان خطوطه من جوه البيت وصولا للارض بره , هي كانت رايحه فين ؟
السؤال على الرغم من لمعانه في عقلي الا اني نطقته بالغلط.. .
بهاء : صحيت من النوم على صوت باب الشقه بيتفتح مفتاح , انا قافله كويس من جوه , نبهت عليها متخرجش , لما قومت مفزوع على باب الشقه كانت خرجت , لاحظت اني شوفتها .
قالتلي : بهاء انا سيبتلك 3 ايام  , مفيش اضحيه هتتقدم خلالها , في مقابلها حياتي كلها هتروح , بس انت عارف الي فيها , امك واخواتك مش سايبني كل ليله , سامحني يا بهاء .
لما قربت ليها حاولت تبعد اكتر ووقعت عالارض .
انا اخر واحد في العيله , حتى لو نجيت زي ما بتقولو , هعيش ميت  يا احصلهم بقا ههه , انت , ايوه زياد , انا صدقتك لما قولت ان مشاعرك ماتت , مفيش حد طبيعي هيخش هنا برجله , لأن الوعاء عادتا بيبقى من جوا الكفر .
شاورلي الضو اننا نتحرك  , واتحرك جزء من الرجاله عشان يشيلو جثه نورهان اخته .
نظراته مكانتش بتفارقها , احساس يمكن كنت اعرفه الاول , بس , بس دلوقتي مش فاهمه , هو ده الحب ؟
مش بيترجم بين واحد وعشيقته لا خالص , ممكن يكون صديق , اخ , اخت , ام , اب ,  اهتمامك بيه والتضحيه من اجله حتى في اسوء الخلافات , شخص مش بتتعافى بوفاته بسهوله .
وده لا ينطبق عليا , انا مش فاهمه على المستوى الاحساسي لكني على قدر من العلم بيه فكريا .

قربنا من بيت مختلف كليا عن باقي الي شوفته , مكانش بيت كنت تقدر تقول عليه دوار كبير زي دوار العمده بس شكله يوحي بالفخامه اكتر .
فعلا واحد زي الضو في ثروته من الي بيتاجر فيه اقل ثروه تعمل اكتر من كده .
دخلت معاه من الباب وظهرت الملامح الغريبه من الداخل , متتناسبش مع
شكلها من بره , اثاث غريب والوان حيطه سودا , صور ولوح كتيره في كل مكان .

الضو : اه , كنت بفكر اني اعمل غرفه مخصصه للالواح الاثريه عندي , بس اكتشفت اني مينفعش اجمعهم مع بعض , كل لوحه بتحكي قصه منفرده تستحق مكانتها المبعثره  , ودور الي بيتجول وسطهم يجمع القصه كامله .
قولتله : انت عندك كام قصه جوه ؟
وهل ده ليه علاقه بالشئ الي انا جاي عشانه ؟
الضو : للغرض الي انا جايبك عشانه , وهي مهمه جدا بالنسبالي في نفس الوقت هي عامل مشترك مع الي هيساعدنا نخلص من فتح بوابه الجحيم على اهل الارض .
هاخدك في رحله صغيره في متحفي  , اتفضل معايا .
اتحركت من مكاني متجه معاه للقاعه الرئيسيه , الطراز العتيق الدهبي محيط بالقاعه كلها تتوسطهم لوحه كبيره 
" Saturn Devouring His Son" , والي بتظهر
كائن ضخم من العمالقه بيلتهم جثه انسان بوحشيه .



الضو : اللوحه دي اترسمت من الفنان فرانسيسكو غويا , بتظهر الاله
ساترن عند الرومان او كرونوس في الميثلوجيا اليونانيه ,  والي كان من العمالقه الموعودين بنبوئه هددت عرشه وقالت ان هيجي من نسله طفل يقتله وياخد مكانه,  وخوف ساترن من تحقق النبوئه كان بينهش وياكل اي طفل يتم ولادته من نسله , وقع ساترن في طغيانه كا  فرعون لما فكر يقتل كل الاطفال في البلاد  قبل تحقيق نبوئه اطاحته ,  ونجى طفل من طغيانه واطاح بيه في الاخر , وبلع كرونوس الطعم الي اكتشف لاحقا انه مكانش طفل , والطفل الحقيقي هرب ونشأ كا زيوس المعروف في الميثلوجيا وقتل ابوه مثل النبوئه ..
محتاجك تفكر فيها وتربطها بالباقي , عامل مهم خلاني اكتشف ان ممكن الاسطوره كلها تكون بترمز للزمن , وكل ما نشأه الزمن بيلتهمه بعدها  زي  ما بيلتهم الي بعديه , وكرونوس هي المعنى الحرفي لكلمه الزمن .
قولتله : افتكرت , كانت من ضمن قراياتي  , بس مش هقدر احكم على الحكايه من دلوقتي يا شيخ الكفر .
انا مبقتش فاهم حاجه وتوهت اكتر .

الضو : كمل وامشي لحد الاخر وهتفهم .

كملت معاه في صدمه وذهول من الي شايفه وبسمعه .
دخلنا غرفه مقابله للقاعه وبالمناسبه القاعه كان متدلي منها نجفه سقف عملاقه شكلها بيوحي باغصان الشجر بس سوداء اللون ,  منبعث منها خيوط موزعه بشكل عشوائي  حاملين اجسام دمى خشبيه وبعض الاجزاء والاعضاء المتناثره , كل خيط منهم مربوط  ايد ورجل وراس مصنوعين باتقان .
الغرفه نفسها والي قريبه من النجفه فيها شباك بيطل على جزء من ارض الكفر فاضيه بجانب الشباك  مكتب مرصوص,  تشكيله ضخمه من الكتب والي اغلبها كتب سحر .. مجموعه مؤلفات احمد ابن علي البوني يترأسهم شمس المعارف .. بجانبه كتب تانيه زي العزيف والكابالا في السحر وبعض من كتب السحر النجميه والفلكيه كا ال picatrix  .
تشكيلات نادرا واثريه , حتى انا مقدرتش اتحصل على اكتريتهم .
لفت نظري قسم اخر من المكتب والي بيضم السحر الغربي من ضمنهم التنين الاحمر الي كان معايا والي بنسخته الاخرى في مكتبه
" الانجيل الشيطاني "

وهنا اقدر اقول انه استعان بي لوسيفج روفوسيل عن طريق الكتاب واستخدمه عليا ..
مقابل للمكتب متعلق لوحه بيظهر فيها بعض الجنود الموتى والمدنيين والاغنياء المتكتل جثثهم فوق بعضيهم في ارض صحراويه , مشهد بيجسد الموت في هياكل عظميه بتجتاح المدينه وتقتل كل ما فيها سواء جثث متقطعه .. واشلاء من بقايا مصير محتوم على جميع  الفئات الطبقيه في اللوحه  ..