جزء ١٨ - لسان الغسق

كل الي وعيت عليه كان اني مرمي قدام كشك وحد بيفوقني , الي بيفوقني كان عم ربيع .. 
عم ربيع : فوق يبني , انت جاي تموت عندي , وبعدين الغيبوبه الي بتجيلك كل شويه دي من ايه .. 
فوقت وعدلت نفسي وقومت  . 
زياد : عم ربيع انا كل مره اروحلك فيها تحصل مصيبه , وكمان انا جيتلك ووقعت هنا ازاي , انا كنت اخر حاجه في الحف... معقوله يكون ميفيستوفيليس الي خرجني ! 
عم ربيع : والله يبني انت جايلي فايق  كنت غريب حبتين ومكلمتنيش وقومت طبيت ساكت قدامي , وحفره ايه الي نزلتها  , اوعى يكون نزلت من غير الجلسه الي هتعملوها دي  ، وبعدين ايه الخدوش الي في رجلك دي ؟   انت بتنزف .. 


رديت عليه وقولتله :  كل حاجه حصلت غصب عني , ووقعت تحت في حضنهم ، لحسن حظي نجيت ،  بس انا جايلك عشان افهم منك اكتر يا عم ربيع .. 
عم ربيع : انت قابلتهم ؟ قابلت النسانسه ؟   
زياد :الي قابلته معتقدش انه منهم  , كده انا متأكد اني جيت للشخص الصح , عرفني هما مين , كان اهل القريه بيحذرو منهم  .. 
عم ربيع :  النسانسه دول فصيله من اهل الارض  نص بشر , انصاف  برجل واحده وأيد حتى رئوسهم  مشطوره نصين  , الكيانات دي مكانتش بتظهر عادتا في سطح الأرض غير من زمان طويل جدا كان بيتقال ان العرب زمان بيشوفو النسانسه في الصحرا , بيقال عنهم انهم الى حد ما مسالمين رغم قله ظهورهم , بس في اخر كام سنه ظهرت حقيقتهم , اختراق عالمهم وعدم احترامهم ادى لهياجهم وتمردهم عالبشر , زي ما قولتلك , هما انصاف بشر بس سرعتهم عاليه وبيفتكو بأي حد يمسكوه بسهوله , اديك شوفت الي بيحصل في الكفر , الحاجه الوحيده الي قدرنا نعملها معاهم وتقبلوها هو نظام تقديم القرابين  , كان تعويض عن  الاختراق الي حصل في عالمهم  بس ده هيطول لأمتى ! 
رديت قولتله : انا شوفت وسمعت عن كذا فصيله , منهم الكيان الطويل الي شبه المارد , اتحكالي انه جسمه وكأنه مصنوع من اغصان الشجر .. 
الناس الي بتموت بوحشيه في الأرض بيرجعولها تاني وتبقى نقطه تحولهم لمسوخ ، امثال العرجه  وغيرهم ..  بس , ده كله بدأ ازاي يعم ربيع ؟ 
عم ربيع  : الاه , ما انت شاطر اهو , لحقت تعرف كل ده , قصرت عليا شويه في المسافه .. 
بص يا سيدي , مش هكدب عليك , انا عايش هنا سنين طويله , اتولدت وعيشت واتجوزت وخلفت وسط اهل الكفر , زي ما انت شايف قدامك عجوز كهول كاسر ال 85 سنه , كنت اتمنى افقد الذاكره مكانك  واعيش زي ناس كتيره في سني انسى الي عيشته , الي بشوفه بيكبر قدامي سواء اشخاص هما دلوقتي مصيرهم حكم عليهم بالموت او لعنه شوفتها بتبدأ قدامي ومقدرتش امنح حدوثها  . 
زي ما يكون عقلي بيعاقبني باستذكار كل حدث مر في حياتي .. الأرض دي موبوئه من زمان بالشواهد الغريبه والاصوات من صريخ ونحيب ونصوص بتتقال بلغه قديمه .. بس تظل كلها اصوات , تظل شواهد , والناس كانت عايشه ومتقبله  الرعب الي تملكهم في الاول , ومنقدرش نلومهم , تحديدا انا .. اصل الأرض بتاعتهم , احنا واجدادنا  الي جينا ووضعنا ايدينا عليها , بس مين يفهم انها ارضهم , بل بندنسها وبندنس موتاها بالبيوت الجديده الي بتتبني .. 


قولتله : صح , انا عارف بأن زمان كانت مستوطنه في الاساس من الاشوريين , الي اتدفن منهم اتحوط على جثثهم واثارهم بسحر باطني  فا اه نقدر نقول ان الحراس الي عليها دي ارضهم  , طب نيجي للسؤال الأسهل اني اسئله والاصعب في تنفيذ مضمونه ،  لأن بعد كل السنين الي انت عيشتها مفكرتش ولا انت يا عم ربيع ولا غيرك بالعمل بيه .. 


انتو ليه متمشوش من الكفر ؟ بالأخص لما بدأت المجزره .. 


قعد عم ربيع على الكرسي الخشب بتاعه وهو مبتسم وبيشاورلي اقعد في اشاره فهمتها ان الموضوع اكبر من مجرد اجابه .. 


عم ربيع : انا ممكن اقولك ان الناس ترعرعت وعاشت حياتها كلها في ارض معتزين انهم منها ومحدش يقدر يسيب ارضه  ويموت فيها احسن ما يروح لغيرها , بس هكون صريح معاك واقولك , الطمع .. 
زي ما انت شايف جزء كبير من اهالي الكفر مادياتهم ممشياهم بالعافيه وشغلهم المحلي المعتمد على تجارتهم وصناعتهم , بس ده ميمنعش ان البعض منهم بيخرج بره لبعض فرص العمل او يجيبو بضايع للكفر .. فا لو اتعرض عليهم يعيشو طول حياتهم هنا مش هيقبلو في الاصل , الا لو .. 
لو ظهرتلهم  فرصه دهبيه تعوضهم على كل المأسي الي عاشوها .. 


شيخ الكفر , الضو  وترويجه لفكره الكنز الي انت عارفها , المخطوطه القديمه الي لقاها وبتتكلم عن كنز الاشور المدفون تحت الكفر والاماكن المخصصه للدخول .. 
الضو كان بيبيع لأهالي الكفر الطمع , اتزرع في دماغهم وعطاهم امل في تحملهم للظواهر والاصوات  الي حوليهم بالليل  وكل عيله في الكفر هتاخد نصيبها من الثروه وتمشي بعدها تعيش في ارض تحتويهم .. الاكثر علما  هو الضو .. 
اصغر مني سنا  , على قد علمه الاكثر مني الا اني شوفت اكتر منه ,  الضو  ثروته جزء كبير منها من تجاره الاثار , هو الي قدر ياخد الفكره ويطلعها للنور تاني  .. 
المجزره الي حصلت بعد اقتحامه  لعرينهم السفلي خسرت فيها مراتي وولادي .. 
كيانات من مختلف الاشكال بتهجم وتدبح في الناس بدون رحمه ,اشلاء واجزاء  جثث بتنزل عالأرض ده لو استهلكو حظهم في الحياه وطلع منهم  كاملين ،  بتبقى جثه كامله مشوهه .. 
ورغم كل الناس الي اتضررت بالاضاحي الي اتاخدت , لسه عندهم امل ان الثروه دي تكون من نصيبهم  , ومن غيرها هيعيشو بره الكفر طول حياتهم يدوبك الي رايح قد الي داخل .. 
انا خلاص فضى بيا ومبقتش خايف منه ولا من غيره في الكفر , ولا انا هبقى محتاج اخرج من الكفر وكل حاجه اتسلبت مني .. 


زياد :  كان صعب جدا الي انت مريت بيه من خساره طول السنين الي فاتت وانا مقدر الوضع  , بس يا عم ربيع انت قولتلي  ان الضو هو الي معاه المخطوطه القديمه ,  في الحقيقه ابنه عباس هو الي اكتشفها , ابنه هو اس الخراب  وابوه استغل الفرصه في الكام سنه الي فاتو , وبعدين قصدك ايه  انه طلعها للنور تاني ؟ 


رد عم ربيع وقال : مكانش عباس ابن الضو هو اول واحد يعرف عن الكنز والمخطوطه . 
زياد : انت متأكد من الي بتقوله يا عم ربيع ؟ 
عم ربيع : من حوالي 70 سنه او اكتر , كنت لسه مراهق صغير , الكفر كان اهدى بكتير ومحدش بيتأذي , بس بيشوفو وبيسمعو كتير , واهل الكفر مش زي ما انت شايفهم يعتبر قليلين وأتباد جزء كبير منهم , في الاول كانو عدد , وبدو الصحاري الي انتقلو واقامو خيم من قبل ما يبنو بيوتهم الجديده .. والطبيعي كنا بالليل بنسمع اصوات صريخ , نوع من الصرخات مش قادر اوصفها اكتر من انه طبقه صوت رفيعه تقشعر وصعب حد يتحملها  , ونرجع نتخبى في المخيمات لأن الفراغ الي في الكفر بيصور للناس او هما بيشوفو كيانات بتتحرك تحديدا ناس ماسكين سيوف ورماح بيسرحو بيها حولين الكفر , بس مكانش دايما بيحصل كده لكن ناس كتير شافت , ويرجعو تاني مكانهم من حيث ما جم ..  واوقات يشوفو حاجه تانيه غير الجنود , النسانسه الي كلمتك عنهم .. انصاف البشر وهما بيتحركو بالليل والبدو الي بيقسمو انهم بيشوفو النسانسه بيتسلقو النخل وياكلو منها .. 
بس رغم الرصد لكل التحركات مفيش نوع من الاذيه الجسديه الي قابلناها .. 
في نفس التوقيت بالظبط بالليل كان بيظهر شخص تاني والعرب البدو بحكم حراساتهم وانتشارهم في الوقت ده شافوه , كان بني ادم من البدو بس مش تابع ولا مقيم في الكفر , ظهوره كان دايما بالليل وبيقرب من الكفر يكلم في الحرس او الاهالي ويحذرهم من كوارث مستقبليه  وينصحهم يسمعو كلامه ..  بس مين هيصدق راجل عجوز بيلف بالليل زي المجاذيب وسط الكفر .. 
كل ليله بيظهر فيها صوت عكازه بيحسو بالشؤم ومحاوله اجتنابه و ضد سماعهم لخرافاته .. 
بس الغرابه انه بعدها كان اي حاجه يقولها كانت بتطلع صح , سواء حد قتل في الكفر او سرقه كان بيرجع بالليل ينادي بأسم السارق ويشهد عليه وعلى الموقف وبيعترف الشخص بعدها ويدين نفسه لدرجه ان الناس شكت ان الراجل ده يا بيهدد الناس يا اما ساحر او مخاوي .. 
الى أن بدأت تتكون روابط ما بينه وبين اهل الكفر , الأسم الشائع عنه كان 
" لسان الغسق "  لقب مش اهل الكفر الي منحوه ليه بس ده الي كان بيقوله على نفسه .. 
قولتله : ذكرت انه بيظهر في الليل بس , يعني ولا حد شافه قبل كده بالنهار ؟ الشكوك بدأت تلعب في دماغي .. 
بصلي عم ربيع بأستغراب وقالي : زي ما قولتلك .. 


وخصوصا الليله  الي جه فيها يحوم حولين اهل الكفر ،  هرتل بكلام كان منه : العهد هيتخالف والميثاق غير محفوظ  , المصير مطموس , الفرخه السودا هتدبح في الوقت الموعود , والأرض , الأرض تحتكو فيها خير من كل الثروات والكنوز .. 
اتحرك لسان الغسق في جزء من الكفر وهو بيشاور عالاماكن المؤكد وجود الكنز فيها .. 
الي كانو واقفين كلهم مستغربين من رده فعله خصوصا كان بنسبه كبير لسان الغسق بيتثبت صحه كلامه .. 
وانقسم اهل الكفر من وقتها لجانبين , جانب بيؤيد الحفر والتنقيب عن الكنز , وجزء تاني بينكر كلام راجل خرفان هدفه تشتيت الناس .. 
بس الي حسم الأمر كان شيخ الكفر وقتها وقال ان محدش يفتح موضوع الكنز تاني ولا هنحفر ولا نهبب وياريت منسمعش كلام اي جائل حتى ولو صدق بأي حيله عنده .. 
وفعلا ده الي حصل , بس تردد لسان الغسق على الكفر موقفش لحد هنا , وظهر تاني والمره دي الحرس شافوه مع ابن شيخ الكفر بيلعب معاه وبيديله ورق وكتيبات صغيره وعلى قد ما كان طفل صغير بس كان بيتعلم بسرعه وبيعرف يقرأ ,  ومن بعد ما عرف شيخ الكفر مسكه وضربه وقتها ومنعه انه يقابل الراجل ده تاني , على الناحيه التانيه كانت الناس بتمنع دخول  لسان الغسق وانه لو قرب من اي حد تاني هيبقى قصادها حياته .. من وقتها مظهرش تاني , تقريبا . 
وبقول تقريبا لأن ابن شيخ الكفر كان بيختفي من وقت للتاني وبيرجع وهو معاه كتيبات صغيره ومندمج في قرايتها بشغف , هنا عزم شيخ الكفر انه يعزله في البيت لأنه شك في خروجه ومقابلته للسان الغسق من وراه , و الكتيبات كلها الي كانت معاه  بتتكلم عن علوم غريبه مش مفهومه وقرر شيخ الكفر يحرقها  لحمايه ابنه   , الطفل ده كان , الضو  .. 
النسل اتلعن بدايه من الضو . 


خلص عم ربيع كلامه .. 
زياد : هههه , ااه , من الواضح انه .. انه  قابلكو قبل ما يقابلني  .. 
لسان الغسق او .. بلاش , خلينا نتفق انه لعب بينا كلنا .. 


بصلي عم ربيع بنظرات تعجب وكأنه مش متوقع مني رده الفعل دي .. 
دخل جوه الكشك وطلع ورقه من جوه وعطهالي .. 


ربيع : ايا كان الي في دماغك ,او لو قابلته زي ما انا فهمت  تقدر تقولي  ايه ده ؟ 
الورقه الي قدامك دي كل الي عرفت اجيبه  , كانت من ضمن الاوراق الي  بيسيبها لسان الغسق للضو ,  الورقه متحرقتش لأنها فضلت طول السنين دي معايا وسط المقتنيات , كانت هوايتي التجميع والورقه بمعانيها الغير مفهومه كانت فرصه لشئ غريب اضمه لمقتنياتي  .. 


الصوره كانت عباره عن تنين احمر بنجمتين موضوعين على كل جناح من اجنحته و شايل رمز لفرخه سوده .. 






قولتله : تنين بيرمز للقوه والهيمنه التعاقديه , المقايضه بشئ غير قابل للتعويض , القوه الي بتحارب النور بفكره بتتولد تقوم مقامها , فكره بتتولد بالليل , وسمى نفسه لسان الغسق عشان ده انسب جزء من شخصيته ووقت ظهوره , الليل الي بيتكلم في وقته .. الفرخه السودا رمز القربان ,  الواجب تقديمه لغرض الوصول لكنز او ثروه باطنيه  وتكوين رابطه الدم بين الانسان والشيطان , يمكن ناسي كتير بس , بس فاكر معاني الرموز الي قريتها في كتابه .. 


عم ربيع : انا طول السنين الي فاتت مدرك انه مستحيل يبقى انسان وانما شيطان , اللهم ابعد عنا الشياطين يبني ووسوستهم , بس قولي صحيح انت ايه الي خلاك تشوفه او تقابله , ايه علاقتك بيه ؟ 


زياد : علاقتي بيه ؟  ههه , مش هقدر اقولك كل حاجه للأسف , بس يكفي تعرف انه خرب حياتي زي ما أسسكو عليه  .. 
ميفيستوفيليس : كان الأولى تقوله على المغزى والهدف من علاقتك بيه مش النتيجه .. 


زياد : الخراب الي كان اساس فيه مش مجرد طرف , بيوهمك انك شخصيه في السيناريو الي هو عمله , سيناريو بيبقى كاتب نهايته مسبقا  .. بس الفرق اني مش حاسس بدور البطوله .. 


قرب عم ربيع مني وميل على ودني وقالي : في راجل من رجاله الضو كان بيدور عليك , وتقريبا هو الي جايلك دلوقتي .. 


عدلت نفسي بعدها عشان الاقي الشخص ده بيقرب مني وبدأ الكلام بقوله .. 
: استاذ زياد , شيخ الكفر بلغني اني اجي اقولك ان المعاد قرب , وتحديدا بكره , الوصله هتتم والجلسه دي هتحدد اذا كنا هنكمل تاني ولا هتنتهي بالقبول .. 


قولتله : بكره , تمام , بلغه اني جاهز .. 


مشى حارس الضو بينما حسيت بنوع من اني قربت اوصل , مش لمساعده الغلابه دول لأ .. 
بس عايز اوصل للحقيقه , عايز اعرف عن العالم السفلي اكتر من الي موصلتلهوش قبل كده .. 
في نفس الوقت الضو مش هياخد الي في دماغه او عبال ما يوصله هيكون بلا قيمه ..