ابرز معجزات الانبياء

دخلت يسر وسلسبيل المطبخ وألقتا السلام على أمهاتهما:

يسر وسلسبيل: السلام عليكم ورحمة الله وبركاته.

الأمهات: وعليكم السلام ورحمة الله وبركاته.

يسر وسلسبيل: حابين نساعدكم في إيه النهاردة؟

عائشة والدة سلسبيل: هقولكم تساعدونا في إيه… تنزلوا النهاردة تلقوا الدرس في الجامع للأطفال، وإحنا هنخلص الأكل، وربنا يجزيكم خير.

البنات بابتسامة مشرقة: من عنينا يا ست الكل، الدرس النهاردة عن إيه؟

خديجة والدة يسر: عن أبرز معجزات الأنبياء.

في الجامع 🌿

سلسبيل ويسر: السلام عليكم ورحمة الله وبركاته يا أحباب الله.

الأطفال: وعليكم السلام ورحمة الله وبركاته يا ميس.

سلسبيل: النهاردة بإذن الله هناخد درس جميل جدًا عن معجزات الأنبياء. بس الأول… مين يقولنا يعني إيه معجزة؟

(رفع أحد الأطفال يده)

المعجزة هي أمر خارق للعادة، ربنا بيؤيد بيه النبي علشان الناس تصدقه وتؤمن برسالته.

🌿 أبرز معجزات الأنبياء

محمدﷺ أكبر معجزة ليه هي القرآن الكريم، كتاب ربنا اللي لحد دلوقتي محدش قدر يجيب زيه. ومن معجزاته كمان إن القمر انشق نصين بإذن الله.

موسى عليه السلام ربنا خلا عصاه تتحول لثعبان كبير قدام الناس. ولما ضرب البحر بعصاه، البحر اتشق وبقى طريقين، وعدّى هو وقومه بأمان.

عيسى عليه السلام كان بإذن الله يشفي المولود أعمى، ويشفي الأبرص، وكان يحيي الموتى بإذن الله.

ابراهيم عليه السلام قومه رموه في نار عظيمة، لكن ربنا أمر النار تكون بردًا وسلامًا عليه، فلم تؤذه.

نوح عليه السلام ربنا أمره يبني سفينة كبيرة، ولما جاء الطوفان، نجا هو واللي آمنوا معاه.

صالح عليه السلام قومه طلبوا معجزة، فأخرج الله لهم ناقة عظيمة من صخرة.

يونس عليه السلام ابتلعه الحوت في البحر، لكنه دعا الله فأنجاه وخرج سليمًا.

سليمان عليه السلام علمه الله فهم كلام الطيور، وسخر له الريح تجري بأمره.

داود عليه السلام جعل الله الحديد لينًا في يده، وكانت الجبال والطيور تسبح معه.

زكريا عليه السلام كان كبيرًا في السن وزوجته لا تنجب، فرزقه الله بيحيى كآية ورحمة منه.

يسر: شفتوا يا حبايبنا؟ كل معجزة كانت دليل إن ربنا مع أنبيائه.

سلسبيل: وأهم درس نتعلمه إن ربنا قادر على كل شيء، ولو وثقنا فيه، هيكون معانا دايمًا.

ونلتقي إن شاء الله في درسٍ جديد بإذن الله.
#منه_عبداللّٰه
#رمضان_مبارك
#عائلة_الحسيني