عقود روفوسيل - جزء ١٣ - ضحيه العاشق
جاري التحميل...
جزء ١٣ - ضحيه العاشق
لاحظت الشنطه الي جايبها معاه وشبه الشنطه الجلد الي مع اي حد تحسه موظف حكومي في نفسه بس باختلاف الجلد كان شكله مميز وعليه نقش كده رمز غريب , مجموعه خطوط جمب بعض في دايره حاجه انا مش فاهماها .
انا كا زياد كنت مركز في كلام اثيل بس عيني في حته تانيه , على الخدوش وعلامات الاحمرار على ايديها , على الرغم من ان هي بتحكي حلم وكان من سنين فاتت , هل ده معناه انه لسه بيتكرر ؟ او بيأثر عليها ماديا . مقاطعتهاش وسيبتها تكمل . تابعت اثيل وقالت : انا قومت , قومت بأعجوبه عشان اخش الحمام ليلتها . وبطني قلبت ونزلت من بقي كل الي في معدتي , من ضمن الحاجات الي نزلت من بقي كان كتل سودا ودم زي الي شريف اخويا حكالك عنها .. وقتها مكنتش اعرف غير لما روحت صحيت امي وانا متبهدله .. قامت مخضوضه وقالتلي : الي حصلك ده سمعنا عنه من ناس تانيه , ولازم نعالجك . شددت عليا جدا اني مهملش يوميها ولازم يجيبولي طبيب من الكفر , مكانوش عايزين يخوفوني ويقولولي اني ممكن اموت زي الي حصل لكام واحد فاتو بس , امي بقا اصرت على انها تجيب الي اسمه عباس الضو ده . ولما قولت مش لازم وممكن نحلها بطريقه تانيه اعترفت وقتها وقالت : لو معملناش كده في احتمال تموتي من المرض ده .. ردت امها عليها في نص كلامها وقالتلها : والله ما كنت اعرف يا بنتي سامحيني , كل الي فكرت فيه الحقك حتى لو هجيب حد زي عباس الي يعالجك , على اياميها فعلا كان كله بيشكر فيه .. اتكلم شريف وقالها : بعد اذنك يا امي خلي اثيل تكمل .. كملت البنت وقالت : ظروفنا مكانتش تسعف اننا نجيب طبيب او نروح لحد بره القريه , والنقطه الي كانت في صالحنا لما امي استعانت بعباس الضو هو عدم طلبه لأي مقابل مادي ووافق يجي يزورنا . واستجاب للطلب بعدها بيوم كنت وقتها بحلم بنفس الحلم واصحى بنفس الطريقه , لدرجه ان الليله قبل الزياره صحيت من النوم لقيت ضوافري كلها بيسيل منها الدم من تحت الجلد , ومغرق السرير كله .. مكنتش عارفه هو انا اتمسيت كده ولا مجرد التحذيرات الي الكائن ده حاول يوصلها لينا . اليوم الي بعديه جه عباس الضو , شوفته وهو داخل من باب الشقه لابس روب اسود غريب , طالع منه ريحه قويه جدا فهمت انها ريحه كبريت زي ما يكون جاب كبريت وكحته في هدومه .. انا وقتها كنت في الاوضه والباب موارب والاوضه مقابله لباب الشقه فا انا لمحت كل ده من هناك ولما قرب الريحه زادت . اهلي وقتها لاحظو بس اتكسفو يتكلمو , في نفس الوقت كانو اهلي معاه يوجهوه لأوضتي لكنه بيبص للحمام الي على شماله , وفجأه اتكلم وقال : عباس : اييه ؟ عمركو ما شوفتوه قبل كده ؟ قال كده بالظبط وقفل باب الحمام من تلقاء نفسه ودخل اوضتي بعديها . لاحظت الشنطه الي جايبها معاه وشبه الشنطه الجلد الي مع اي حد تحسه موظف حكومي في نفسه بس باختلاف الجلد كان شكله مميز وعليه نقش كده رمز غريب , مجموعه خطوط جمب بعض في دايره حاجه انا مش فاهماها . فتحها وطلع منها ازازه كده فيها سائل اخضر . اتكلم وقالي : في الاول كده محتاجين نعزز نطاق الاستجابه عشان نبقى في حضرته , وده هيتم بالدهان الي هتعمليه من الازازه دي على جسمك. انا كنت مستغربه , ابويا كان فاتح بقه ومصدوم .. قاله : انت يبني بتتكلم عن ايه ؟ حضرت مين ده وماله ببنتي ؟ رد وقاله : بنتك عليها كيان سفلي من رصد اهل الارض , والرصد ده اتعرضتله لما داست عليه وهي ماشيه , او بمعنى اصح هي دخلت دايرتهم المغلقه وهما كانو في حضره . الي رد وقتها اخويا شريف وقاله : بس انا اختي مخرجتش من البيت بقالها كتير .. الي بتقوله ده يا دكتور مش مظبوط او اكيد اسئت الفهم انت لسه حتى معملتش حاجه . عباس : انا عارف انا بقول ايه كويس , هي خرجت فعلا , بس مش معنى اني قولت خرجت يبقى بمزاجها .. احتمال كبير جدا تكون خرجت بطريقه هي نفسها مش عارفاها .. اخويا قالي وقتها , شريف : اثيل انتي خرجتي من ورانا الأيام الي فاتت ؟ قولي الصراحه , عشان نقدر نعالج المشكله دي . افتكرت ساعتها الحلم وقولتله : ايوه صح , بس انا مخرجتش , انا حلمت حلم غريب اني مدفونه وحكيت للدكتور ده الحلم بكامل تفاصيله .. لقيته قعد وقتها وبان على وشه انه فهم الموقف وقال عباس : زي ما قولتلك , هما خرجوكي والاختيار وقع عليكي وعلى غيرك , وهو مش حلم بالمناسبه .. حتى ارفعي كمك وبصي على دراعك .. انا اتصدمت لأني رفعت كم ايدي وبانت الخدوش والاحمرار مكان ما كنت بقاوم في الارض .. وده الي انت شايفه بالمناسبه يا استاذ زياد وكانت بتتجدد كمان . اهلي مصدقوش الي شافوه , بيضربو كف على كف . رد عباس وقتها : لأجل نبدأ الحضره لازم بعد ازنكو تستنونا بره , مينفعش نبقى كلنا في نفس الجلسه .. اتعصب شريف وقال : نطلع بره ازاي مينفعش , لازم نشوف كل حاجه بتحصل في الجلسه .. قاله : هتطلع بره ولا تحب تشوفهم معانا ؟ انا عارفه ان لولا الاحتياج الشديد للشخص ده كنا مشيناه وجبنا غيره بس قالو يعدو اليوم ده على خير ويأسرو الشر وطلعو بره فعلا والباب اتقفل .. وجهت كلامي ليه في خوف وقولتله : هو احنا هنشوفهم ازاي ومين دول , اوعى تقولي نفس الي شوفتهم في القبر . عباس : لا متخافيش , انتي مش هتشوفي كويس او مش هيبقى قدامك الرؤيه واضحه , ومحدش هيأذيكي في الحضره دي وانا موجود , اهم حاجه تدهني من الازازه دي على اطراف جسمك ورقبتك .. منظر الازازه الي ادهاني كان بشع وريحتها شبه ريحته بالظبط , هو ايه ده بالظبط ؟ ده الي سألتهوله . رد وقال : ده النطرون الاحمر , نادر جدا ومش اي شخص هيحوز ماده بالشكل ده زي ما قولتلك هتعزز استجابتهم لينا , وهتستخدمي كميه صغيره جدا عشان متأذيكيش .. انا بطبيعتي مش شجاعه اوي فا كنت خايفه استخدم الي بيقول عليه النطرون الاحمر ده بس بعد شويه اقتنعت وبدأت ادهن منه .. حسيت بنوع من الحرق وكأن نار مسكت في جسمي .. لازلت بمسك نفسي ومصرخش , من جوايا بقاوم الألم . على الناحيه التانيه بيخرج عباس من شنطته حاجه زي المناديل المبلوله بس لونها كان اسود .. قام ووزعها في اركان الاوضه في كل ركن منديل ورجع قعد على الكرسي .. انا كنت قاعده على السرير فا قالي : افردي جسمك على السرير .. في الاول سألته ليه اصر اني اعمل كده وفعلا , عملت كده .. كنت مستنيه اعرف اخرتها ايه .. اتكلم وقال : كان لازم الطقوس تتنفذ بالشكل ده , اثيل , مهما حصل متتكلميش خلال الحضره .. رديت وقولتله : حاضر , الأهم متحصلش ليا امراض من الي سمعتها او اموت زي الي فاتو .. عباس : مفيش حد عالجته مات , اظن واضح من الي سمعتوه عني . العلاج ليه لغه قبل خطوه التنفيذ نفسها تحدد ايه طرق التنفيذ المطلوبه ومش كله فاهمها , بس تلتزمي بشروطها .. قولتلك متتكلميش وانت في الحضره لازم تلتزمي بيها تاني حاجه متتحركيش من مكانك ولا تخلي خوفك يسيطر عليكي فا تتحركي .. خلص عباس كلامه وقفل عينه واخويا شريف قالك ان في وشم عند عينيه الاتنين وفعلا كان في وشوم لرمز في جفن عينيه بانت اول ما قفل عينيه الاتنين , اقسملك ان مع قفل عينيه والوشوم الي على جفنه زي ما تكون بتبص عليا وبتابعني مع حركه وشي , وهي بالمناسبه نفس الرمز المحفور على شنطته .. خوفت واترعبت , احنا لسه مبدأناش حتى بس سمعت صوته بيتكلم مع حد جمبه وبيوشوشه , صوت تمتمات من الي السحره بيقولوها دي , بعدها اسمعه يرد على الي جمبه ويقوله انا كلفتك بيها .. انا كنت مفكر في الاول انه بيكلم الكائن الي كان عليا وبيعذبني ده بس فهمت انه مكانش ده المقصود خصوصا بعد ما قال انه كلفه بيا .. يمر الوقت واحس بجسم سخن وبيطلع حراره معدي من جمبي , جسم طويل جدا .. مكانش واضح بلنسبالي لأني كنت عامله زي المتخدره ومش شايفه قدامي كويس ... من غير ما اشوف , انا عارفه انه هو , الي سحلني في الحلم بقا ولا كان في الحقيقه معرفش .. رجع صوت التمتمات دي يشتغل تاني بس الصوت ده مكانش طالع من عباس الضو .. طلاسم بقا متفهمش الكلام الي واضح انه مش لغه عربيه ومعقده .. عباس ده عيونه وهي مقفوله حسيت ان الوشوم كانت بتتحرك تاني بل وبتتشكل وزي ما يكون جفنه بينتفخ بعدها رجع طبيعي واتكلم عباس الضو قاله : انت فين , يعني ايه مش دلوقتي ؟ رديت انا كا زياد وقولتلها : هو رصد عالمقابر الاشوريه , دي لغتهم , اللغه الاشوريه , التمتمات والطلاسم والكتابات الي على جدران المكان الي وقعتي فيه كتابات بالمسماريه الي بيستعينو بيها مع لغتهم .. هزت راسها بنوع من الاتفاق مع كلامي وكملت كلامها .. صوت الكائن الي كان جمبي والي نطق بالطلاسم دي بدأ يتغير للغه اكتر وحشيه بسبب رد عباس الضو بالرفض لطلبه .. بعدها لحق الموقف وقال : ودم الحارس وطغيانه ليحل عليك طغيان الساحر , وبحمايه سيدك مردوخ للأرض لتخضع لأمري , طلبك مرفوض ومش هتاخد اضحيه , انتو عارفين العقد الي ما بينا والجلسات هتتعمل في معادها وهتاخدو الي عايزينه , واحنا ناخد الي نطلبه من ارضكو , بس اطلبو حاجه غير الاضحيه .. صرخ الكائن ده في وشي وهو بيتمتم بكلام مش مفهوم وانا صرخت غصب عني مستحملتش الجو الي انا فيه وحاولت اقوم وانا مش شايفه قدامي ووقعت من على السرير .. قال : ليه , ليييه , قولتلك متتحركيش . دخل ابويا وامي وقتها وشريف وهما بيزعقو جامد في وش عباس . شريف قاله : يا جدع انت بتعمل ايه في اختي , لو الطقوس هيبقى فيها تعذيب كده يبقى سيبها . رد عباس وقاله : اختك محافظتش ولا نفذت القاعده الي انا قولتها وبناء على كده متوقعش ايه الي ممكن يحصل , كان هيرضى يتفاوض لولا انك قطعتي الوصله فجأه .. قولتله : وصله ؟ وصله ايه انا كنت ممكن اموت ولا يجرالي حاجه , ده , ده كان بيصرخ فيا . رد عباس : هو ده الطبيعي وكان لازم اهديه , عموما ممكن نعمل جلسه تانيه .. ابويا قاله : ولا تانيه ولا تالته , اتفضل لو سمحت لو حصل جديد هنبلغك . قام خد شنطته وقبل ما يمشي حذرني , قالي : افتكري اني قولتلك لسه في جلسه تانيه .. من بعد اليوم ده حياتي اتقلبت وبدل ما كنت بحلم بقيت بشوف قدامي .. زياد : ممكن توضحي اكتر , بقيتي بتشوفي الكيان ده هنا ؟ ولا بره . اثيل : لا هنا , في اوضه نومي , بالليل وانا نايمه بسمع صوت تكسير او تقطقه زي الغصن وهو بيتكسر بس , ده كان هو بيتحرك في اوضتي .. دايما احس بيه في اوضتي لما كنت اطلع اقعد في اي حته تانيه مش بشوفه لكن لما برجع اوضتي بيظهر , جربت اني اقعد بره في الصاله يومين تلاته , مظهرليش . بس بعد ما طولت شويه بقيت المحه واحس بتحركاته جمبي .. حياتيي رعب في رعب عن ما كان الأول .. بقيت انزل من بوقي نفس التكتلات دي وبان عليا التعب , اهلي من الخوف قررو انهم يعتذرو لعباس الضو ويكلموه تاني يرجع يعمل جلسه جديده .. خافو جدا لأموت خصوصا مريت بنفس الاعراض ويكاد يكون خلاص بيراهنو على احتماليه موتي في اي لحظه .. قبل الطلب وقتها عباس ورجع تاني والمره دي رجع كان شكله باين على وشه التجاعيد بعد ما كان شعره بس الي ابيض , بقا مختلف وشاحب اكتر .. دخل البيت وشافني وانا متبهدله وشبه مباكلش وبقيت نحيله نوعا ما حسيته ابتسم , معرفش دي شماته ولا كان قصده حاجه تانيه .. بس من ساعه ما شوفته وانا مش مرتاحه له .. حكيتله على كل الي حصلي من ساعه ما مشي وانه ملازمني , واحساسي بوجوده جمبي .. رد عباس وقالي : من الواضح ان الجلسه الاولانيه مفشلتش , بس هو اخد مقابل تاني بدل ما يموتك .. بمعنى انه هيفضل ملازمك ومش هيسيبك لكن هيحميكي .. امي وقتها صوتت وقالت : يعني ايه ؟ بنتي لبسها جن عاشق ؟ طب وهتخرجه ازاي ؟ رده ساعتها مطمناش بل زود الوضع سوء .. عباس : ده عاشق , لكن مش جن , اسوء من كونه جن عاشق , كونه من اهل الأرض وعاشق لحد مش هيسيبه الا بموته , والاتفاق الي ما بينا كان اي حاجه غير الموت وده الي انتو عايزينه ان بنتكو تبقى سليمه .. والتكلفه كانت عشقه لأثيل بنتكو ومتحاولوش تقفو قدامه , لأنه لو غضب عليها بدل ما يحميها الاذى هيطولها ويطولكو معاها .. محدش كان فاهم من اهلي ولا مدركين خطوره الموقف .. في نفس الوقت انا كنت سرحانه , مش مستوعبه , بسمع همسات في ودني .. ابتسم عباس تاني ومشي , ولا فادني بحاجه , بلعكس , انا لو مت ارحم من اني افضل طول حياتي متعذبه بين كل لحظه والتانيه احس بأني مش لوحدي .. : طب وبعدين يا بنتي , نجيب حد تاني يعالجك , مش هنسيبك كده .. الي قال كده كانت امي , قولتلها : انا خايفه لو ده حصل اتئذي اكتر , انتو مش شايفين اي خطوه بنسعى ليها بنتضر اكتر فيها .. شبه حاولت اتعايش رغم المضايقات , وطبعا انت عارف اني كده صعب اتجوز , خصوصا الي كانو بيتقدمولي بيمشو بمجرد ما يقابلوني يا اما لو استمرو عالوضع ده وعزمو انهم يقربو من خطوه الخطوبه بيمرضو بنفس المرض وبسمع خبر موتهم بعد ايام من التحضير للخطوبه , عدى سنه , كنت بتعود . والاقي تطورات جديده بتحصل , بقيت احس بدوخه مستمره , وبعد ما احس بوجوده في الاوضه بيتحرك اصحى من النوم جسمي كله واجعني .. وكل ده تمهيد لمصيبه كبيره اكتشفتها بعدين وهي بطني الي كبرت مع الوقت وكنت فاكراه انتفاخ وبكدب نفسي , بس انتفاخ ايه , انا كنت حامل .......... حسيت وقتها ان انا , خلاص بقيت مجرد جسد بلا روح , مش فاهمه ده حصل ازاي ولا ..... شوفت دموع اثيل وهي بتنزل وقربت تنهار , قولتلها : ممكن نوقف لحد هنا لو مش قادره انتي تتكلمي , انا عارف الموضوع صعب قد ايه ولا انا قادر احلل كل الي قولتيه ورا بعض , محتاج وقت عشان استوعب امها كانت متلصمه بالعافيه ومش بتتكلم وسكتت , على الناحيه التانيه نطق شريف وقال : الموضوع موقفش لحد هنا , مش متخيل حاجه زي كده لما تتعرف بين اهل الكفر هيبقى الكلام ايه , انا ولا اهلي كلهم كان هيهمهم كلام الناس اكتر من صحتها بس الاتنين مع بعض طعن الناس في شرف اختي وغير كده اليوم الي اكتشفنا فيه حاجه زي كده كانت واحنا داخلين اوضتها بعد مده مطلعلهاش صوت , خوفنا جدا ودخلت انا اول واحد لقيتها مغمى عليها وواضح عليها جدا حجم بطنها وبشكل اسرع من الطبيعي , اه , لأن الي حصل ده استحاله يكون طبيعي انا عارف اختي كويس , ابويا الله يرحمه مكنش مستوعب الموقف وكان هيبدأ ياخد رد فعل سلبي بس خدناه على جمب وحاولنا نربط الخيوط ببعض رغم ان انا نفسي مش مقتنع بكده , وهو ازاي كيان زي ده يكون عاشق وتوصل المرحله لكده ..الي أكدلي لما فاقت , قربنا منها وحاولنا نسندها ونقومها وامي ماسكه بطنها مش مش مصدقه الي شايفاه .. لما فاقت كانت بتزعق وتشتم فينا كلنا وبتقول ابعدو عني , صوتها كان متغير , ابعدو عنيييي , متقربوش من ابني.. والا هقتلكو كلكو .. من الهوجه الي عملتها قامت ومسكت في رقبه امي , انا مدرك انها مش حاسه بنفسها بس كان لازم اتدخل .. كانت ماسكه في رقبتها وبتقول : لو فكرتو تسقطوها يبقى طلبتو الهلاك على ايدي , مراتي , وهتفضل مراتي حتى بعد ولاده ابني .. قومت ولحقت امي وقتها وفكيت ايديها منها , كانت هديت شويه وفاقت اثيل من السيطره من الكيان الي عليها .. طبعا مش فاكره اي حاجه من الي حصل .. بس من يوميها الى حد ما كانت طبيعيه ,ومكناش طبعا بنخرجها من البيت .. لحد اليوم الي البيت كله اتقلب بصراخها وعياطها , صوت تاني ممزوج مع صوت صراخها اعلى منها , نحيب , تألم بدرجه صوت غليظه .. لا , مش ممكن لا , مش الي في بالي .. للأسف , لما دخلت وفتحت باب اوضتها , كان , هو الي تخيلته .. سريرها كله عباره عن دم وهي في النص بتصرخ ووو , وو في طفل , مش طفل لأ .. اقل ما يقال عليه مسخ على السرير وسط الدم .. طفل بيصرخ وبيصدر منه نحيب من وش مشوه وغير مكتمل ورجليه رفيعه جدا وطويله , رجل اطول من التانيه , كان كتله لحم فاسد فيها الروح .. امي مستحملتش المنظر الي شافته ووقعت اغمى عليها , ابويا تمالك نفسه واخدها يفوقها بره وانا واقف لوحدي , بقرب بس مش قادر , حاسس اني لما بقرب في حاجه بتدفعني اكتر لبره .. فتحت اثيل عينها وقتها وهي بتستغيث بيا .. اتدفعت لبره , قوه دفع خلتني اترمي بره الاوضه والباب اتقفل عليها جوه .. انا طبعا معرفتش الي حصل غير بعدها بدقيقه ولا اتنين دخلت تاني الاوضه ملقتش الجنين المشوه , لقيت اثيل بس واقعه عالارض .. لما فاقت طبعا بعد العياط والحاله الهيستيريه الي جاتلها فهمت منها ان في ايد طويله ظهرت من تحتيها وشدت المسخ المشوه ده لجوه , تحت بقا عندهم , الله اعلم فين مش عايزين نعرف , كل الي كان هاممني اتطمن عليها وبس .. فين وفين بعدها بفتره لما اتحسنت شويه اثيل , قررت ادور على عباس ده واواجه , مهمنيش بقا ابن شيخ الكفر ولا ابن مين .. من الواضح اننا انعزلنا ايام بنرعى اثيل ومركزناش في الي حصل للكفر اليومين دول , ناس ماتت والي انتحر , والي لقوه متقطع , من ضمن الي ماتو دول كان عباس الضو , بيقولو لقوه ميت متقطع اجزاء , كل رجل ,وأيد في حته وراسه متعلقه على رمح مغروس في الأرض . حاجه في غايه البشاعه , طبعا وسط كل ده لقينا شيخ الكفر واقف قدام الحتت الي جمعوها منه وهو ضاممها بأيده ولبسه وجسمه كله ملطخ بدم ابنه, وبيعيط زي الاطفال الصغيره , اصل كان ابنه الوحيد من زوجته الي بيحبها واتوفت .. الله يجحمه بقا مطرح ما راح ده كان ساحر , ساحر متخفي في ظل طبيب الكفر الي على ايده الشفا وابوه الضو كان بيدعمه ويشجعه على الي بيعمله .. واهو مات الموته الي كانت من نصيبه .. طريق يا زياد اخرته متختلفش كتير عن الي حصل لعباس ده . انا كا زياد بفكر وبقول جوايا : ميت متقطع , طريق الي بينبش في السحر , والي في الاغلب السحر الباطني , الي كان شغوف بيه الضو وفي الاغلب ابنه اتبع نفس منهجه , مات زي السحره الكبار الي نالو جزائهم نتيجه عبثهم .. يمكن الضو فعلا كان بيوصلي رساله افهمها بعدين .. تعبتك معايا اوي يا شريف , اخدت من طاقتكو , بس مش هتاخر عن مساعدتكو اكيد .. لوسيفج : لأجل اشباع الفضول ممكن تعمل اي حاجه , هتساعدهم لأشباع رغباتك مش لبروز دور بطولي جواك من انجراف مشاعرك تجاههم , لأنعدامها ..