جزء ١٢ - المخطوطه

اتفضل ارجوك خش البيت , القصه كبيره ومحتاجين نذكرلك التفاصيل كامله يمكن تساعدنا حاليا بمساعده تانيه قبل الجلسه ..
وافقت فعلا ودخلت معاه , استقبلوني اهل شريف , تحديدا والدته وعليها أثار الدموع الممسوحه قبل دخولي بثواني , بتسلم عليا وبتقولي
: قولي انك مش هتسيبنا زي ما قال سعيد , انا هيجرالي حاجه يابني , مش من دوري الي جاي , انا يمكن اموت قبليها بسكته قلبيه لو لقيت الابواب اتقفلت في وشنا , انا صعبان عليا بس , الي هسيبهم ورايا .
قولتلها : بعد الشر عليكي يا أمي , انا فعلا وعدته اني مش هسيب اي حد هنا في الكفر , انا بس محتاج اعرف , محتاج افهم .

طلعت من الاوضه بنت جميله ورغم الشال الكبير واللبس التقيل الي مش مبرر في جو مش برد اوي للدرجه , بس كان واضح اوي جمال ملامح الوجه الطبيعيه .
لاحظت انها تقريبا مريضه او باين عليها البهتان بجانب الحزن .
كانت واقفه بعيد اول ما دخلت وجت وقعدت مع امها في خجل .
وانا قاعد مع اخوها شريف الي اتكلم وقال
شريف : دي اختي " اثيل " , والي بالمناسبه في جزء في الحكايه هي الي هتحكيها بنفسها بصيتله باستغراب , في نفس الوقت قولت في بال عقلي اسمها حتى مميز , يمكن ينطبق على شكلها اكتر .
بدأ شريف حكايته وقال : هتفهم , القصه مرتبطه اكتر بأثيل .
وده الشئ التاني الي جايلك تساعدني فيه .
مش عارف ابدأ منين ... من خمس سنين بالظبظ .
كان الكفر مش زي ما انت شايفه دلوقتي , الناس كانت كتير ومتعاونين جدا , محصلش كل الي حصل ده ولا سبق ان كان بيتقتل مننا ولا بيتخطف حد .
شيخ الكفر الضو وقتها نصب الخيم وجمع فيها بعض من الاهالي والقعدات اوقات كانت بتبقى فقرات ترفيهيه وجزء منها بتبقى قعدات صلح بيعملها شيخ الكفر من عائلات بينهم خصومه وعداوه .
وبيتم وقتها الصلح , اجهل انت تعرف التفاصيل دي او لا بس هي كانت عاده عندنا ويمكن بتحصل في اي كفر تاني حتى لو مش بالشكل ده , اخر خيمه اتعملت من الضو جاب فيها مجموعه من الناس اول مره نشوفهم , انا كنت موجود وقتها مع والدي الله يرحمه بقا , مجمعين كام واحد عرفت انهم من بره الكفر , وناس من الي هما تشوفهم متطمنلهومش , حتى لهجتهم تشك انهم ميمتوش صله بالبلد ..
اخر فقره جه طلع الضو وهو بيقول للناس : انا محتاج منكو اكفئ رجاله من رجاله الاهالي هنا ويكونو مستعدين يتعبو معانا ايام , ولو نجحنا في الشغل ده كل واحد من الرجاله دول هيتوزن وزنه دهب ..
كله استغرب طبعا وفي الي مصدقش , قام اتحرك واحد من الرجاله الي بره الكفر ورمو على الطبليه ورقه او زي مخطوطه قديمه , انا مكنتش قريب اوي منهم اني اشوف تفاصيلها , ميزت انها مخطوطه قماش مرسوم فيها رسومات وكلام ورفع الضو المخطوطه دي في العلن ..
: المخطوطه دي بتشير لكنز تحت ارض فاضيه مش مملوكه لحد من العائلات هنا والارض دي كان فيها مشاريع بناء واتلغت ومبقاش حد يسأل عليها دلوقتي ..
طبعا انتو مستغربين ليه قولتلكو وانا كنت اقدر احتكر الحفر في الارض دي لوحدي , بس انا اصريت اني مقدرش اعمل حاجه لوحدي ولازم مشاركه من كل الاهالي الي تقدر تساعد , العمليه دي كبيره وفي باطن الارض في كنوز مأهوله من الاثار ومش هتخرج الا بكام خطوه هتتعمل واخرهم الحفر والحفر بالذات محتاج عدد كبير من الناس لأن الحفر اوقات بيتردم من الجهه المقابله , من ناحيتهم ..
كل متطوع من الرجاله ليه جزء من نصيبه في الكنز هيعول بيه اهله يمكن يأمن مستقبل ابنائه واحفاده كمان بيها ..

بنسمع الكلام الي بيتقال في ذهول محدش مصدق ولا فاهم ازاي شيخ الكفر يطلع منه حاجه زي كده ..
بس سرعان ما اتقبل الاهالي الموضوع وفهمو , وقبل ما الخيمه تتقفل قال شيخ الكفر ان هيتعمل بالظبط 4 جلسات قبل الحفر وكل جلسه هتودد علاقتهم بكائنات هي الي بتحرص الكنز ده وهو الرصد .
مقدرش اقولك ان دي بدايه كل ما يتعلق بالكائنات دي لأننا من زمان جدا واحنا بنتعرض لمواقف اشبه بظهورهم لينا .

وقفت انا زياد عند الحته دي وقولتله : قصدك قبل ظهور فكره الحفر والكنز عموما كانو بيظهرولكو اهل الأرض ؟ وليه ؟
شريف : معنديش علم بالكلام ده بصراحه احنا طول عمرنا متربيين على اننا بنخرج بالليل بنلمح ظهور اقزام وكيانات طويله بتتمشى بالليل وياما اهالينا قالو كده ولما كبرنا عالاقل لو حصلنا موقف واحد بس شوفنا ..
بالأخص في الارض الفاضيه الي الضو قال يحفرو فيها ..
الناس اتعودت وبقا بالنسبالهم بتشوف الكائنات دي عادي , وغير كده مكانوش بيتأذو , احنا في حالنا وهما في حالهم ..
المهم والي هو اساس الموضوع ان الفتره دي والي كانت فتره ما قبل الحفر ظهر بعض حالات المرض الغريبه , انا فاكر وقتها شابين جالهم مرض غريب محدش من اطباء الكفر عرف يشخصها وماتو نتيجه فقر في الدم وجسمهم في اخر فتره ليهم بقا نحيل جدا ..
و3 رجاله بعديهم بأسبوع ماتو بعد ترجيعهم لدم وتكتلات زي تجلطات دمويه ..

مش كل الناس ربطت بين الي حصل وانه مرتبط بالكنز والرصد الي بيتعاملو معاه , خصوصا ان الموضوع لما بيتطرح على شيخ الكفر الضو ويرجع يجمع الناس تاني يقولهم لو حاسين بخوف وقلق من فك الرصد الي هنعمله ده براحتكم لكن اقنعهم انه ملهوش علاقه بحالات المرض الي انتشرت ..
والناس الغلابه هبل وصدقو , بعيد عنك الفلوس اغرتهم وكل شخص تخيل الملايين الي هتبقى من نصيبه لما يشارك , داسو على كرامتهم ومرضهم في سبيل يخرجو من فقرهم ..
الي طمنهم اكتر , طبيب واحد بس في الكفر الي قدر يعالج 3 و4 حالات خلال اليومين الي مات فيهم شباب بالمرض الي قولتلك عليه ولحقهم في مرحله صعبه ..
الشخص ده يبقى عباس الضو ..

استوقفني حاجه مهمه قاطعت بيها كلام شريف وقولتله : عباس الضو طبيب الكفر الي على ايده الشفا وملحقش الشباب الي فاتو والي قبلهم الي ماتو بنفس المرض ؟
رد شريف : ما هو ده اغرب حاجه , في ظل جهل الناس و تفاجئهم بالشفا الغريب خصوصا الطريقه الي كانت مختلفه عن باقي اطباء الكفر وابوه نفسه الضو رغم علمه وذكائه بس معالجش حد او عطى اي اقتراح .. والناس بقت تعامله ولا كأنه ولي من اولياء الله وليه بركه في تحركاته ..
ونيجي للي انت قولتلي عليه انه معالجش ازاي الي فاتو ؟
ده لأن عباس الضو ظهر في الفتره دي ومكانش موجود قبلها , الشاب ده كان اهلي واهل البلد عارفينه من زمان , بيحب ابوه جدا ومرتبط بالضو ارتباط كبير وحضر معاه جلسات كتير مع اهالي البلد بس كان صغير وسافر .
سافر يتعلم في دوله من دول بره ... ورجع بعد السنين الطويله دي للكفر في الوقت الي انتشر فيه الامراض وسط الناس , ومع ظهوره اتقال كتير عن تعرضه لبنات من الي كان بيعالجهم ..
على حد الي عرفته من اهالي البلد انه رجع بعد تعليمه ومشتغلش مع ان واحد في تعليمه العالي زي ده يشتغل بره او عالاقل يفتح عياده كبيره في القاهره والمدن لكن ميرجعش الكفر ..
لما شوفت شكله كان شعره ناعم وطويل بس كان لونه ابيض , حتى دقنه بيضا , زي ما قولتلك هو شاب ولسه متخرج فا كنت مستغرب , حتى الوشوم لرمز غريب مش مفهوم في محيط عينيه تقريبا ..

بيني وبينك مكنتش بقتنع بيه في الاول ولا بطرق علاجه خصوصا انه بيزعم فضل العلاج الباطني عليه وعلى الناس .. بيعالج يعني بالطرق الي احنا نعرف انها طرق سحر مش حقيقيه , مبتعالجش يعني من الامراض الجسديه .
الفتره دي بالذات ومع زياده اعداد الناس الي بتمرض ..

شريف سكت لوهله وبص على اخته اثيل , ردت هي عليه وقالتله :
كمل يا شريف , ولا اكمل انا ؟

شريف : لا كملي انتي يا اثيل , وقولي التفاصيل الي هتقدري تحكيها ..
سكت شريف , وانا مستني اثيل الي هتكملي , واضح عليها التردد والتفكير في الي هتقوله ..
زياد : اتفضلي يا اثيل انا سامع .

بدأت تتكلم وقالت
اثيل : انا كنت نايمه , وطبيعي اوقات بحلم بكوابيس الكابوس الي حلمت بيه كان مختلف , انا صحيت من النوم عشان اقوم اشرب ميه حسيت بملمس ترابي حولين راسي وجسمي كلها .
عشان اصحى الاقي نفسي في تربه ..
بس لا بعد لحظات من الاستيعاب فهمت انها مش تربه , التراب والحيطان مكانتش مربعه المكان ده كان طرقه او مكان طويل وسقفه واخد شكل المقبره ..
بطبيعه اني في حلم كنت خايفه بس مش للدرجه , كنت بتحرك عادي وبتمشى في الطرقه , طرقه طويله مليانه نقوشات على جانبيها لرموز وكلام مش مفهوم ..
ومع حركتي لقيت ان الطرقه متفرعه لطريقين وكل طريق اتمشى فيه يتفرع لكذا طريق تاني .. انا كنت داخله متاهه ..
حركتي طولت في المتاهه والضلمه , حسيت اني شايفه كويس في الضلمه , لكني سمعت صوت خطوات حوليا , في اللحظه دي اتخضيت وقررت اني اجري ..
مش عارفه انا بجري من مين وسط المتاهات واخش في اتجاهات اطلع لنفس المكان الي كنت فيه والرجل الي سمعتها بتتبعني بنفس الخطوات ..
وانا بجري اتكعبلت ووقعت ووو , وبصيت ورايا ..
اول مره كنت ابص فيها ورايا عشان الاقي جسم طويل جدا ونحيل ..
مش عارف اوصفهولك ازاي بس هتصدقني لو قولتلك ان شكله كان عامل زي الشجر , جسمه كان عباره عن جزوع شجر او تكوينه قريب للشجر بس على هيئه بشريه , راسه ووشه جايين بالطول مش دائريه ولا بيضاويه زينا ..
لاحظت جبهته الي مرسوم عليها او بمعنى اصح محفور عليها رمز قريب للنقوشات الي شوفتها عالجدران ..
دخلت في حاله اشبه بفقدان الوعي مع ادراكي للي بيحصل حوليا , مكنتش شايفه كويس ولا قادره اصرخ حتى جسمي وعروقي اتجمدو ..
وو , ووحاسه برجلي بتتسحب وبتسحل في الطرقه كلها وانا شبه سايبه نفسي او مستسلمه ..
الصوت الي كنت سامعاه وقدرت اميزه وانا بتجر في الأرض صوت طالع من الحاجه الي بتجرني دي وهي بتقول : كسرتو الحاجز واخترقتو الحجاب , ما من رئاب مع قوم خرقوه .. فاكره كويس الجمله مش بنساها ..
حسيت بعد الجمله دي ان جسمي بيتشد من كل اطرافه وزي ما يكون بتتخلع من مفاصله ..
هنا بقا صحيت مخضوضه من نومي , حاسه بكتمه على نفسي ومش قادره اصرخ زي ما كنت في الحلم وكأن ايد محطوطه على بقي وانفي بيخنقوني ..