جزء ١١ - ضغينه الساحر

هل حتى تقدر تجزم ان كل ذكرياتك صحيحه ؟

ده كان اخر رساله يقولهالي ..  هو مين ؟

لوسيفج روفوسيل ، شيطان  موكل من لوسيفر استعنت بيه قبل حادثه العربيه الي اتعرضت ليها من فتره , واكتشفت اني على عقد بالدم معاه وقدمت قدام عقده قربان والي اتضح انه اخويا مدحت ,  والسبب ؟   التقرب اكتر لكنز او كنوز مدفونه بمساعده عزام  , تاجر اثار كنت شغال معاه  بالأضافه لعقد مع الشيطان لأجل الثروات الباطنيه  , بيرشدني ليها , والي احداها كفر بيقال ان في باطنه كنز من كنوز اتدفنت بعد انقضاء مستوطنين اشوريين وتحويط قبورهم بنوع من السحر  للأستعانه بأهل الارض , بعض منهم في الأصل كانو من سكان الكفر وماتو في ظروف بشعه ورجوعهم من تاني بهيئه امثال العرجاء , اسراء , بنت اغتصبت على ايد شخص بأسم عباس الضو , والي يعتبر ابن الضو  شيخ الكفر , المسؤول عن تسليط الشيطان عليا لتتبعي وفرض الحمايه عليا.. مرحله فتحت ابواب الجحيم بدايه من تقديم قرابين لأهل الأرض لسد فجوه الفوضى الي احدثها الضو لما حاول يستخرج الي في باطن الكفر , ورغم كده كانو اهل الكفر بيطيعوه , لسبب قوته او يمكن لأنه زي ما اهلكهم عنده القدره انه يخرجهم من شر اعماله ..

نرجع لذكرياتي بعد فقدانها نتيجه الحادثه , ذاكرتي وصلتها بالعقد مع لوسيفج , والعقد معاه بيؤدي لفقدان مؤقت للذاكره وانا كنت  على علم بيه في الاول ، وأقراري ليه .. شكوك لنوع من الاستحواز اتأكدت بعد فتره خروجي من المستشفى انه صح ..

علميا خلل في الناصيه او الفص الامامي للدماغ والمسؤل عن استدعاء الذكرى والسلوك والمشاعر , الحقيقه ؟

ان الي سيطر على ناصيتي الشيطان نفسه بعد سماحي ليه بكده من العقد ،  مما تأكيد شكوكي لنوع من الاستحواز على ذكرياتي وتزييف جزء منها  زي اني دكتور نفسي وبعض السيناريوهات والتخيلات الاخرى ..

    هل كل ذكرياتي صحيحه ؟ الاجابه , اكيد لأ .

                                 .......................

بعد ما خرجت من بيت بهاء كنت مقرر اني اروح لعم ربيع , بياع الجرايد ..

الراجل ده عارف  اكيد حاجات اكتر عن عباس الضو ..

الوقت كان قرب من الليل لكن الناس كانت بره وبيخشو بيوتهم ويقفلو اول ما الليل يحل عليهم ..

انا طبيعتي في الوقت الحالي مش بخاف زي ما انت عارف , بس قلبي كان مقبوض مش دقات القلب الي بزيادتها بيظهر الشيطان , دقات ليها لغه خاصه بتقول اني قربت من  نطاق الاذيه   الفعليه ..

وبقرب من الحفر الي في الارض , زي ما قولت قبل كده كل جزء في الكفر فيه حفر والي بيخرج منها اهل الارض واحجامها مختلفه نظرا على ما اعتقد لأحجامهم وانواعهم ..  منهم حفره مقابله للشباك الخاص بي دوار شيخ الكفر ..

حفره كبيره انا عارف كويس ان الي خرج منها كانت العرجاء ..

شايف بعض اثار فتات , او اشلاء صغيره من اللحم  مغطيه اطراف الحفره ..

سؤال مهم يمكن مخطرش على بالي اقوله للضو وهو احنا هنعمل الجلسه فين ؟

الجلسه الي مفروض  نتقرب فيها من اهل الارض واكون انا وسيطها ويتم الاتفاق بعدها استخرج الكنز الي في باطنها ..

بس معتقدش ان دي الحفر بتاعت القبور الي هدخل منها ..

دماغي بتودي وتجيب في افكار , وعلى الناحيه التانيه يتغير كل ده بشخص واقف قدامي رافع ايديه لفوق وبيوجهه ناحيه حاجه انا مش شايفها ..

الشخص ده كان واقف بعيد شويه قدام حفره من الحفر , ده .. توفيق ..

بس توفيق الي انا شايفه جسمه كله متشرح وبينزف ورجله  مكسوره , لكن قدرت اميزه من وشه ..

زياد : توفيق , انا اسف يا توفيق بس انت الي جبتني هنا ودخلتني , بس لو كان في رساله عايز توصلهالي انا مخدتش بالي منها ..

توفيق : رساله ؟ هههه , انا مقدرتش اوصلك رسالتي وانا عايش ,  هوصلهالك وانا ميت ؟

انا واقف قدامك  , بس ممكن تكون بتهلوس , شايفني شخص تاني مثلا وعقلك الباطن من كتر التفكير هيألك انه انا توفيق , الميت مش بيتكلم يا زياد ..

زياد : انت ليه بتحاول تضلني عن حقيقه انك قرين توفيق ؟ 

انت جاي تطلب المساعده صح ؟

توفيق : محدش بيقول انه قرين , بس انا مش بضللك , انا بواكب مرضك النفسي .. نسيت ولا ايه لما كنت بجيلك العياده وكل مره تذكر فيها انك صديقي في الكليه , وانك في نفس التخصص , طب نفسي ..

مفكرتش لوهله اني كنت بهاودك .. مفكرتش اني كنت عارف بمرضك يمكن كل الناس كانت عارفه , زياد انت مكنتش صديق ليا , انت اتعرفت عليا عن طريق عزام ومرضك خلق باقي السيناريو ..

الجزء المفقود اني جبتك للمهمه دي لأنك الانسب ليها ومش واثق لنجاحك من صعوبتها  , بس متخيلتش اني اتعدي او اتصاب بالفضول الي يخليني اجي وراك ..

كان في دماغي وقتها ان على قد ما انت انسب مني لدخولها ليه مدخلش انا واحاول , ليييه انت احسن مني مع اني من اقدم رجاله عزام واكفئهم ..

زياد : انت الي حطيتلي التمثال يا توفيق , انا مكنتش بتوهم صح ؟

رد وقالي : التمثال ؟ هه انا الي حطيت التمثال ده  فعلا في مكتبك من ساعه اخر لقاء لينا,  مش توفيق  ..

التمثال الي بدأ معاك جزء من لعنه هتفكرك بيا كل ما تشوفه ..

مستغرب انك محطتش عينك ولا ركزت على الي كنت بشاورلك عليه من ساعتها ..

فجأه اتنتش توفيق من قدامي داخل الحفره , اتشد في جزء من الثانيه ..

اتضح انه كان بيشاور على حفره من الحفر بيخرج منها كائن واتنين وتلاته بيتحركو ببطئ ناحيتي ..

كائنات معتمه وشكلها اغرب مما كنت متخيل ..

الي كنت شايفه بالظبط جسم شبه اّدمي بس مشقوق بالطول , نص راسه بالطول بس الي موجوده وكذلك ايد واحده ورجل واحده وجسمه كله عباره عن نص جسم بالطول , بس هو , هو تكوينه كده من شكله بعد ما وضح اكتر في النور ..

انا كل ده كنت واقف كا العاده سرحان وسمعت صوت من بعيد بيزعق ..

طلعت اجري بسرعه باتجاه الصوت قربت من مجموعه البيوت التانيه في الكفر والمخلوقات دي ورايا بس كانو بيمشو ببطئ شويه ..

لمحت شخص واقف بعيد بيبص عليا , وانا مش شايف منه حاجه غير هودي اسود وكاب وجاكيت ,  ولازلت مش قادر اشوف شكله كويس , ده كان بيراقبني قبل كده , بنفس اللبس حتى ,  اتحرك وبعد عني في حين أن الراجل التاني الي كان بيزعق ده نادى على  شخص بالاسم .

وقال : قدمو النذر بسرعه , الحج سعيد بسرعه , الحج سعيد هو النذر ..

في اصوات تانيه متداخله لناس خرجت من بيوتها واحد طلع ازازه زيت وقال : ارمو زيت الحرمل على الحج سعيد بسرعه قبل ما ياخدو واحد تاني مننا .

اتفتح باب تاني وخرج راجل عجوز دموعه مغرقاه وفي حضنه بنت شابه من الواضح انها بنته ومراته ست كبيره ماسكه ايده وبتبوسها وكانت في ايدها التانيه ازازه من الزيت الي بيتكلمو عنه ..

ده اهل الراجل هما لي هيقدموه قربان !

فعلا , نفس الي قاله بهاء ..

بصلي الحج سعيد ده بعدها وبرقلي ..

قربت منه وانا مش فاهم هو , هو عايز يقولي ايه ..

الراجل وهو منهار قالي : يابني , يبني انا عارف انهم بيقولو عليك انت وسيط وهتعملو جلسه معاهم , بالله عليك تلحق مراتي , كلها ايام  وهيجو ياخدوها بعديا .. احلفك بالله ..

نزل سعيد ده على رجلي  وهو متبهدل وبيبوسها وبيقولي : بتمناها اخر حاجه يبني  تعملو الجلسه بسرعه وتوقفو القرابين وتخلصوها  بدري قبل ما ياخدوها  ,  مراتي ..

سمعت صرخات من الناحيه التانيه , صرخات ونحيب اهله الي بيودعوه ممزوجه صرخات المسوخ المتجهيين ناحيتنا ..

: النسانسة , هما الي هيستلمو القربان انهارده ..

ده كان كلام الراجل المتطوع الي كان في ايده زيت الحرمل .. قرب من الحج سعيد وبدأ يسكب عليه الزيت ..

رجل الراجل العجوز مستحملتش ومقدرش يصلب طوله ووقع ولسه الراجل التاني بيكمل توزيع السائل ده على جسمه  لحد ما خلص الازازه كلها ..

حبيت اطمنه , خصوصا انه هيموت وهيسيب اهله وراه , اهله الي كانو باصين للراجل وهما في صدمه بس متضطرين انهم يستسلمو للقدر الي اتحطو فيه ..

عالاقل الكام يوم  كا مهله ممكن الحقهم    ..

زياد : متقلقش , انا هحاول على قد ما اقدر ونعمل الجلسه دي , انت مش هتروح هدر , سامحني على كل ثانيه اتأخرت فيها  ..

الكائنات دي كانت بتتحرك ببطئ لكن اول ما انتشرت ريحه الزيت , جرى واحد منهم بسرعه مش طبيعيه مع انه ماشي بينط على رجل واحده ونط بفكه على رقبه عم سعيد , متفهمش رغم الضعف الي ممكن تشوف الوصف ده بيه , الا انه كان قوي جدا وشد جسم عم سعيد بسرعه ونط بيه بعيد واستغلت المخلوقات التانيه دي الفرصه ونهشوه وهو حي , شدوه في الحفره ..

سامع صوته وهو بيصرخ من تحت ..

بنت شابه عشرينيه حاضنه امها وهي بتعيط وبتقول كلام مش مفهوم , بنت الحج سعيد ,  جمبها  شاب قريب من سنها , بيواسيهم الا ان واضح على ملامحه الانهيار من لحظات ..

ظهر وسط كل الاصوات دي صوت الراجل الي قدم الحج سعيد قربان  وقال :

يلا كل واحد  على بيته ,  احنا اعددنا القايمه الجديده بأسامي القرابين الجايه , كله يتفضل على بيته الليل ظهر ..

صعب حد يتقبل المشهد , او اللامبالاه الي  عند باقي اهل الكفر , بس وقت الاجبار عالظروف لازم تتعايش معاها بمزاجك والا هيبقى غصب عنك و اليوم هيعدي عليك بألف .

والناس هنا بتتعلق بالوقت وكل دقيقه بتفرق في حياتهم .

وسط المواساه لأهل الحج سعيد الشاب الي كان وسطهم ده كلمني وقالي :

انت عارف اخر كلمات ابويا , بالله عليك ما تعدي كلامه وشوف حل , عشان يرتاح في تربته , مش هو بس , الناس الكتيره الي ماتت ملهاش ذنب في حاجه غير انها كانت في دايرتهم ..

قولتله : هحاول فعلا , يمكن لو  انا كنت جيت بدري شويه ومحصلش الي حصل كنت ممكن اساعده .. بس اوعدك هقدر اعمل الي بأيدي ومش هتأخر ..

ولو ان انت عارف غيري كتير فشلو , وانا عايز انفذ الجلسه دي مع شيخ الكفر بحرص , اقل غلطه هتهلك الكل ...

: فعلا , في ظل باقي الناس الي معندهاش أمل في النجاه انا عندي جزء من اليقين بأننا قربنا ..

احب اعرفك بنفسي , انا شريف .

زي ما انت شايف الي حصل لأبويا , يمكن مش متأثر دلوقتي وانا شايف جسمه بيتاخد من قدامي , انا اتأثرت كتير من أول ما سمعت اسمه في القايمه الي فاتت .

لو متعرفش كل شهر بيتعمل قايمه بالناس الكبار في السن او الشباب المرضى والي عندهم امراض مزمنة  , اي شخص حياته قيمتها تتحط في كافه قصاد طفل او شاب لسه عايز يبدأ حياته .. يمكن , يمكن ده الى حد ما بيحقق عدل قصاد روح شخص اتولد في الظروف دي ..

قولتله : عدل ؟ العدل راح من زمان , والظلم روى عطش كتير من المسوخ بدم الابرياء ..

رد عليا وقال : مش كانو كلهم ابرياء , ياريت الي بدأ كل اللعنه دي كانت انتهت بموته , لكن مات وخلف وراه تعتطش اكتر للدم ..

زياد : بموته ؟ , انت مش قصدك على الضو الي حفر في ارض الكفر وكسر العهد !

شريف : عباس الضو ..

هو الي بدأ كل حاجه وابوه الي كمل وحاول بعدها يصلح الغلط بس فشل ..

عباس الضو عامل زي الشيطان المتجسد في هيئه ادمي .

زياد : كانت فتيل الحرب بدايتها الاغتصاب لبعض من بنات الكفر زي العرجاء كده , تعرف حاجه عن الموضوع ده ؟

شريف : هما قالولك ؟ عمتا مش دي تحديدا البدايه , بس الاغتصاب الي حصل ده بالأخص الي انتهت بقتل بنت عندنا من كام سنه اسمها  اسراء , زي ما انت شوفت كانت بترجع تاخد ناس من القريه وتقتلهم .

زياد : وده معناه انها السنين دي كانت بتحاول تنتقم ومعرفتش , او على حد فهمي عباس الضو مات ,وهي كده مخدتش انتقامها ..

انا حاسس اني مع كل معلومه بفهمها بتوه اكتر في حكايه مساراتها بتضاعف ..

كان في سبب تاني لموت عباس الضو ..

رد وقال :  خلينا منستبقش الاحداث , مات , وموته ليه سبب تاني واعتقد لو مش هتقدر تاخد هي انتقامها منه هيبقى من الضو , بس في حاجه مهمه جدا .

قولتله : قصدك ان هي كل الفتره دي منتقمتش من الضو , هو محصن اكيد .

شريف : محصن , ده مفيش حد يقدر يقرب منه من اهل الارض , وانتقامها اتحول لأهل القريه وبقت تخلص عليهم بالقربان الي بتاخده , بس طبعا كل ده هي متقيده بالعهد الي اتعمل بتقديم القرابين والي اهل الارض بيجبرو بعضهم يلتزمو بيه ..

وكده وكده لو مكانش انتقامها ده هيحصل كانت القرابين هتفضل تتقدم , بس عايزك تتخيل لو مكانش العهد ده اتعمل كانت ممكن تقتل قد  ايه ..

وعلى حد الي سمعته ده حصل فعلا ..

انا بعتذرلك جدا يا استاذ زياد , والدتي واختي في حال صعب شويه بس , اتفضل خش .. خش البيت .

على حد علمي هبقى بجح اوي لو دخلت يا شريف في الوقت ده خصوصا والدك الي لسه ميت .

انا ممكن اجيلك بعدين عادي .

رد شريف وقال : انا سبق وقولتلك من شويه اننا عارفين الي هيحصل لابويا , وجهزنا كل حاجه ومن ضمن التجهزيات ان ابويا بلغني ان في شخص هيجي يزوركو وانه هيقدر يخلصنا من اللعنه , لو اتعملت الجلسه  والوساطه بينا وبين اهل الارض .. الكلام ده كان شيخ الكفر الضو بيبلغ بيه الناس كلها ..

بس انا الحكايه الي هحكيهالك على قد ما هي هتبقى خطر عليا بس لازم اقولها ..

في نفس الوقت متغلطش غلطه الي قبلك ..