جزء ٤ - عقود روفوسيل

ورقه تانيه لاحظتها كانت في ايدي ومكتوب فيها بخطي بس مقدرتش افتكر تفاصيلها  ومركزتش فيها  لأن المكان رجع لطبيعته من تاني ، الخادم اتكلم وقالي :

الخادم : قربت من الحقيقه يا زياد بس الاطياف من الوهم بتلهيك عن الي كنت بتخفيه ورا العقد , قولتلك ان ذاكرتك ليها صله بالعقد , مش حادثه العربيه والخبطه الي خدتها هي الي اثرت على فقدانك للذاكره , بمجرد ما يبدأ تطبيقه , ذاكرتك بتتمحي لفتره مؤقته

,  عقد الدم , حكمه عليك فيما بعد اصعب , تضحياته اكتر من اي عقد عادي بالاخص انت بتتعامل مع الموكل بعقود الدم من لوسيفر .

وانت فكرك زياد الي قادر يخش كل القبور وسط اطياف وملوك من الجن واهل الارض , كان ازاي يقدر يخرج عايش بصفته الوعاء والوسيط ما بين الساحر والحراس .

القوه الي بتمتلكها من قبل العقد  انا السبب فيها , وبعدها بقيت اقوى بكتير بل والعقد بيحميك من اي ادمي او كيان يحاول يخترق الجدار والعازل ما بيني وبينك ..
بمعنى الي هيحاول يقتلك من بعد العقد  امله الوحيد في قتلك هو اختراقه ليا .

رديت وانا  لسه مرمي على الارض , قولتله :  الضو الي اعرفه انه مسلط عليا خادم من اهل الارض مش شيطان , انا مش فاهم حاجه , ليه انا بالذات .
وانا عملت كل ده عشان ايه ؟ , فلوس , وثروه ؟

بس انا مقتلتش , انا عمري ما قدرت أذي حد , مش لدرجه , مش لدرجه الي انا شايفه قدامي .

لفيت راسي لقيت بركه دم تحت الجثه , دموع من الدم نازله من عينه  مكونه بقع كبيره في الارض , الجثه رجعت تنزف تاني  بعد ما اتجلط دمها .

لازال عينه مرتكزه عليا , جسم الماعز المتخيط فيه راسه بدأ ينزف هو كمان , دم اسود ممزوج مع دم الادمي .
شكلت بركه الدم دي خطوط ومسارات دمويه بتملي الغرفه وماشيه في مسار باتجاه كتاب كان مفتوح ومرمي عالارض , الكتاب اتسحب نحيتي , الدم كان بيقرب الكتاب مني وانا حاسس بشلل وكأني رجعت لحاله اول مره حصلت الحادثه فيها .

اول شئ وقعت عليه عيني في الكتاب , كان مفتوح على صفحه بعنوان " مراحل الاتمام الوجودي للشيطان الاحمر" .

"  يا امبراطور لوسيفر , سيد جميع الارواح المتمرده , ارجو ان تمد لي العون في استدعاء خادمك الاعظم , " لوسيفج روفوسيل "  Lucifuge Rofocale

كونت ايستاروت  , اعينني في ظهور لوسيفاج العظيم بحلول الليل على هيئه بشريه غير مشوهه  تمنيا , حصولي على القوه , عبر العقد الذي سأقدمه له بكل طاعه وبدون أسى " .



 



اخر جمل قريتها تسللت خلايا عقلي الخامله , كانت اشاره نشطت جزء من الذاكره .

قربان اتقدم , تضحيه , عقود الدم ,  قربان لجسم حيوان براس بشريه تمثيلا وتمجيدا للحارس الاشوري  " لاماسو " والي كان تقديم قربانه واجب لغرض مستقبلي بشأن المقبره الاشوريه في كفر طموس .

دم الماعز ودم الاضحيه البشريه ,  واخيرا دم المتعاقد على عقود الدم ,  ويتتمم العقد مع شيطان وكيل للوسيفر , باسم لوسيفج روفوسيل .
ل. ر : الشيطان خداع يا زياد , وخليك فاكر الكلام ده كويس , بس انت خدعت نفسك في الاول لما فكرت انك تنسى المئاسي الي وضعت نفسك فيها والشر ,  الطمع الي كانو جواك , العقد مع الشيطان بينسي , بس الذكريات مش بتموت ولا بتتمسح نهائيا.

انت بس وسعت الطريق لولاده جديده ليك مفكر انها هتاخد مكان الي فات .

وده كان اخر نتايج اعمالك .

زياد :  فعلا , اني انسى  شكلي في  السابق  خلقلي شخص تاني ممكن اكون لسه بكتشفه دلوقتي  ..



كنت بكلم حد انا عارف انه مش موجود دلوقتي او اتغير للأسوء ..

:  بس انت فعلا  هه , مم , يعني لو كنت بالبشاعه دي كان الاولى انك متخليش كيان هو الي قيد روحك , لو بالنسبالك قوه الي هتحصل عليها يبقى ضعفك هو روحك نفسها مش ظاهرك , بس تفتكر, انا محستش اني ندمان اكتر من اني عرفتك دلوقتي .

كان ممكن استتغنى عن كل الفلوس والشركه والمعرض , كل حاجه , بس ليه مصمم اني اعرفك بشكل تاني عن طريق الدم ؟ 

 الدم الي كان كل اما اشوفه ابدأ افتكر , لأن بدايتك كانت منه وكأن الدم وقود بيغذي عقلي  زي ما كنت بروي عطش العقد مع الشيطان بدمي .

ممكن اسميه " حديث مع ال انا " والشيطان هو الي  ماسك المرايه , وبعد ما اتكسرت .

بجمع كل قطعه منها عشان اوصل لنفس   السبب الي خلاني اكسرها .

الجثه الي قدامي او انصاف الجثه زي ما واضح , دموع الدم الي وقفت نزيف كانت وحدها كفايه عشان تشكل اسمه بالدم : مدحت كمال التاجي .

الربطه  بتاعت جسمي فكت وبدأت اتحرك واقوم من مكاني , كنت بقرب منه وانا حتى مش قادر احس بالصدمه  , مستغربتش كتير , الي ميت قدامي ده اخويا لكن , مش عارف احس تجاهه بشيئ من القلق والخوف عليه زي الاول , قربت من دماغه وهي ثابته على اخر نظره , من الصدمه  .
عقلي كان مصدق بس قلبي لا .

بس انا قتلته فعلا  , قتلته ليه ؟

كان للاسف لازم اضحي باقرب حد ليا عشان الاضحيه تتم .

كل الي انا فاكرو ان انا قتلته بدم بارد , فصلت راسه عن جسمه وقطعت جسمه حتت صغيره وحللته في سائل حمضي , بعدها خدت الباقي من عضمه وطحنته واستخدمته في نثره على  مداخل القبور,  زي ما كنت بعمل خلال رحلاتي مع عزام في استخراج الاثار.

 كل الدم الي كان موجود الارض شفطتو , بجانب الصوت الي صدر من الشيطان فجاه ..

 ل , ر : بمجرد ما تمشي من المكان الجثه هتختفي ومش هيبقى ليها اثر , و ده الي انت محتاجه في الوقت الحالي .

سمعت الكلام ومعترضتش , انعدام الشعور تجاه اخويا كان اول طريق لنجاحي في الي خططت ليه .

خرجت من الاوضه وانا خارج دوست على دبله  مرميه على الارض .

كملت بدون اهتمام , او حسيت بتشتيت وقتها ,  بس استوقفتني ايد على كتفي من ورايا .

لفيت راسي لورا بس وقتها فقدت الرؤيه ورجعت الرؤيه ضبابيه من تاني وقلبي كان دقاته بتبطى  , ايوه زي ما تخيلت انت , كان لوسيفج واقف قدامي .
مكنتش شايف منه غير ايديه الي ممدوده ناحيتي .

ل.ر : متخافش انا هساعدك , رساله بسيطه انت محتاج جدا انك تشوفها .

زياد : حطيت ايدي في ايده ومن اللحظه دي زي ما يكون انتقلت من مكاني او  حلم كا العاده والمكان كله  اتغير .