جزء ٥ - رابطه حب مفقوده | عقود روفوسيل
جاري التحميل...
جزء ٥ - رابطه حب مفقوده
معادله بسيطه جدا ممكن تخلي من المرض ميزه وارتباط المرض بالتخصص الي محتاجه يكسبك قوه مأهوله مش اي حد قضى سنين عمره في الشغل يقدر ينتج زيها .
ارض فاضيه يغلب عليها طابع العتمه , وسط العتمه الي تكاد تبلع نقطه الضوء وسطها لمبه غاز واضح ملامح الزمن في شكلها العتيق مفتوحه على قبر محتواه اعتم بدرجه او درجتين عن الظاهر . كان ايد الي ماسكه اللمبه الجاز والايد تعود لشخص راكع على رجله قدام القبر وبالايد التانيه بيحط حاجه وشيلها يرجع يحطها في مكان تاني ويبدل مكانها وهكذا . المره دي كنت قادر اتحرك بحريه شويه , وكأني مش طيف بس عندي رجل اتحرك بيها . قربت والمظهر ده كان اكيد من ضهره بس خطواتي وقفت بعد ما بانت هويه الشيئ الي كان ماسكو وبيرتب مكانه عالارض . رأس , رجلين , كفين , دراعين , ومركز الاحشاء كله مفرغ مكانه , ومحطوط حاجه زي الزيت مغرقاه , حاجه اشبه بكده . الاجزاء دي كلها مفصوله عن بعض والاعضاء زي القلب والكبد وباقي الاعضاء الحيويه الاخرى متراصه على شكل دايره جوه طلسم بالدم , الرسمه دي رسمه طلسم بس مش عارف طلسم ايه . اتحرك الشخص ده وقام وبصلي . الهيئه الي كانت متصورالي وقتها راجل عجوز نحيف جدا , بشكل يقول ان جسمه حيويا صعب انه يبقى خالي من الامراض وعايش , شعره طويل مغطي اغلب وشه الي جزء منه بسيط ظاهر عظام الفك الي بارزه , وعينيه الي احداها مش موجود , او مفقوعه تقدر تقول انه اعور .. بدأ يتكلم بصوته الغليظ وقال : انت عارف ليه اختارتك بالذات عشان اقنعك بالعقد مع لوسيفج دونا عن باقي الوسطاء التانيين . معادله بسيطه جدا ممكن تخلي من المرض ميزه وارتباط المرض بالتخصص الي محتاجه يكسبك قوه مأهوله مش اي حد قضى سنين عمره في الشغل يقدر ينتج زيها . مش محتاج اعرفك بنفسي , لأني محتاج اعرفك انت اكتر على نفسك . بني ادم مضطرب عقليا , مريض نفسي يعني . انت مش طبيب نفسي لأ , انت المريض , مريض بالمشاعر المعاكسه او المضلله . فقدانك للاحساس والادراك لحياتك الواقعيه , بل تصويرك لنفسك بهيئه عكس الي انت فيها في الحقيقه زي اتزانك النفسي بل تكون معالجها . خوفك الشديد ورعبك اثره العكسي شخص ميت مبيتأثرش بأي احساس او ترهيب بمجرد مواجهته الموت يركع لكن ميخافش من قبضتها , بيانا عن عدم الأعتراض ... قولتله : الضو ؟ , انت , انت بتتقول ايه , بس ثواني , افتكرت اني مكنتش متخرج من طب اصلا , انا معنديش عياده , لكن بدأت اتعايش في مكتب الشركه كا مدير وطبيب نفسي بس في الحقيقه انا معالجتش حد , انا نسيت كل مشهد وذكرى تقول اني عالجت بني ادم واحد حتى او حد كان يعرف اني دكتور نفسي , اخويا مدحت ؟ هو كان بيتعامل معايا فعلا على اني طبيب نفسي , بمعنى اصح كان بياخدني على قد عقلي , هو قالي فعلا انه مش هو الي مريض .. يعني , كلام الضو كان صح فعلا , تقدر تقول اني افتكرت التفاصيل دي وانا مكنتش على وعي بيها وقتها .. وجهت كلامي للضو وقولتله : مش هسألك واقولك عرفت منين بس انت واثق اوي انك قد اختيارك ده ؟ وليه مختارتنيش من الاول وسيبت كل الوسطاء الي فاتو يموتو , واكيد لحد دلوقتي في منهم لسه بيموت . مردش عليا ولا كأنه بيسمع كلامي وكمل كلامه وقال : محاولتي الاولى في استخراج الكنز كانت نقد لميثاق اتعمل ما بين اهل الارض والكفر زمان , الحمايه والانفراد للجنس الاخر على باطن الكفر بممتلكاتها , والتدخل فيها شطب وجود الاهالي من مكانهم وطمسهم , محاولاتنا في الوقت الحالي وقف موت الاهالي وتوطيد العلاقه وحصولنا على جزء من الكنز , غضبهم شديد جدا , الفوضى والكوارث الي نشأت منهم حلها العقد الودي او الاباده الشامله للجنس كله , واحنا بأيدينا الاختيار الاول , ياريت متتاخرش . كانت اخر كلمات الضو قبل ما المشهد يتبدل من قدامي . بس لما فوقت من غياب الوعي ملقيتش نفسي في الفيلا . انا كنت قاعد على عتبه عماره , بمعنى اصح كنت نايم قدامها . الجو قلب مع مطر غزير بلل هدومي كلها الي كنت لابسها . شعري الطويل الي كان من طوله وبلله كان بيغطي عيني ومكنتش بشوف كويس ,. دقني كانت طويله , مش فاكر انا اخر مره بصيت فيها في المرايا كان امتى ! , يمكن مكنتش بحب ابص فيها لسبب ما . بس بالصدفه شوفت انعكاسي في ميه المطر .. المعروف ان لو الميه مموجه وغير منتظمه ومش هاديه بشوف انعكاسي بيتهز او بيتغير شكله , مع انتظام وهدوء الميه بتفضل الصوره ثابته وكأنها مرايه بتشوف فيها نفسك , بس , بس انا شكلي كان بيعمل تفاعل تالت خالص وبيتحول وبيتعاد تشكيله لشخص شكله قريب من شكلي , باختلاف انه لابس عبائه سودا طويله فرو اشبه بالعبائات الملكيه , مع قلاده لابسها غريبه الشكل , عباره عن مزيج من اللغه اللاتينيه والعبريه متداخلين مع بعض , من واضح خبرتي في اللغات الشعار ده بيرمز لكيان او الشخص الي لابس القلاده , شخص اسمه ...... قطع تفكيري صوت باب العماره الي انا قاعد قدامها بيفتح , وفي بنت بتخرج من العماره , شكلها كانت مميزه اوي , مش يمكن لاني معجب بيها وبشكلها الملفت , بس حاسس اني مش اول مره اشوفها , شعرها كان اسود طويل منها خصله ملامسه لخدودها المايله للاحمرار . انا كنت قاعد وفي ضهري باب العماره وفجأه اتخضت وقالتلي : متأسفه , انا بس كل ده كنت مفكراك نايم , انا شوفتك من البلكونه نايم على الارض في البرد تحت المطر كده , قولت اعمل حاجه لوجه الله وشكلك مكلتش . لقيتها حطت طبق بلاستيك قدامي فيه اكل وكيسه حطيتها جمبي فيها بطانيه قديمه . رفعت راسي وقولتلها : بس انا , انا مش شحات . ردت : انا مش قصدي كده بس , ثانيه واحده , انت , انت لا مش ممكن . رجعت البنت لورا في رعب ودخلت لجوا زي ما تكون شافت عفريت , مش بعيد اكون كده فعلا . جسمها كان بيترعش من واقع البرد , والموقف مع بعض , بس نظراتها ليا مش خوف بس , لكن قدرت اشوف بعيوني ان هي مستغربه , حاجه مكانتش متخيله ان هي تشوفها . اتكلمت وقالتلي : زياد , انت , ايه الي عمل , ايه , انت ازاي . انت كنت فين كل ده ؟ لا يعني انت زياد فعلا ؟ ولا انا يمكن بشوف خيالات وشوفتك حد اعرفه . قولتلها : انتي تعرفيني ؟ بس انا تقريبا افتكرتك , شوفتك في خطوبه قبل كده , خطوبه .... اخويا مدحت ! انتي , انتي اكيد نور خطيبته . رعشه جسمها بدأ يزيد وكأن رجليها مش شايلاها فا بدأت تنزل على ركبتها وجسمها كله اتبل من المطر , لازالت بتبصلي .. متردده بس بدأت تستجمع كلامها مره واحده . انا نور ايوه , زياد انت اختفيت الفتره دي كلها وانا معرفش عنك حاجه , ناس قالتلي انك عملت حادثه ومت , بس مصدقتش , او يمكن بعد الفتره الي عدت دي كلها صدقت . انت كنت نايم في الارض هنا ازاي وليه؟ لقيتها قربت مني وزي ما تكون هتمسك ايدي , رجعت ايدي بسرعه . قالتلي : زياد مالك ؟ انت مكنتش تعرفني ؟ ولا حتى دلوقتي , مش فاكر انا مين ولو قولت اسمي . قولي ايه الحادثه دي وحصلت ازاي . زياد : مش مهم الحادثه دلوقتي , انا مش فاكر كتير عنك , اه لأن الحادثه نفسها خلتني افقد الذاكره لوقت معين بس رغم كده لسه مش فاكرك كويس , انا افتكرت انك خطيبه مدحت , مدحت اخويا ذاكرتي متسعفنيش للباقي كانت الصدمه باينه على وشها اكتر من صدمتها اني كنت زياد . نور : انت نسيت كل حاجه بينا , بس فاكر اني كنت مجرد خطيبه مدحت ؟ لا لا اكيد انت بتهزر . من شكلها واضح ان هي تعبت ومسكت دماغها , تقريبا حاسه بدوخه . قالت : ارجوك متكلمنيش عن مدحت وانا خايفه من رده فعله من الي حصل وخايفه ليكون .... ما علينا , المهم انت دلوقتي كويس ؟ قولتلها : كملي كلامك , هو ايه الي حصل ما بينكو , ثواني , افهم من كده انك كنتي ... ايوه , صح . انا كنت على علاقه بيكي من وقتها , وكانت علاقه متطوره الى حد ما , انا فاكر , بس ليه , انا عملت ده ازززاي ؟؟ يمكن عشان كده قت... مكانش ينفع اقولها على الي حصل في الفيلا ولا اني قتلتله بأيدي . حاجه انا مش مصدقها لحد دلوقتي بس ده الي شوفته بعيني . قتلته عشان اقدمه قربان ويمكن كنت عملت كده برضو عشان الحق لو كان اكتشف خيانتي ليه . متوقعش رده فعلها لو عرفت . نور : اه كنت بحبك انت مش هو , انا اتخطبت ليه يمكن عشان اكون اقربلك منه في حين ان انت مكنتش وقتها لسه اقتنعت بانك تتقدملي انا , وخلتني اتجه للاتجاه التاني , بس انا مش , مش مشكلتي دلوقتي المهم اكون معاك انت , بس تقريبا هو عرف , هو مقاليش بس عمل معايا مشكله كبيره وفركش الخطوبه وقال انه هيسافر و مش هشوفه تاني ولا هعرفله طريق . وكويس انها جت من عنده , وزي ما قولتلك متكلمنيش عنه تاني ومش عايز اعرف عنه حاجه . وطبعا الفتره دي انتو اختفيتو فيها .. بس الي اكدلي انه مكنش موجود برضو ان الفتره الي اختفيت فيها روحت اسأل عليه, بس انا كنت عايز اوصلك انت في الحقيقه , قولت اسأل حد من الجيران , خدت بالي من واحد كان واقف قدام الفيلا بتاعتك , كان بيخبط عليها .. لما سألته قالي انك عملت حادثه بالعربيه ومت , وهو جاي يبلغ مدحت اخوك , بس مكانش بيفتح وتقريبا مش موجود لأنه سافر .. قولتلها : تقدري تقوليلي الشخص ده واوصافه ؟ مين ده وليه قال كده ؟ انا كنت اه في حادثه عربيه بس محدش كان يعرف الي حصلي خصوصا اني جيت المستشفى بطريقه غريبه . نور : معرفش يا زياد كان شكله غريب شويه بس كان كبير في السن وكان لابس بالطو وشنبه ابيض تقريبا , ده كل الي فاكراه . زياد : عزاااام ؟ طبعا انا قولت كده في عقلي لكن , ليه ؟ وايه الهدف من الي قاله , كلمني لما كنا في العربيه قالي انه طمن مدحت عليا وقابلو . ذكرى عماله ترجعلي تدريجيا مع افكار وتساؤلات زايده عقلي كان هينفجر وقتها . خصوصا اني بفتكر ذكرياتي مع نور واني كنت بحبها من ورا مدحت وتفاصيل كتيره مش مهم اني اذكرها , و معتقدش اني ممكن اكمل اكتر من كده . نور : معرفتش هو مين ؟ ويعرفك ازاي ؟ قولتلها : ممكن اكون عارفو بس مش فاكره , انا افتكرت فعلا ان مدحت قالي انه هيسافر , بس مجابليش سيره الي حصل ما بينا او لا ... تقريبا حصلت خناقه ما بينا ومشاكل انتهت بأنه قرر يسافر وينقطع عني نهائي . معرفش انهي فيهم الي حصل يا نور بس انا مش فاكر بالتفصيل الي حصل . ردت : اهو غار في داهيه مش مشكله , المهم , ان انت لسه موجود . فكك من كل الي حصل ما بينا سواء وحش او حلو , وخلينا نفتح صفحه جديده , انا واثقه انك مع الوقت هتفتكر كل حاجه عني وهتحبني تاني . ممكن نكمل زي ما كنا عارفين بعض وعلاقتنا كويسه , او نبدأ من جديد وكأننا لسه هنتعرف على بعض من تاني . قوم , قوم دلوقتي يا حبيبي وارجع وانا هاجي معاك , وغير هدومك وحاول تنسى الحادثه بدل ذكرياتك . رجلي كانت متخشبه ومش قادر اقوم , كانت بتمدلي ايدها في اللحظه الي اختارت فيها افضل موجود . بس ابقى موجود مكاني مش في حياتها . قولتلها : مش هينفع يا نور انا مش نفس الشخص الي كنتي معاه , انا كنت شخص وسخ جدا ولازلت , بس هختار اكون وسخ في طريق لوحدي بلاش انا , انتي لو دخلتي السكه دي معايا مش هتطلعي منها سليمه , هتتأذي جامد , زي ما اتأذيت انا وممكن قدام يبقى اسوء . نزلت ايديها وبصيتلي بقلق وقالتلي نور : لا يا زياد , اوعى تسمع لعقلك , انت اكيد قلبك مبينساش مهما ذكرياتك اتمسحت عني , مينفعش تسيبني كده , بعد ما صدقت لقيتك , افتكر كويس . قولتلك انا معاك مهما كان الطريق .. زياد : مش فاكر , مش فاكر ومش عايز افتكر . نور : لا فكر تاني , مع كل حدث بيعدي هتفتكر . زياد : انا السيناريو ده فاكرو كويس , صوتها كان غليط وسامع صوته مع كلمه بتقولها نور . نور : ذاكرتك , ليها صله بالعقد يا زياد . قومت من مكاني وانا مفزوع وزقيتها وقعت على الارض وباين عليها الذعر والرعب مني . زياد : انتي مش بتحبيني ولا الي بتقوليه يمت صله بالحب , انتي .. كل الي عايزاه املاكي وفلوسي وتتحامي في نفوذي , قولتلك ابعدي عن طريق الجحيم الي ماشي فيه والا نهايه مطافك هتبقى زيه . الي بيتكلم مكنش انا بس كان هو الي بيقول كل حاجه , مش حاسس بأي مشاعر تجاه الموقف ولا تجاه نور . يمكن عشان انا فعلا فاضي من جوه , مرضي النفسي او العقد معاه حاكم بخلو المشاعر وعكسها , وفي نفس الوقت خيانتها لاخويا. يمكن في جزء انسان فيا لسه بس معتقدش انه هيكمل قدام . اتكلمت نور وقالت : ياريتك كنت مت , عالاقل موتك كان هينهي علاقتنا بشكل افضل , ساعتها هفتكرلك بس الحلو ما بينا وكل الي انت قولته ده كدب .. عشان انت مش نفس الشخص , ولو مت فعلا وروح تانيه الي بتتحكم في جسمك كنت صدقت اكتر من ان يكون ده نفس الشخص الي وقعني في الغلط معاه , انت الي بدأت كل قراراتك غلط ومكنتش عايزنا نبدأ صح , بل وكملت في الغلط بعد ما نصحتني اقرب من اخوك عشان , انت الي تستغلني مش انا الي استغلك ومع كده انا وافقت , وانت نهيت كل حاجه بالشكل الغلط برضو . قومت من مكاني ساعتها ومشيت , رايح فين ؟ معرفش . بس واثق اني مش هقدر ارجع الفيلا ولا الشركه ولا حتى المعرض. انا فضلت ماشي لحد ما قعدت في مكان تاني في الشارع , هدومي اتبهدلت , شكلي بقا عامل زي المجاذيب , مظهر عمر ما حد يتخيله لشخص زي معاه فلوس متتعدش وغنى فاحش . كان في الي يجي يرميلي فلوس وناس تانيه كانت بتتكرم وتسيبلي اكل . بس انا مكنتش بقرب من اي حاجه من دول . من قله الاكل والشرب حسيت بغياب عن الوعي ونزلت عالارض . عشان ارجع الاقي نفسي تاني في الفيلا , فوقت عشان اتفاجئ بايدي ماسكه ايد لوسيفج ..