عقود روفوسيل - جزء ٢ - تمثال مردوخ
جاري التحميل...
جزء ٢ - تمثال مردوخ
انا عايز اكلم اي حد , اخويا مدحت الي معرفش هو فين او انا بهلوس ولا هو اخويا بجد او توفيق الي على حد ذاكرتي انه كان صديقي في الكليه
حسيت بوخزه في جسمي وبناء مشهد اوضه المستشفى بدأ يظهرلي من تاني . بس المره دي كنت حاسس بحياه حوليا وناس وصوت , دكتور بيزعق للممرضه جمبه وبيقولها : انا مش نبهت تركزو شويه مع المريض ده , لو جراله حاجه انا اول واحد هلبس وانتو كلكو هتتحاسبو حساب عسير لو مات , مينفعش ابدا نسيبه في الحاله دي , في حد دخل وحقن المحلول بماده غريبه انا معرفش لولا اني لحقته كان ايه الي ممكن يحصل , بدلو المحلول ده وودوه لقسم التحاليل . ردت الممرضه عليه وقالتله : انا معرفش يا دكتور انا اتفاجئت بعد ما دخلت انه فاتح عينيه على اخره وجسمه متلج . عمتا هنبه على الامن ان محدش يخش غير لما يتعرف هويته مع ان معرفش ده حصل ازاي . جات ممرضه تانيه وقالتله : يا دكتور , الامن الي في غرفه الكاميرات بيقول ان محدش دخل الاوضه وانها اتفتحت من جوه .. : يعني ايه ؟ المريض الي قام فتح لنفسه يعني ورجع تاني السرير ؟ ما نعقل الكلام . فتحت عيني في اللحظه دي ولقيت الدكتور بيجري عليا وبيقولي : انت بخير يا استاذ ؟ حاسس بأيه دلوقتي ؟ مقدرتش اقوله حاجه غير اني , اني محتاج تليفوني . انا عايز اكلم اي حد , اخويا مدحت الي معرفش هو فين او انا بهلوس ولا هو اخويا بجد او توفيق الي على حد ذاكرتي انه كان صديقي في الكليه واشتغلنا مع بعض كتير مع شخص اسمه عزام , مع اني غير متذكر ماهيه الشغل . طبعا الي انا سمعته عن اهلي الي ماتو يمكن محركش مشاعري في الوقت الحالي , معرفش ليه الحقيقه .. الدكتور بصلي باستغراب وقالي : بص يا استاذ , انت جيتلنا مكانش معاك تليفون , كل الي معاك كان شنطه صغيره فيها مجموعه ورق , لو اقدر اساعدك بحاجه تانيه اؤمرني . قولتله : متشكر جدا لحضرتك , ممكن طب الشنطه . رجعلي الدكتور ومعاه شنطه قربها مني وانا كنت قادر احرك الى حد ما ايدي. استأذن الدكتور وخرج وانا بصيت للشنطه الي مكذبتش لوهله انها هي . كانت شنطه توفيق . ممم ما ماعرفش معنديش جواب , انا لقيتها معايا , معرفش ايه الي جواها . او كنت اعرف , الدكتور بيقول ورق . فتحتها وانا عيوني مليانه فضول اعرف , اعرف ايه ؟ انا لقيت تمثال , وبعدين في الليله السودا دي , ليه توفيق نسى معايا حاجه زي كده ؟ لما ركزت في تفاصيل التمثال كان لشخص ادمي لكن بأربع عيون واربع اذان , ماسك قوس في ايده الشمال ومطرقه في ايده اليمين مش ده الي اثار فضولي على قد ما خدت بالي من جمله مكتوبه بالطول في ضهر التمثال . لغه غريبه ومش اي حد طبيعي في موقفي هيفهمها , لكن انا كنت قادر افهمها بالرموز المكتوبه . " والي فيما معناها : " ارض في حمايه مردوخ " Araš ina pazzu Marduk دي اللغه الاشوريه لغه الاكاديين القديمه . افتكرت الهماسات الي سمعتها وانا كنت بسترجع الاحداث الي حصلت في العياده بتاعتي . الهماسات كانت بنفس اللغه دي . حطيت التمثال في الشطنه بسرعه , معرفش ازاي محدش خد باله من الي في الشنطه خصوصا الدكتور انا ممكن اروح في داهيه في حاجه زي كده . مش يمكن يكون توفيق كان قاصد يسيبلي التمثال ده ؟ بس ليه ؟ انا ذكرت اني كنت فاهم اللغات القديمه بحكم شغلي مع شخص اسمه عزام . وانا كنت غني جدا بس رغم كده انا كنت شغال في مهنه الطبيب النفسي . والي ورثته من اهلي كانو مبلغ مش كبير على ما اتذكر او ممكن يكون في حاجه تانيه معرفهاش بس ده كان ولا حاجه قصاد الي كسبته مع عزام , ايوه , انا كنت شغال مع تاجر اثار اسمه عزام . ............. جسمي كان في الاول متكسر بالاخص رجلي نتيجه الحادثه بس حسيت اني قادر نوعا ما اتحرك , وكأن في حاله استشفاء سريعه مع مرور الوقت وقدرت اقوم من على السرير , سامع من بعيد صوت الدكتور بيتكلم مع الممرضه بحذر . الدكتور : انتي قولتيلي ان في حاجات غريبه المريض بيعملها وهو نايم يا ياسمين , بس االي انتي بتقوليه ده كلام خطير جدا وممكن يقلب المستشفى واحنا مش عايزين مشاكل . الممرضه : والله يا دكتور سمعاه وهو نايم بيقول كلام تماثيل مدفونه ولازم يطلعها وساعات بيوصل كلامه لتخاريف زي كيانات سفليه بتحرسهم , انا مش فاهمه بجد الجدع ده وراه ايه ؟ اللهم احفظنا من الناس دي .. الدكتور : ياسمين , متتكلميش في الموضوع ده مع حد وعايز عينيك عليه , انا اول ما جالي المريض ده كان مرمي قدام المستشفى ومعرفش وصل ازاي .. هي رمي بلاوي .. روحيله دلوقتي واتاكدي انه لسه مكانه .... انا بعدت عن الباب بعدها ورجعت تاني للسرير , انا ازاي لساني فلت وقولت الكلام ده , انا حتى مش فاكرو , بس انا فهمت ليه الشنطه مكانتش غريبه بالنسبالهم .. انا لما قربت تاني من الشنطه مكانش فيها تمثال ولا اثر لوجوده , يعني قصه توفيق دي كانت بلا معنى ولا ايه ؟ بس مكان الشنطه لقيت مجموعه اوراق مكتوبه , ومن بين كل الورق رسومات دقيقه لمداخل ومخارج مكان او بلد , يمكن اكون روحتها او معرفش مين الي راحها . وبعدين بقا ؟ كل ورقه من الي موجوده كانت بمثابه روابط مفقوده بالذكرى الي انا كنت فيها تقريبا , انا كنت ايه بالظبط قبل ما افقد الوعي ؟ . _________________ بالخط العريض في اول ورقه " كفر طموس " , بدأت افكر في كل حاجه توفيق قالهالي , تحديدا لما اصر انه يضمني للمهمه دي وكلمني تاني , بس من ضمن الحاجات الي ذكرها كانت عن عزام بيه واقاويله الي بتشرح احتواء قريه طموس كميه ضخمه من الاثار .. تحديدا من الحضاره الاشوريه والي كانت اثار ناتجه لمحاوله استيطانهم مصر في القرن السابع قبل الميلاد ومن احدى اماكن الوجود الاشوري فيها كان الكفر ده , كانت اخر كلمات اتكتبت من توفيق . حاسس بنوع من الارتياح ممزوج بفضول قاتل اني عايز اعرف ايه القريه دي , وايه الي انا اعرفه اكتر من كده ومش فاكره . بدأت عيني تحرقني بشكل مفاجئ حرق ولد دموع غزيره.. والمشهد اتحول لضبابيه بعد ما كان نظري اتحسن ومبقتش شايف حاجه .. بس حسيت بتبديل في كل حاجه حوليا اركان الغرفه اتبدلت لمكتب غريب قاعد عليه شخص ملامحه مطموسه . : اهلا برجوعك يا وحش , كان نفسي ميبقاش الاشتياق ده موجود وتكون موجود من الاول بس انا عارفك كويس لو عرفت قيمه نفسك بتبعد عن الي عيشوك في عز . عموما انا مش هاممني كل ده , اهم حاجه العمليه الجايه وانت عارف كويس هتكون فيها ايه ودي الحاجه الي خلانا اختارك وسط رجالتنا وكمان اميزك عنهم . انت الوعاء الوسيط يا زياد , توسطك ما بينا وما بين الكيانات الاخرى زي جن الرصد واي كيان بيحرس كنز , اكيد انت عارف نسبه خطورته لو فشلت تكون وعاء , واحتماليه انك تموت تبقى ازيد , انا ليه بقولك الكلام ده وكأني اول مره اقابلك , انا حسيت فيك غيابك ممكن ينسيك كل المقابر الي طلعنا منها كنوز وحبيت انك تستقل ويمكن تشتغل في السر , بس لو حاجه زي كده حصلت انا اكيد هعرف .. وزعلي هيكون جامد , كان لازم افكرك المره دي بالاخص لأنها رحله صعبه . ومحتاجه مجهود كبير , وتعاملك مع كيانات اكبر وكنز الأشور المدفون منقدرش نقدره من كتره وده كلام البركه بتاعنا الكبير , الضو .. كنت ممكن اقول الفوكس اشتغل وسط الضبابيه الي قدامي لو مكانتش دي عيوني الي بتشوف المشهد , الملامح كلها وضحت قدامي عن الشخص الي قاعد وماسك سيجار بيطلع منه دخان بيكون مشهد ضبابي تاني .. بس انتو فاهمين انا قصدي على مين الي قدامي .. وانا كا مشاهد بشوف نفسي الاخرى بتقوم وبتتكلم : انا مقدر كل الي انت قولته يا عزام بيه , محتاجك تفهمني اكتر عن الكفر ده وشيخ الكفر الي اسمه الضو ده .. مفتكرش انه شارك معانا غير في عمليه قبل كده في اسوان ونجحت بس رغم كده وبعد المسافه عن المنطقه الي هو منها .. بس راح للعمليه اياها الي بعيده وساب المكان الي هو اصلا منه مفكرش يقربلها ولا يستعين بينا غير دلوقتي , ومش معنى انت وثقت في الضو بسرعه مع ان انت عارف قصته . عزام : اه , انا عارف انك هتسأل , بس الضو ده رغم انه شخصيه انت مش هترتحلها الا انه الشخص الوحيد الي يقدر يتعامل بالطقوس المطلوبه مع كيانات اغلب السحره ميقدروش عليها , الا وهي اهل الارض . مفتكرش حد قدر يسيطر عليهم زي ما بيسيطرو على الرصد ولو ان جزء من الرصد ممكن يكون من اهل الارض وده وارد بس قليل , لكن انت في طموس هتتعامل مع اهل الارض بشكل صريح . زياد : بس يا عزام باشا الغلطه بفوره , اقل غلطه وغلطه واحده , عملها الضو ضيعته .. القصه المنتشره عنه فتح بوابه الغضب ما بين اهل الارض والقريه وحصلت مجزره قتلو فيها تلت اربع اهل القريه . عزام : غلطه الضو الوحيده يا زياد انه مستعانش بوعاء كويس ونتيجه كده مات وعاء الضو وكتير جدا من اهل القريه .. وهتسألني ليه مماتش هو مع انه كان سبب الفوضى دي , بس كان قوي جدا لدرجه انه مجند خادم من خدام اهل الارض . وعشان كده انت لازم تبقى موجود عشان الضو من غير وعاء ملهوش قوه كامله . زياد : انا لو غير جاهز يا عزام باشا مكنتش جيت , انا فعلا معاك فيها مفيش مره فشلت ومش دي المره الي هفشل فيها , كتير نزلت قبور بس موتك ده هو نتيجه لشكك انك هتموت ويفشل الميثاق, عزام : واثق فيك يا زياد , معادنا يوم الحد . انتهت المحادثه برجوع الضباب من تاني ويتبدل المشهد للغرفه الي كنت محجوز فيها , مع الاوراق الي في ايدي والدموع الغزيره الي نزلت نتيجه احساسي بحرق في عيني , بس دموعي الي نزلت على هدومي خدت بالي انها دم , حطيت ايدي بسرعه مسحت وشي , كف ايدي كله ملطخ دم . انا اكيد مش لسه في الحلم او المنظور الي كنت بشوفه ده عشان اتوهم انه دم , ده فعلا حقيقي . حاولت اقوم من مكاني , اعتقد مش محتاج اقعد في المستشفى اكتر من كده لأني بقيت سليم , على الرغم من ان في كسور , انا محتاج اتطمن على مدحت , عايز اعرف فين اخويا زمانه قالب الدنيا عليا دلوقتي . بس في نفس الوقت انا ممعيش اثبات ولا اي حاجه اعرف بيها انا كنت ساكن فين واوصله ازاي ؟ حتى تليفوني مش معايا , وقفت على رجلي وانا بقرب من الباب , فتحت عليا الممرضه واتخضت لما شافتني , قالتلي : هو انت ازاي واقف ؟؟ انت مفروض رجلك مكسوره ومتجبسه كمان , اتفضل يا استاذ ارجع لسريرك, قولتلها : لا مش هرجع , انا في حاجه عايز اعرفها , انا جيت هنا ازاي ومين جابني ؟ : يا استاذ زياد احنا لقيناك مرمي قدام المستشفى, منعرفش فعلا مين جابك زياد : وانتو عرفتو منين ان اسمي زياد ؟ انا مقولتش اسمي انا جاي بدون هويه زي ما بتقولو , ومش هسكت غير لما اعرف انا ازاي اترميت قدام المستشفى , ومفيش حتى كاميرا مراقبه تعرف مين جابني . : بس انت عارف مين جابك يا زياد , عارف كويس بس بتحاول من جواك تنكر ان مش هو , وده دليل انك بدأت تفتكر كويس جزء من ذاكرتك . حسيت بصاعقه ضربت عقلي فجاه , خادم , عقد , مين ؟ انت الخادم ؟ ردت عليا الممرضه بخوف وقلق : استاذ زياد عموما انا جاي اقولك ان في حد عايز يزورك ودي اول زياره ليك من حد بيقول ان اسمك " زياد كمال التاجي " . وقال على وصفك بالظبط وسنك 28 سنه بس طبعا مش هتخرج غير لما نتاكد من حالتك ..