جزء ٩ - سر اللوحات الثلاثه

الضو : بيقولو اللوحه دي انتشرت في فتره العصور الوسطى مع مهالك مرض الطاعون والمجاعات الي ابادت شعوب , موت بيتجسد في طرق مختلفه وعديده لقتل الملايين , وممكن تكون انعكاس ليها .
لوحه " انتصار الموت " the triumph of death "
للرسام  " بيتر بروغل " فعلا ,
" الموت الجانب المنتصر الوحيد الي بيستقبل مهزوميهم في حفل انتصارهم , تحت الارض  وسط باقي المدعوين  " .
كان من اغبى افكار الغرب هي فكره تحديهم للموت واي عائق يواجه الغرب كانو يجسدوه , بحيث تجسيد الموت بالنسبالهم كان كيان قابل للموت وده شئ يضحك الصراحه .
بدايه من الميثلوجيا اليونانيه وتخليد البعض لاساطير مثل تحدي هرقل ل hades اله الموت , حتى الموت نفسه والعالم السفلي المحكوم من
اله العالم السفلي " ثاناتوس " , اتقيد باغلال في سجنه السفلي المحكوم منه عن طريق اسطوره سيزيف والي قام بتحدي الموت وحبسه في العالم السفلي ..

هل الاساطير سلطت الضوء على تجسيد الموت  والسيطره عليه لوضوح عدم الهيمنه الابديه من الموت علي بعض المستثنيين ؟   يليها انقلاب المحكوم على حاكمه واختلال التوازن ... زي ما قولتلك اغبيه , محدش يقدر يتحدى الموت , بس في اسباب تانيه , اسباب بسعى ليها بشكل شخصي في امور البعث من الموت , بس بدون الروح السابقه , عارف ان هي غلط , وان مش نفس الروح الي بتبعث ,  بس انا مضطر اني ادور فيها ..

اوزوريس , اله الموت والبعث في الميثلوجيا الفرعونيه , اتقتل واتقطع اجزاء واشلاء من قبل اخوه " سيت " الا انه اتبعث للحياه من تاني , بس انا ورا ابحاثي الي قضيت فيها سنين بعتقد انه ممكن , التحنيط والتقطيع لاشلاء والسحر الاسود .
كلها رمزيات لو ربطت الخيوط ببعضها هتكتشف ان في امكانيه للاستعانه بنوع من السحر اسمه النيكرومانس بتستخدم لاستنطاق الموتى , مش بسعى للمثاليه ,  بس عايز احقق هيكل الفكره ..
زياد : يا شيخ ضو , سحر النيكرومانس على حد علمي , مش , مش حقيقي .. او زي ما بيقولو اسطوره زي باقي اساطير الميثلوجيا ..

الضو : العلوم المدفونه هتفضل اسطوره لحد ما تخرج متراصه في احضان العلوم الاخرى , عقود من الزمن قضيتها في قرايه ودراسه كتب السحر , الا ان العلوم المدفونه كانت هي المدخل لتحقيق الي انا عايزه دايما ..
انت لسه يا زياد متعرفش حاجه هنا ..
زياد : كلامك بيشير ل كتب سليمان المدفونه ولا انا فهمت غلط ؟
الضو : الثروه الحقيقيه كانت فيها ثروه من مجموعه ورق اقيمت عليها حروب , من بعد انتشار اقوال عن الكنز المدفون لسليمان , فرسان الهيكل ودول كبرى وراها ومنظمات حاولت تسبق في البحث عن الكنز , الى احدث قرن احنا فيه بعض من مسببات حروبها الحاليه من الكنز , ممكن يكونو حصلو على جزء منها لكن مش كلها ..
زياد : والبعض من كتب العلم الباطني منسوبه لسليمان وهي في الاصل لا تمت بصله , حاجه من قبيل سحر التنين الاحمر الي استحضرت منه لوسيفج ..
الضو : فعلا , بس نسخ كتيره من الغير منسوبه مستوحاه من الاصليه , اصعب حاجه قريتها في رحلتي للمعرفه العلم الباطني  , واخطرها ..

قولت في دماغي كا زياد , رحلته للمعرفه ؟
هو مش ده كانننن ...
لوسيفج  : فاوست .
زياد : ايوه , هو ممكن يكون الضو سلك منهج فاوست , ويكرث حياته للمعرفه وصولا للنقطه الي بنتكلم فيها !
كمل كلامه وقال :
الضو : وخطرها يكمن في اقل غلطه من طقوس تنفيذها تؤدي للموت  واحيانا كبار السحره والباحثين ماتو .. عبدالله الحظرد بنفسه في رحله كتابته للعزيف  مع استخدامه لبعض العلوم الباطنيه زي النيكرومانس مستحملش قوتها ومات مقطع اشلائه واطرافه .. وغيرو من كل من ساهمو في استخدام السحر الباطني..  اقل غلطه وعدم تحملهم للقدره الحقيقيه للسحر موتتهم بنفس الطرق ..
عارف مين الي قتلهم ؟
زياد : اهل الارض .. نفس الموت الي بيتعرض ليه اهل الكفر ..

الضو : وهو السحر الباطني الي لازم نستخدمه في التعاقد مع اهل الارض ..

خلص الضو كلامه , وانا مندمج مع شباك الغرفه المطله على الارض الفاضيه , شايف بعض من الثغرات الي خرجت منها ايادي الكائنات الي شوفتها , بس كانت اكبر شويه وخارج منها راس مشوهه , يليها جسم انثوي , شكل انا شوفته المره الي فاتت بس مركزتش في تفاصيله زي دلوقتي ..
رجل مكسوره والتانيه سليمه , العرجاء ..
بتبصلي بنظرات ثابته , مش قادر اتحرك وجسمي اتجمد , في نفس الوقت معنديش القدره ابعد نظري عنها , لاحظت انها كانت بتنزف , رداء ممزق من القطن بيغطيها بتظهر عليه بقع من الدم في اسفله  ,  ايه قصتها ؟

الضو : تعبتك معايا يا زياد , انت راجع من السفر وتعبان , وهوريك الباقي بعدين , اهلا بيك في دوار شيخ الكفر او المتحف زي ما بسميه ..

قولتله : انا ممكن اخرج بره شويه او الف وممكن ادور على بيت قديم مفيهوش ساكن انام فيه , استأذنك .
 
مسك ايدي بقوه وقالي : مش هتمشي , انت دخلت الدوار في اماكن كتيره كافيه , وبعدين انا مش بدخل اي حد هنا واهالي الكفر بيجولي لكن مش بيقعدو , الوقت ده محدش بيخرج و ومنعا كمان لظهور اهل الارض ..
ده الوقت بتاعهم ..
زياد : متشكر , على حسن استضافتك ليا يا شيخ الكفر ..
بس احنا نازلين على سلالم كتيره هو احنا فين ؟

الضو : السلالم الي بننزلها هتودينا لغرفه السرداب تحت الارض  , هي مش سرداب على قد ما هي غرفه مناسبه لحاجات كتير منها انك هتنام فيها .
بس زي ما كل بيت وليه قوانينه , الغرفه دي بالذات ليها قاعده مهمه جدا ..
دخلنا الاوضه الي تحت الارض , شكلها كان مرتب وباين عليها المظهر الراقي , مش كان الي في دماغي ..
بس استوقفني حاجه قابلتها في وشي , وهي باب معدني في الغرفه على الرغم من وجود الابواب الخشبيه في الدوار كله الا ده , باب معدني مقفول باحكام مفيهوش نفاذ للضوء ولا اي مجال للرؤيه انك تشوف ايه الي وراه ..
شاورلي الضو عليه وقالي :  قاعده مهمه جدا , انك متفتحش الباب ولا تحاول تسأل وراه ايه .. مش لمصلحتي لكن لمصلحتك انت وهتعرف قدام استخدامه ..
سابني في الاوضه , بطابع الفضول الي زاد ونمى عندي من بعد الحادث , وهواجس بتقولي افتحه , لكن مش هعمل كده ..
الغرفه كانت متبيضه بلون طبيعي ابيض وازرق وبعض التدرجات الاخرى .. باختلاف باقي الغرف وقاعه الدوار الي لونهم اسود ..
غرفه طبيعي بتضم سرير ودولاب ومرايه ..
كنت حاسس بتعب واول حاجه عملتها اترميت على السرير ..
ملحقتش احط ضهري على السرير دقيقه غير ولقيت الباب بيفتح ودخلت سيده من الواضح انها الخدامه وفي ايديها صينيه اكل ..

قالتلي : شكلك هفتان ومكلتش , اتفضل , ولو احتجت اي حاجه انا تحت امرك ..

شكرتها على تعبها معايا وكانت هتتلفت وتطلع بس رجعت تاني وبصيتلي , في نظرات قلق وحيره ورجعت بصت على الباب المعدني ,  ولفت طلعت بره الاوضه .. مفهمتش غير ان في حاجه ورا الباب ممكن يكون فيها خطر عليا ..
بس مكنتش خايف بصراحه , بتفاجئ لكن ممكن انام عادي ..
اكلت , ورجعت احاول انام .
صمت , مفيش صوت حتى دقات قلبي الي بسمعها اختفت ..
النور كان مقفول بس لاحظت الساعه المتعلقه على الحيطه , مش سامع صوت عقاربها , عقاربها مش بتتحرك عن 12..
كنت حابب بيئه الهدوء لكن في نوع هدوء تاني يحسسك بأزعاج لغرابته .
فوقت من نومي , مش من الهدوء بس قطع الهدوء ده صوت خطوات , خطوات ثابته  ..

زياد : لوسيفج , مش محتاج انك تحضر في المكان ده تقدر تكلمني عادي ..

ل.ر : التجسيد ده شئ تاني غير تجسيدي  ..

زياد : لما مكنش انت اومالل...  فجاه صوت الخطوات وقف بعدها سمعت صوت ارتطام بالارض او حاجه وقعت ..
يليها صوت زحف على البلاط .. الحاجه الي سمعتها بتمشي دي وقعت وزحفت ..
سمعت صوت انثوي مبحوح بيقولي : ساعدني , رجعني .

بتحاول تتكلم وكأن لسانها تقيل , صوت .... صوت جاي من على شمالي , تحديدا الباب المقفول ..
الحححححققققنااي , مششش مش مش, مش قادره افضل , مش قادره افضل هناك ..
قول , قولهم اني , مش هسامحهم ..

زياد : انتي مين ؟   هو انتي حد حبسك هنا ؟
طب انتي فعلا محبوسه ولا , ولا ايه انتي اكيد مش انسانه ..
سمعت خبط على الباب وقتها , اتحول لخبط عنيف .
وسكت فجاه , ورجع الهدوء المريب ده زي ما كان ..
نمت , اه نمت .. رغم كل الي حصل ..
كنت غفلت في النوم , جمب ودني في صوت حك , خروشه ..
المرتبه الي نايم عليها زي ما تكون بتخروش , لا ..
ده صوت حك ضوافر في المرتبه ..
فتحت عيني  اول حاجه شوفتها شعر قدامي ...
جسمها جمبي وايديها بضوافرها الطويله بتقطع في المرتبه ..
شعرها الطويل , جلد وشها المسلوخ وجسمها الهزيل ولبسها المتقطع ..
هي .

: ههههه , قول..قوللهم, مش هسام , مش هسامحهم , هتمو, هتموتو كلكم ..

اتنطرت من مكاني وقعت على الارض وانا مخضوض , ازاي العرجاء دخلتلي جوه ..

ل . ر : متخافش , مش هتقدر تأذيك في حاله الطيف, انت بره نطاق الاذيه ..
لما رجعت بصيت عالسرير مكنش في حد موجود  ولا اثر لخدوش المرتبه ,  ايه ؟  اتبخرت زي ما بيحصل في الافلام ؟

الحقيقه اني سمعت صوت الزحف بيبعد وصوت طقطقه عضم ,  ورجعت صوت الخطوات من تاني بعيد , زي ما تكون رجعت خلف الباب  الحديد  وهربت . 
كان عندي احساس شديد بالتعب والارهاق واحتياجي للنوم , غصب عني نمت .  
حتى النوم مكانش فيه راحه ليا , احلام كتير متداخله , مش عارف ايه علاقتهم ببعض , اضغاث او رؤيه من الماضي , معرفش .
حلم كان ليا وانا راكب عربيه متجهه لحاره ضلمه واقف فيها شخص شاب متوسط العمر .. ملامحه بتبين انه سرسجي  وبني ادم معمر في الشغلانه , جروح في وشه وشعره طويله وهايش , ضوافره الطويله .
قرب من ازاز عربيتي وقالي : انت كلمتني , وانا حضرت , احنا اتفقنا 20 جرام من كل صنف نختبره ,  بس انت عارف اسلوبي انا والريس صاوي  بنحب نعاين قبل ما ناخد .
زياد : حقك , مش هعارضك عشان كده لازم تبص عالعينه بنفسك
وانا كا شخص مفروض امن نفسي مجبتش اي عينه معايا .
هتقولي تبص عليها فين , لازم تشرفني في بيتي المتواضع .. الماده الي بكلمك فيها غاليه جدا بس هديهالك بسعر رمزي لاني اول منتج ليها ومأصدرتهاش لسه , وجربت تأثيرها , وهم يا سيد..
سيبك من الاستافات التعبانه دي , الي معايا ده واثق منه وتقدر بعد كده تبيعها بسعر عالي , انا مش مستفاد اوي  منها في الوقت الحالي ، يعتبر فتره تجريببه اشوف مدى استجابه الناس للمنتج وقدام بعد فتره مش قليله اقدر استعين بالماده بتاعته في حاجه تخصني ، تكونو انتو استفدو من ارباحها في صفقات كبيره ..
جاهز ؟
اتحرك الي اسمه سيد  وقالي : مممم , طب انا هاخد كام راجل من رجالتي ونشوف الحوار ده , زي ما انت عارف , انا لسه مش ضامنك .
نادى الشخص ده على كام حد ظهرو فجاه من الحاره وركبو العربيه وركب ساعتها معايا ..

زياد : اوعدكو ان انتو اول ناس هتجرب منتجي ده بعد الخطوه النهائيه , وهتتكيفو منه عالاخر احنا مش بعيد , يدوبك طريق ساعه وهنكون هناك ..

اتبدل المشهد للفيلا وانا بخشها ومعانا تلاته من ضمنهم الواجهه بتاعهم .
كانو بيتوزعو في الفيلا , منهم واحد اسمه حماده  اتكلم وقال : ما شاء الله ايه بس , ايه ده , يراجل كنت تعمل معانا جميله من الاول ونشد احلى جوانين في الفيلا الحلوه دي , شكلك قاعد لوحدك يعني نونسك بالمره ولا مش لوحدك ؟
رد سيد  عليه وقاله : ركز يا حماده في الي جايين عشانه , افهم , لو خدنا الماده دي هتكبر تجارتنا بشكل كبير ونجيب احنا قصور مكانها .
قولتلي يا معلمه تأثيرها عامل ازاي ؟

زياد : تأثيرها , اه قول مش هتحس بأيه بعديها , الماده  دي ليها طابع واحساس جديد  بالقوه والامتلاك في نفس الوقت هادي , كأنك , عارف لما تكون مش انسان بس حاجه اكبر من كده .. القوه هتبقى في ايدك في اللحظه الي انت فيها بس , واوقات المده بتطول ..
حماده : ايه يعم احنا هنكفر  ؟, بس فاهم قصدك ,
ايه رايك يا هيما   ؟
رد ابراهيم من جمبه : جربت كتير زيها كلهم بيقولو كده برضو في الاول بس زي ما قولتلك مش هندفع عالعينه الي هناخدها منك لو عجبتنا هنتكلم في سعر كويس ..

قولتلهم : موافق  .
اتحركت ناحيه المطبخ وطلعت كام برطمان وفضيت كل حبه منهم على بعض  وقلبتهم , انا محضرهم في الاساس بس كان لازم ادمج الكام مكون دول عشان يوصل التأثير الي عايزه ..
انا مش وظيفتي ولا هوايتي تحضير المركبات والطبخ في الأبيض , بس حبيت اجرب جزء او نوع من المخدرات المذكوره في كتب السحر , بشكر جدا كتاب ساهم في استغلال الاعشاب بشكل احسن من كده , بالاخص عشب  " البروغمانسيا " .
بيشتق منه نوع من المخدرات بيسمى" بالبوق الشيطاني " الي في الاصل اتسمى على اسم النبات نفسه والي واخد شكل البوق مع تأثيره الشيطاني في الهلاوس تقدر تقول عليها , بتوريك جزء من العالم التاني وتجذبك ناحيته  ..
زودت معدل السموميه في عشب البروغمانسيا عشان اضمن انهم يموتو بعدها , انا ليه عملت كده ؟
هو انا هموتهم كلهم ؟ وهعمل بيهم ايه ؟

زياد : احلى رجاله منورنا والله , تقدرو تتفضلو دلوقتي .

اتكلم حماده وقال : مش مقتنع اوي يرياسه  بالجرامين تلاته دول  يعملو عشرات الالوف ,
انت سعرت بناء على ايه بقا يا ريس ؟ احنا اتفقنا تعمل  الواجب معانا ..
زياد : جرب وشوف تستاهل السعر ولا لأ , نوع النبته الي استخدمتها نادره جدا وده يخلي زراعتها صعبه لانها محتاجه مناخ وفتره كبير بس اقدر اجيبها واتصرف فيها , لكل حاجه سعرها ,
وانا واثق انها هتعجبكو , هتودي وترفرف بروحك فوق وجسمك في مكانه ..

ابراهيم : هههه , تعجبني يا زميلي , انت شكلك فاهم  , تصدق , لا استنا ,  اااه ايوه اهو الشمه الاخير ..
ابراهيم جرب والباقي وراه
كلهم وقعو في الفخ وجربو الا واحد , سيد .
سيد : بعد ازنكو يرجاله لما يخلص تأثيره   هبقى  اجرب , انتو فاهمين بقا مينفعش يبقو كلنا مره واحده .
قولتله : خايف لاعمل فيكو حاجه ؟  عادي براحتك , انتو تلاته  في بيتي وانا لوحدي ..
بس شكلهم متكيفين اوي .

بدأ حماده تظهر عليه بعض قطرات العرق .
حماده : انا , عطشان اوي , ممكن ميه يا ريس معلش , اه انت مين ؟
ايوه انت , انا بكلمك يجدع .

سيد اتكلم وقال : ده بدأو فعلا حماده بيكلم البلكونه .

حماده : ولا يا ابراهيم , شايف ياد , في راجل قصير جدا قد ركبتي كده واقف في البلكونه , ايه ده , ايييه , ازااي.
ابراهيم : مالك يا .....  ايه ده  ؟ في جته في السقف ..
حماده : لا يغبي قدامك الراجل اهو بيطلع على سور البلكونه وبيعوم فوق ولا بيطير ؟ , يبني الحرااام , اخد بضاعتنا وبيعوم بيها يا ابراهيم .

زياد : جت اللحظه الي كنت مستنيها وعيونهم زي ما تكون مبحلقه وهتخرج من مكانها يليها مرحله احمرار في الجلد وتشنجات عصبيه .
روحت مسكت سيد من وراه وطعنته بشفره حاده طويله طلعتها من ربطه شعري ..
دمه سال في كل حته قدامهم وهما مش حاسين ولا شايفين غير الكيانات نتيجه الهلاوس او هي مش هلاوس , هما شايفين عمار البيت ..
حاول في الكام ثانيه يمسكني بس وقع على الارض بعدها ومات .
حماده ده قام وهو بيتشنج وبيجري ناحيه البلكونه الي كان بابها مفتوح وطلع على السور .

حماده : انت الاع البضاعه تحضر لأحسن قسما بالله عقطعك وقتي    ,  انزلي انت , انا مش طالعلك , ولا اطلعلك ؟
قاله ابراهيم  : طب ما تطلعله , بدل ما دماغك بس الي في الطالع..
حماده : بس انا مبعرفش اعوم , ولا بعرف ؟
ابراهيم : ولو بتعرف تعوم يا روح امك هتطلعله ازاي  ؟
حماده : ايوه صح وجه نظر برضو , بس بعرف اطير ..
رمى حماده  نفسه من البلكونه .

ومن بعدها ابراهيم وصل قمه سطلانه  وقام دخل الحمام وبطنه قلبت .
دخلت الحمام وراه عشان الاقيه واقف بيشاور على حد في المرايه زي ما يكون بيشتمه بعديها كسر مرايه الحمام .
اخد حته من ازاز المرايه وغرزها في قلبه .

بسسس كده خلصنا من التلاته , سحبت الجثتين الي في الفيلا وخفيتهم في القبو بعد ما فصلت راس واحد فيهم عن جسمه .
مكنتش مقلق من الجته الي وقعت من البلكونه , صوت وقعته بس الي ظهرت  ..
كما ان لما نزلت لقيته كان لسه بيفرفر وبيطلع في الروح في صمت  ..

ههههه ,اما  اسم على مسمى فعلا , البوق الشيطاني  .
لما يجيله نداء الموت بس لسخريه القدر  وموته يبقى بالي كان بيبيعه .
سحبته لجوه هو كمان معاهم وقفلت عليهم البدروم .
انا كنت واقف بتفرج على نفسي في ذهول ,كانت البدايه , قتل وسحر ,  مرحله من مراحل نمو نبته بدأت من جزورها وبراعمها وصولا لراس نبته شيطاني , نبته رمى بزورها الشيطان عشان يرجع يقطفها تاني ويستخدمها في وصفته ..
الحلم الي كنت فيه مكتفاش بكده بس اتبدل المشهد لمكان تاني ..
يارتني كنت فضلت فاقد الذاكره , كل مره بفتكر بتعب اكتر .