جزء ١٠ - مذبحه العرجاء

كافيه فاخر مطل على النيل من الواضح انه مش ناس كتيره موجوده .
قاعد على تربيزه مع واحده قدامي لابسه دريس قصير وملفت وشكلها كان مختلف اوي عن الي شوفته قبل كده , قمه في الجمال , ولا شعرها الحرير الي نازل على عينها , افسد كل الملامح دي سيجاره في ايديها واخدت النفس من هنا  وطلعته في وشي .


زياد : اتكلمنا  كتير يا نور , انت عارفه ان مدحت دوقتي هيبقى متولي امور الشركه فتره لوحده بسبب اني سيبت كل حاجه , عايز اخد فتره نقاهه , ولولا المشاكل الي ممكن اسببهالك كنا سافرنا مع بعض .
بس مظنش ان ممكن نتخطى الأمور دي دلوقتي , محتاج نبقى اقرب لبعض اكتر , يعني .
نور : متقولش يا زياد , اخيرا هتخطبني , ولا اكيد مش الفكره الي قولتها قبل كده , اتمنى تكون انك اخيرا هتعمل الي في دماغي ووعدتني بيه .
مينفعش , مش عايز اكسر بخاطرك مره واحده , انتي عارفه اني دبش , زائد المشاكل الي عندي الفتره دي وارق , الحل للفتره الي جايه  دي , مدحت , لازم تقبليه .
ولو مقبلتيش مدحت بعد ما يتقدملك هتبقى مشكله عليا اكتر لاني محتاجك دايما في الفتره الي جايه قريبه مننا متبانيش قريبه مني انا , وانتي عارفه انه كان على كلام ما بينك وما بينه من سنين ..
غريب , حاجه مش منطقيه ان اخو الشخص الي بتحبيه هو الي يتقدملك وتقبليه وتحبيه بعديها نرجع لطبيعتنا من تاني .
بس ده الي هيحصل , لازم تباني زوجه اخويا لأني هعمل حاجات كتير مينفعش ترتبطي انتي بيها ولا يكون ليكي علاقه بيها , والا هتروحي معايا في الرجلين .

نور : عايزنا نكمل في الحرام يعني , طول عمرنا ماشيين فيه بس , معتقدش ان النهايه تبقى كده يا زياد , في الاول وفي الاخر هفكر ليه متكونش انت ليا بشكل رسمي , والي بتخطط ليه ده انت مش عايز تقولهولي , انت هتعمل ايه بالظبط ؟ يمكن اساعدك .
غسيل اموال ؟  يعني , عارفه انك بتستثمر في حاجات كتير تخفي بيها الي بيجيلك .
ولا ممكن  بتاجر في المخدرات ؟ صح ؟
زياد : بالظبط , مش هكدب عليكي "
او اكدب , بيني وبين نفسي  كان لازم منكرش ولا تعرف قصه الاثار وشغلي مع عزام "  فا اديها مبرر قابل للتصديق عن حد تاني في موقفي ممكن يقوله ..

: بس انتي مدمنه قديمه يا نور , مش عايز افكرك , انتي متعافيه من فتره ,  ومش هينفع ان انا ادخلك في اي سكه فيهم ولا ارجعك ليها ولا حتى كنت عايز اصارحك بالشغل الي انا فيه بخصوصها .

نور : باين اوي انك بتخاف عليا , يعجبني حتى لو طريقك هيبقى فيه شويه قذاره , بس انا ميهمنيش غيرك يا زياد , موافقه .
مش هكون حابه لفكره وجودي مع اخوك , بس انا موافقه لحد ما تخلص الي بتخططله .. ايا كان طريقك .

مسكت ايدها , وخدت منها السيجاره  الي اضافت لتبغها نكهه مميزه
اتلاشت مع دخانها المشهد وعيني بتفتح ببطئ , زي ما اكون متوقع حد واقفلي مثلا  او يكون الكيان بتاع العرجاء قدامي .
بس صحيت كان نور الشمس واضح ومنور الاوضه كلها وحاسس بأن كل شئ طبيعي , الساعه المتعلقه في الحيطه كانت عقاربها بتتحرك
الساعه 12 الضهر   ..

قايم حاسس بكتمه على صدري , نمت نوم كافي تقريبا , سمعت صوت خطوات بره وفتحت الباب الخدامه .
الست اتصدمت ورجعت لورا وقالت : ازاي ؟ انت صحيت ؟
ايه يا استاذ احنا افتكرناك مت ..
زياد : ليه هو انا نمت قد ايه  11 ولا 12 ساعه .
ردت قالتلي : 12 ساعه ايه انت بقالك 5 ايام في السرير ..
انا بعت جيبت طبيب الكفر ليكون جرالك حاجه ,  قال انك في غيبوبه بسيطه وهتفوق منها قريب وانها ممكن تحصلك من وقت للتاني ..
, مش انت الوسيط برضو  , والله اشك ..
انتي , انتي بتقولي 5 ايام ؟؟ انا بس حلمت حلمين وصحيت هو ...لا لا انتي هتهزري معايا يا ست انتي ..
: لا يا استاذ  حتى الشيخ الضو جه بنفسه يبص عليك وسابك , لو حابب تسأله ..

رد هو من وراها وقال  : خلاص رسالتك وصلت يا سعديه ..
اتفضلي انتي حضريله بس الفطار .

زياد : انا بس مش عارف ازاي , يمكن ده من تأثير الي حصلي في الحادثه ..

الضو : انا بصيت على كل حاجه وقريت الملف الي كان معاك , مش بتابع الفضول بس قولت جايز يكون في حاجه انا معرفهاش , وعرفت الي عندك ..
ممكن فعلا ده يأثر على نومك , بس في حاجه تانيه انت عايز تقولها ..
قولتله : اه بصراحه .. الاوضه دي من ساعه ما دخلتها , متفهمش بقا الزمن وقف ولا جري اكتر , ده غير ال..
الضو : ظهرتلك ؟
زياد : انت عارف انها هتظهرلي عشان كده قولتلي متفتحش الباب , ومع ذلك ظهرت .

الضو : مش لازم اقولك دلوقتي عن الباب , العرجاء قصتها طويله وعايزه تنتقم اكتر ..
بس طول ما انت في الاوضه ومفتحتش الباب كل حاجه هتظهرلك هي مجرد اطياف بتعدي على مرمى بصرك ..
لازم تهيئ نفسك كويس يا زياد ..
زياد : وايه الي وراها , اقصد , ليه العرجاء بتعمل كل ده ؟
الضو : هتعرف , بس في حاجه انت يمكن مخدتش بالك منها , وانا جايلك افهمك و احب اعرفك عليها ..

نظرات الضو كانت متجه على الحيطه وفي لوحه متعلقه انا يمكن مخدتش بالي منها فعلا او عدت عليا لكن مركزتش فيها ..
لوحه عباره عن 9 طبقات لأرض  , كل طبقه مختلفه عن التانيه او بشكل اوضح  كل ما بتنزل درجه بيطغى على الطبقه دي السوء ..
الضو : لوحه معبره عن ما يسمى بال dantes inferno  لوحه خريطه الجحيم  للرسام " ساندرو بوتيتشيلي " , وهي فعلا بتجسد الجحيم وتقسمه ل9 طبقات رأسيا .. 9 طبقات من الجحيم بيتجسد منهم خطايا للانسان بكل طبقه من طبقات الجحيم ..



الرسام استوحاها من ملحمه شعريه لشاعر اسمه دانتي أليغييري
(Dante Alighieri) , جزء منها ال inferno او الجحيم والي  مش متفق فيها  مع فكره دانتي في تقسيمتها بس , لفت نظري بعض التفاصيل .. ممكن تعتبر دانتي مجنون كا بعض مهرطقين زمنه  في القرن ال 14 ..
لكن متحيز لفكره وجود لوسيفر في الدرك الاسفل والي صنفها دانتي بطبقه الخيانه , الطبقه التاسعه .. لوسيفر في هيئته عملاق متجمد في البحيره التلجيه  , فارد جناحاته الي هتستقبلك بيها وانت نازله ..

وانت لو نزلت في باطن الارض في الكفر , فشلك يا زياد هيوقعك على جناح لوسيفر معاهم , مع الخاينين , مش خيانه  لينا ..  بس انت فاهم قصدي عن الخيانه ..
قولتله : انت , انت عارف ايه ؟  الي معاك قالك صح ؟
الضو : هههه , ايوه , بس خلينا نبعدهم عن الموضوع , بيزعلو اوي لما تجيب سيرتهم ..

زياد : استأذنك , انا محتاج اخرج .
خرجت بره اتمشي , طلعت بره الدوار .. خدت لفه بسيطه في الكفر ..
وانا بتمشى لاحظت ان في شخص شبه بيتبعني او بيبص عليا من بعيد , كان يمشي شويه ويقف , خد باله اني حسيت بيه ولما لفيت كان مديني ضهره وهو بيتحرك , لابس هودي اسود مغطي راسه وجاكيت ومش مبين منها ملامحه , بس تقريبا كان بيمشي ورايا لوقت طويل ..

مخدتش في بالي وكملت في الكفر الي كان مختلف ,
ارض ناسها طبيعيين بس المكان نفسه مش طبيعي .
اهل الكفر هنا تكاد تكون الاخبار منقطعه عنهم بره ومفيش تلفزيونات ..
فا تلاقيهم دايما بيجيبو جرايد , حتى تاريخ الجرايد من كام يوم ..
الي كان ماسك كشك الجرايد راجل كبير في السن جدا اسمه ربيع ..
دلوني عليه اهل البلد انه عنده الاخبار دايما  ..
روحت اشتريت منه جريده ووقفني ..
عم ربيع في اول مره اشوفه قالي :  انت مش غريب عليا يواد انت ..
انت زياد  كمال التاجي ابن كمال التاجي صاحب شركه الادويه اياها ..
قولتله : ايه الي انت بتقوله ده يا عم , انت جيبت معلومات عني ازاي ؟ انا للدرجاتي ابويا كان معروف ؟ وكمان انت عرفتني من شكلي !
قولت في عقلي الباطن شركه ادويه ؟ انا ازاي مش فاكر ان كان في شركه ادويه انا بملكها دلوقتي ..
ربيع : اه انت , الصدمه مأثره عليك شكلك من ساعه وفاته ..
لحسن حظك يبني اني محتفظ بنسخه من الجريده لحد دلوقتي , اصل في جرايد كده قديمه بيبقى ليها قيمه  خصوصا لما الاخبار تطمس وميتمسعش عنها بعديها ..
انا بجد مش مصدق انك جيتلي بنفسك ..
ايوه اهي , اتفضل يبني الصفحه الاولى ..
مسكت منه الجريده وانا ببحلق فيها وبقرأ ,  مش مستوعب الي بقراه ..

: تدهور في اسهم شركه مجموعه التاجي وسوء احوال الاداره بعد سنين من وفاه صاحبها كمال التاجي اثر ازمه قلبيه حاده ..

ربيع : في جريده تانيه بس بتاريخ اجدد شويه ..
خدتها منه , والي كان فيها صورتي من ضمن الصور في الجريده , الخبر كان  : ادمان منتشر بين الشباب لانواع من العقاقير المنتجه من قبل شركه مجموعه التاجي للادويه  مما تؤدي بعض حالات ادمانها للانتحار بعد تعرضهم لهلاوس شديده المدى ..
من المذكور ايضا اختفاء رئيس مجلس اداره الشركة زياد كمال التاجي واخوه مدحت كمال التاجي  في ظروف غامضه ..

زياد : يعني ايه ؟ اول صدمه اخدها كانت شركه الادويه الي اسسها ابويا من ضمن املاكه  والي مكنتش فاكرها .. الحاجه التانيه الي قدرت استنتجها وهي ان انا .. يلهوويي ينهار اسود ..
هلاوس بعدها انتحار !!  معقوله , معقوله يكون البوق الشيطاني !
بعد تجاربي شغلت نشاطي الي رفضت في الاول انفذه ..  لكن بعد الحاح شركائي والموردين للنبات الشيطاني قدرت احتكر كميه كبيره منهم , واستخدمها لصالحي وتركيب من البروغمانسيا عقار شديد المفعول ..  ظاهريا لعلاج الربو وامراض الجهاز التنفسي ..  لكن مع الادمان بيتحول لمنتج كنز للمدمنين من تابعات صناعه كتب السحر ودمجه مع الكيميا ..
انا عملت كل ده , هههههه , بجد انا كنت بالقوه دي ؟

ربيع : ايه يبني الي حصل ؟ في ناس بريئه ملهاش ذنب
, وكل ده بسبب ايه ؟
بسبب ابوك او بسببك ؟  الله اعلم مين الي بدأ الشغلانه الزرقا دي ..
بس انا كل الي هاممني دلوقتي انك فعلا تساعد في الي جي عشانه ..
وانا اوعدك اني مش هجيب سيرتك في الرجلين والنسخ دي من الجرايد معايا انا مش بتطلع لحد..
قولتله : صدقني يا عم ربيع , انا ذات نفسي مكنتش اعرف , الحادثه الي حصلتلي خليتني انسى كل حاجه , خليتني انسى نفسي ..
بس يا عم ربيع  في حاجه محيراني .. انت ازاي فاكرني بعد كل السنين دي ؟  فاكرني كويس  كمان , مش معنى انا فاكرني ؟
ربيع : كل يوم بقوم ابص عالجرايد القديمه واشوف نفس شكلك , وانا في سني ده بفتكر كويس , انت اتكتبلك انك اتولدت من جديد , مش عارف عن نفسك حاجه ورغم كده انت بتكمل وبتعرف وعايز تعرف اكتر ..
بلاش يبني تسألني سؤال زي ده , واسألني في المهم ..
قطع كلامنا شخص جاي من ورايا وحط ايده على كتفي ..
الشخص ده كان الي شوفته اخر مره شايل جثه اخته ,  بهاء ..
قولتله : انا كنت هدور عليك , اظن انك دلوقتي فايق تتكلم ..
بهاء : كان لينا لقاء واظن متاخرش .. تعالى اتفضل معايا .
سيبت عم ربيع ومشيت مع بهاء , روحنا دخلنا بيته , كان بسيط ..
صاله عليها فرشه واوضتين .. كنت بتمشى في البيت معاه وهو بيقولي .
كل اثر موجود  هنا مش هتفهم منها حاجه غير لما احكيلك عنها ..


كنت شايف سرير من الاوضه التانيه مرتبته مشقوقه من النص , كان في بقع عليها اكيد دم وكان بينزف هنا , على الناحيه التانيه باب الاوضه في فتحه زي ما يكون كسر على حجم ايد ,الي دخل كسر حته من الباب وفتح ..
وبعدها , قالي : تحديدا القصه بدأت بوالدتي لما اصرت ان الابواب والشبابيك كلهم يتقفلو , على الرغم ان شيخ الكفر قالنا لو هما عايزين ياخدو اضحيه هياخدوها من وسطكو مهما اتقفل عليكو ابواب .. بس انت فاهم عادتنا بنخاف نخرج بالليل الا لو في حاجه مهمه او تقديم اضحيه بنفسنا .

بجانب مستحملناش الي كانو بيموتو بره فا قولنا لازم منطلعش من البيت لحد ما يجي اليوم .. الطبيعي ان بعد يومين تلاته بيطلعو يختارو قربانهم عشوائي .. يا تقدمه انت ليهم , يا اما ياخدوه بنفسهم ..
مكانش وقتها لسه انتشرت ثقافه اننك نسلم بعض ليهم , او اننا نجتمع على شخص ونضحي بيه .
وبعد ما خلاص بقا امر واقع ان بنسبه ضئيله جدا مش ممكن اننا نخرج منها , بقينا ننظم الضحايا ونختار بعض الناس الي على شفى الموت  والمرضى وبعض كبار السن الي بيتقال عليهم عاله على المجتمع , اعذرني في الكلام ده , بس لازم بعد الاجتماعات الي عملناها مع شيخ الكفر اننا ننفذ مضمونها وهي اننا منضحيش بالشباب الصغيره , لأن دول الي بيتطوعو عشان يكونو خدام وينولو مرتبه الوعاء , ويا يموتو او يعملو حاجه وينجحو , بس عالاقل يموتو بفايده .. الكفر متبقاش فيه شباب كتير وشبه بيخلصو , وده بنسبه كبيره هيخفي نسلنا قريب بعد ما صمد كتير ..
وكانت التضحيه الي احنا متضطرين نقدمها بتشمل طقوس التسليم , او بمعنى اصح اننا نوضح لمتلقي القربان من اهل الارض ان ده القربان المحدد بشخصه .. وهي وصفه زيت ممزوج  ببزور نبات اسمه نبات الحرمل .. بيتطحن بزور الحرمل مع زيوت اخرى  بتكون زيت الحرمل , وبيترمى على القربان قبل ما يتسلم وهو جاذب  لأهل الارض في مضمونها  رساله مننا وأشاره للتسليم , وهي من طقوس كتاب من كتب السحر الي أمرنا شيخ الكفر الضو بتنفيذه ..







انا كا زياد نوعا ما استشفيت الكتاب ده وتقريبا قريته قبل كده مع شرح نوع النباتات وتحويلها لادويه ومخدرات , والي في الاغلب هو نفس الكتاب الي كونت  منه نبات البروغمانسيا ,  مركب البوق الشيطاني ..
الكتاب ده كان اسمه  " غايه الحكيم " او بالأسم الي شوفته في مكتبه الضو "picatrix "





كمل بهاء كلامه وقال :

في الاول كان الخوف مخلي الناس مش قادره تطلع من بيوتها , بس حركهم الحادثه الي حصلت .. اول ما لليل جه سمعت صوت خروشه في المكان الي جمبك ..
بصيت جمبي لقيت فتحه كبيره زي ما تكون حفره اشبه بالحفر الي كانت بره في ارض الكفر ..
يعني هو خرج من هنا ..
بهاء : هي , العرجه , كدبت في الاول وقولت عادي بيخوفونا زي ما احنا علطول بنسمع صوتهم وتحركاتهم في الكفر بالليل ...
بس بعد الخروشه سمعت بلاطه اتكسرت , وقتها قومت من اوضتي جري لقيت ايد بتخرج من الارض .. سامع صوت امي وابويا في الاوضه التانيه ..
زي ما يكونو بيتهامسو وبيقولو لبعض متطلعيش صوت هششش , هيسمعونا ..
شوفتها وهي بتطلع , بس مكانتش زي ما انت شايفها لما خدت اخر اضحيه .. كان شكل جسمها الى حد ما باين ومش متعفن .. انا اتصلبت مكاني معرفتش اعمل ايه , كنت جبان .. دخلت اوضتي وقفلت الباب واختي كانت نايمه وقتها , سمعت صوت كسر في باب اوضه ابويا وامي , ويدوبك ملحقتش سمعت صرخه امي , لما فتحت الباب فتحه صغيره وبصيت  .

ابويا كان ماسك بندقيه ووجهه في وش الكائن ده بس , بس خاف يضربها او ملحقش قامت سابت امي , نطت وطلعت عليه كسرت رقبته , وبدل ما كانت تطلع باضحيه واحده خرجت باتنين ..

اختي خدت الصدمه  بعد ما قامت مخضوضه وشافت الدم والمنظر .. كانت سحبت جثثهم ومشيت .. بس اختي من  وقتها وهي مش متزنه ..
مبتاكلش , ولا بتكلمني كتير زي الاول .. حتى مفتكرش اخر مره خرجت من باب الشقه غير ... المره الي خرجت من ساعتها كانت جثه ..
حتى وقت لما كانت بتكلمني اغلب الي بتقولو عباره عن اننا ملناش مخرج وهنموت زينا زيهم .. عالاقل لو العزاب هيبقى في انتظار موتك يبقى موت من غير ما تتعزب .. مقدرتش اسيطر على افكارها , ولا حتى اني انجدها من الي عملته في نفسها .. بس تعرف , على قد ما كنت جبان ومقدرتش احافظ على عيلتي ..
بس لما خسرتهم مبقتش احس , مفيش شعور الخوف والجبن زي الاول ..
وده اكيد واضح ليه , يمكن لو كنت فارق لنفسي اكتر كنت هخاف ..
بس طول عمري كنت خايف عليهم هما ..
العرجه دي  بقت شيطانه , مش عارف حتى هي ازاي بعد ما شبعت موت بتطاردنا احنا ليه ؟
بس الي اعرفه اني مش هرضى اكون الاضحيه الجايه ليها في يوم من الايام .. ومش هسيب حق الي راح .

قولتله  زياد : بجد , مكنتش اتوقع تبقى متماسك كده , انا متفهم , عارف الي انت مريت بيه ..
انا محيرني اوي , هي مين .. وليه دي من اهل الارض مع انها تشبه البشر زينا ؟
بس اه , انا قريت عن حاجات زي كده , اهل الارض بيبقى في منهم من جنسنا , والسحر وطاقه الشر الي بتنبعث منهم بتحولهم من بشر لانصاف بشر , سواء اتخلو عن الانسانيه الي اتولدو بيها بالسحر الاسود والدجل ..
او ..
رد بهاء وقالي : الروح مش مرتاحه , او تموت مظلومه ..
قولتله : مممم , بالظبط .
بهاء : هيييح , قصتها كانت شائكه شويه , محدش عارف الحقيقه فين , ماتت مظلومه , ولا هي حصل فيها ايه خلاها من اهل الارض  , بس الناس بتتكلم وبتقول كلام كتير وروايات مختلفه .
البنت دي كانت حلوه جدا , جميله من جميلات الكفر , بتمشي وراها رجاله كتير , كان الي بيروحو يتقدمولها كتير بس بيترفضو  ..
واتقدملها واحد من كبارات الكفر ورفضته , لكن ناس كتيره مكانتش مرتاحلها .. بيقولو انها كانت شغاله والعياذ بالله في الحرام , بتجيب رجاله البيت عندها , مكانتش بتقبل انها تتجوز وكبرت وعدت ال 28 سنه يعني بدأ يروح عليها , فا الناس مستغربه ليه بترفض والله اعلم بقا .. دي اشاعه طلعوها الناس بعد ما اترفضت منها ولا ايه , بس كان بيتقال كتير عن شغلها الحرام , جمب كمان انها مخاويه وحاجه من الي بيقولو عليها , هاويه ..
كانت الناس بتحبها اوي لأنها محترمه مع الناس واخلاق , زي ما قولتلك , روايات بتختلف , بس انا اشهد من تعاملات سطحيه بيني وبينها انها بنت محترمه ..
المهم ان اتقال انها بتحب الحيوانات جدا وبتربي دايما قطط في بيتها وعايشه لوحدها واهلها اتوفو , كانو قرابين لاهل الارض بعيد عنك ..
واحد من اهل الكفر جه في مره مخضوض فكرو حد مات قالهم لا ..
البنت دي كان اسمها اسراء , فلما قالهم : البنت اسراء , اه والنعمه شوفتها بتدبح قطه من القطط الي حولين بيتها وبتصفي دمها في حله ..
الناس بيني وبينك مركزتش ومهتمتش اوي ..  وحتى لو ده حصل   الناس فيها الي يكفيها من امراض وتعب , مكانش هيبقى اهم من روح البني ادم الي بقت  بتموت كل كام يوم بعد مرور فتره طويله من الي هقولك عليه   ..
بعدها بفتره , فتره مش بعيده يعني كام يوم , لقو اسراء دي مقتوله في بيتها ..
اختلفت اقاويل كتيره , الي قال  , ان عليها سحر من حد تاني  كانت بتأذيه  واتسبب في موتها , وناس تانيه قالت دي كانت تعبانه في دماغها ومريضه او اتجننت بسبب شخص رفضته قام قاتلها وعامل فيها كده ..
ناس تالته قالتلك السحر الي بتعمله والحيوانات الي بتقتلها دي اكيد اتقلبت عليها ومستحملتش السحر الي بتمارسه ..
ناس رابعه وده الاغرب , لأن مش في الطبيعي ده بيحصل , وان بيقولو طبيب الكفر كشف عليها لقوها مغتصبه ..
هتقولي ازاي  ومين الي اغتصبها , هقولك  غريبه لأن مبتحصلش كتير والناس هنا محترمه بعض كويس , بس الي اغتصبها بعد ما حاولت تدافع عن نفسها قام قاتلها وشق بقها بشفره او بسلاح ابيض وشوه وشها بيه ..  بعدها لاحظو ان رجل من رجليها  مكسوره نتيجه الاغتصاب  .. على حسب كلام طبيب الكفر خبطه جامده بحجر او حاجه تقيله كسرت رجلها عشان متحاولش تقوم وتفلت  , منظرها كان بشع اوي وقتها وانا فاكر اني شوفت المنظر ده كويس ..
شالوها ودفنوها , وللاسف الدفنه هنا عباره عن انك بترمي الجثه في حفره من الحفر بتاعت الكفر واهل الارض بياكلوها , قليل الي بيعملو قبور .. متفهمش بقا , هي بقت منهم ولا مقدروش ياكلو جثتها او يقطعوها , وبدأت تظهر للناس بالليل من بعدها  بفتره طويله شويه , وظهورها  كان بعد اللعنه الي حصلت للكفر بفتره  وهي الي بقت  تاخد القرابين بدل الي قبلها  ..
زياد : طب معلش يا بهاء ,
ممكن تقولي مين الي عمل كده او شاكين في مين ؟

بهاء : الي عمل كده بيتقال انه حد كبير ومن كبارات البلد مش عايز اتكلم في الموضوع تاني اعزرني , مش عايز مشاكل ...
بس بيقولو انه الي اتقدملها في الاول ورفضته , عباس الضو ..
زياد : مين , عباس ايه , هو الضو ليه اولاد ؟
بهاء : قولتلك اعذرني  مش هقدر اوضح اكتر من ان  الضو  عنده  ابن واحد ..
قولتله : بس  مفيش حد هناك , ولا هو قالي ولا عندي علم , او زي ما كنت مفكر انه مش مخلف ..
حقيقي غريبه , اكيد الضو مكانش من الايجابي انه يحكيلي حاجه زي كده ..
تقدر تدلني على عباس الضو ؟  او حد يعرف حاجه عنه ؟ محتاج اعرف اكتر ..
بهاء : مش هقدر اقولك  اكتر من كده ولا اساعدك يا زياد , بالكتير هدلك على حد يقدر يقولك , والي هيعرف اصول الحكايه دي ناس معتقه في الكفر من زمان يعني وقديمه ..
قولتله : عم ربيع , قالي اسألني وانا سيبته ومشيت , يبقى اكيد يعرف حاجه ..

هز راسه بهاء فيما معناه , اه .
قولتله : متشكر قبل اي شئ على استضافتك ليا وانك قولت كل ده , وانا متاكد اني هقدر اساعدك و الي قولته مش هيروح هدر .
روحت خرجت من عنده , وبدأت هلاوس تطاردني منها نفس التمثال الي شوفته في كل حته , مرمي  عالأرض , بس بأختلاف ان عين واحده الي واضحه واتطمست ال 3  عيون الاخرى .. وانا غرقت في قاع افكار , مش عارف ابدأ منين ولا منين , وطرف خيط يوصلني لكذا طرف  غيرهم ..
مبقتش عارف الضو الي انا مقيم في بيته مخبي ايه اكتر من كده , بس عارف انه مش الشخص الي ممكن اتحالف معاه , هو مجرد كارت هيساعدني ..
بس انا محتاج افهمه , واعرف كل حاجه , مبقتش تقريبا محتاج غير اني اشبع رغباتي اكتر .. لأن فضولي مبيشبعش .. سواء ساعدتهم او لا ..
لو مساعدتي ليهم هتشبع اكتر الي جوايا مش هتأخر ..
ولا ابويا .. كان كل ده عنده شركه ادويه ؟   
بالاضافه لقصه عباس ابن الضو , حكايه جديده مكانتش على على البال ولا الخاطر ..ولا اعرف هو فين دلوقتي وبيخطط لأيه .

دقات قلبي الي بتزيد وصوت لوسيفج او بأسمه التعاقدي ميفيستوفيليس  بيظهر ..


: " اقدر اقول اني خسرتك تاني صفقه بعد روحك , اشباعك للفضول , الادمان الحقيقي جواك  لطالما عرفت انه مسيره ينتهي بأنقضاء روحك بعد 24 سنه .. 24 سنه من القوه والنفوذ ,حيث  اتساع نفوذك لكل سلطه , ما عدا سلطتك على عقلك وذكرياتك تحت نفوذي .. هل حتى تقدر تجزم ان كل  ذكرياتك صحيحه ؟ "                       
                                                              Mephistopheles    -