جزء 17 - جحيم الفلاسفه

" الجحيم هو الاخرون " - جان بول سارتر

جمله اتولدت من فكره متأصله في تجربه مسرحيه سارتر عملها بحبس 3 اشخاص في غرفه واحده , واتضح الهدف من التجربه , بيان الجحيم في نفوسهم وتعذيب كل شخص بنظرات الاخر واحكامهم وردودهم , السيطره العقليه من كل شخص لأخر يمكن تجسيدها ايضا

ب" نحن نصنع جحيمنا بأعين الأخرين " كما قال سارتر ..

بتبني تصورات عن ذاتك من انطباعات الاخرين الي بالتأكيد ميعرفوش الشخصيه الكامله غير الانطباع الخارجي عنك , الجحيم عند سارتر مش مكان مادي بل تقدر تقول في انعكاسه عن المجتمع وتأثير الناس بأفكارهم ونظراتهم التصيديه لخلق الجحيم جواك , حتى انك بعدها تبدأ تأثر في نفسك وتوصل لعده نتايج مختلفه سواء هي في نظر المجتمع سلبيه او ايجابيه كا جحيم الوعي او نعيم الجهل , فلسفه كل انسان يؤثر على غيره هي مساهمه فيما يسمى بجحيم الفلاسفه , باختلاف الشاعر دانتي أليغييري الي حط الفلاسفه اول طبقه من طبقات الجحيم في تصوره ان جحيم الوعي هو الجحيم الحقيقي المادي على الفيلسوف بدون نيران تمسه , وان الوعي عقاب حل عليهم , الوعي عقاب زي ما قال دانتي ؟ ولا هو مهرطق وسارتر اقرب للتصديق بتأثير الناس ونظراتهم بتكون الجحيم جواك وصولا لمرحله التأثير الشيطاني , الشيطان ! , وبالحديث عنه , هو الفيلسوف الاكبر الي بيوجهك لو سلمتله عقلك زي ما بتسلمها للمجتمع, بدون اعمال العقل لأعاده النظر في الي تلقيته منهم , عايز رأي ؟

متتفقش مع سارتر , ولا دانتي , مفيش اختلاف على اعمال العقل , الاختلاف على نتيجه اعماله ..

كانت بدايه ادراكي وتذكري للي قريته عن الانسان ودرجات فلسفته , كل الناس فلاسفه بس اعلى درجه ادراك فيهم هو الفيلسوف الي بيتدون كلماته .. كنت بكتب التفاصيل الي افتكرتها , والاحداث الي فاتت , كتبت جزء كبير منها بس بشكل متفرق و بدون صياغه , عارف ان في اجزاء فاتت ناقصه لسه مسترجعتهاش , مينفعش اكمل عليها , كان لازم اجمع كل ذكرياتي قبل صياغتها ..

من بعد معرفتي بدم الشيطان وانا بحس بيه , بتخيله وتخيلي بيتبني عليه احساس بالاحتراق الذاتي جوايا ..

تأثير بيقطع في جسمي قريب لعقار البوق الشيطاني , زي ما اكون بتعاقب على الي عملته في ناس كتيره ادمنت بسببي السم ده , شركه الادويه , ايوه , لازم ارجع لعم ربيع , انا مسمعتش منه ونسيته خالص ..


طلعت من الدوار بسرعه زي المجنون , عم ربيع كان يعرف عني ايه اكتر من كده ومقالهوش ؟

بجري وبهرول ، الي ببشوفني بيفتكرني مجنون ولا اهطل ، بس بكمل مشي وخدت بالي من الشخص الي كان واقعف بيراقبني قبل كده وخد باله اني شوفته ، كا العاده ملامحه مش ظاهره وحاول يمشي ، بيخفي شئ ما في جيب الجاكيت مش عايزني اشوفه ..

انا اتحركت ناحيته وقررت الاحقه ، ما يا بيراقبني وحد باعته يا فيه مصيبه ببعملها ومش عايزني اشوفه ، الأمور وصلت اني اجري وراه وهو يجري ومكنش متوقع ملاحقتي ليه ، استغل تركيزي معاه وراوغني واتحرك من قدام حفره مشوفتهاش واتكعبلت بل وقعت فيها وراسي خبطت وانا بقع في الارض وبتزحلق لتحت .

مش حاجه شدتني بس الحفره بتزقني لتحت وحجمها اكبر من الباقي ، ضلمه مش الغياب عن الوعي الي بحسه دلوقتي الي طاغي عليه ضلمه المكان انا زي ما قولتلك اتزحلقت ونزلت تحت شويه وتقريبا تعمقت في النزوله ..

كل الي حسيت بيه وقتها حراره وسخونيه في المكان , مكنتش شايف قدامي بس مع مرور الوقت عيني اخدت على مجال الرؤيه وظهر منه ممر طويل وعلى جوانب الحيطه نقوشات مكتوبه بالمسماريه , من ضمن النقوشات دي رمز لأنسان واقف و بيسكب شئ من واضح النقوشات انه ماده سايله بتنزل على جسم واقع من الواضح جثه وبيظهر رسومات لأشخاص بتقرب نظرها وتحركها ناحيه الجثه ..

ممكن تكون النقوشات بترمز للعهد المصون من اهل الأرض وقبولهم للقرابين عن طريق ترشيح اهل الكفر لبعضهم , والسائل ده ناتج من بذور الحرمل والي بيستخدموه اهل الكفر فعليا في سكبه على القربان ..

حاسس بالضغط والاكسجين بيقل في المكان , بجانب تأثير الخبطه الي على راسي , اخترق صوت طرق شديد حدود وعي , ولا هو خيال من خيالاتي , طرق على حديد او معدن كا وجود حداد بعزم قوته بينزل بمطرقته على قطعه من الحديد , صوت بعيد من اخر طريق انا مش شايفه , بس سامع وقادر اتعرف على صدى صوته بيتتبعنى ..

غيبت عن الوعي في وقت الصمت مكتملش مع استمرار صوت الطرق وفوقاني كان قدام ابويا , ااه , كان ابويا موجود بنفس الشكل الي فاكره عليه قبل ما يموت , بس كا توقيت في فارق زمني كبير .. تجاعيد وجهه المبالغه , مقدمه دماغه المصابه بالصلع , بقايا من شعره الابيض موجوده على اطراف راسه..

: زياد , قوم ساعد السمكري وهو بيدق عالصاج , سيبك من الاداره والشغل الي عمرك ما هتبدأو غير لما تجيبها من تحت الاول وايدك تتلطخ بالزيت والشحم ..

ساب السمكري الشغل وانا دخلت مكانه , اتعودت استغل دماغي كويس في اني ابني وأسس , اتعودد اني لو مسكت تجاره بربحها , كنت ببدأ بالشغل وسامعه بيتكلم وبيقولي :

: فكرت , عاندت في الاول لفكره فتح المعرض , بس زي ما انت شايف ورش السمكره هي الي بنتك وكبرتك , وانت كبير دلوقتي كفايه انك تمسكها وتديرها بس لازم تعدي في الاول زي ما قولتلك بالبدايه , وان شاء الله بعد ما اثق انك عديت كل مراحل اتقانك للشغلانه هنبدأ نفتح معرض كبير للسيارات بالترتيبات الي انت جهزتها ...


بتمر من بين اصوات الدق على الصاج ردودي عليه والي قولتله فيها : لسه مصمم على مدحت يمسك الاداره قبليا ؟ مع ان انت عارف يا حج اني اشطر منه واقدر امشي الشغل على العجين , انا مفهمتش في يوم منطقك وانت بتحط كل واحد في مكان غير مكانه , مدحت ايده تتلف في حرير في شغل السمكره , ليه متسيبهوش فيها وهو نصيبه في الشغل موجود ؟

: دايما بقول ان مش شرط تفضل متمسك بالجزء المتمكن منه ومهمل الجانب الي بدأ منه كل شئ , ايدك , الوقت الي هتقع فيه هتشتغل بأيدك وبعدها تكمل بعقلك ,انا يمكن كنت صيدلاني وكنت شاطر بس نجاحي اعتمد على اني بدأت بأيدي مع شغل جدك اما كانت ورشه صغيره وانا كبرتها ، اخوك مدحت الي ناقص فيه هو الي موجود عندك بس في نفس الوقت الي موجود عنده هو الي انت محتاج تشتغل على نفسك فيه , على قد ما تشيلو بعض في الشغل , لكن لو حد احتاج التاني في وقت صعب ميقفش جزء من الشغل على خبرته بل تكمل مكانه والي اتعلمته بشكل نظري من الشغلانه تضيف ليه الجزء العملي الي ناقص عندك ..

كان ردي ليه : عندك ما شاء الله دلوقتي عدد كبير من الناس تشتغل تحتك , وانا عرفت ان كل ده مش الامل الوحيد الي نتمسك فيه , بس يا حج الشغل في الاول وفي الاخر بيبقى ليه شخص واحد على الكرسي بياخد المكانه دي بعد استحقاقيته ليها , انت شايف اني مستحقش حتى بعد ما انا حطيتلك كل الخطط الي هنمشي عليها بقيت المشاريع الي هنفتحها , وبعدين متزعلش مني يا حج مدحت لسه قدامه كتير , ولو في صنايعي من الشطار الي هنا كمل زيه هيوصل في وقته برضو ..

وقفت دق عالصاج في الوقت الي قرب ابويا مني وانا حاسس بنظرات خوف على حذر في عينيه وقال : مينفعش , مينفعش يبقى واحد منكو احسن مكانه ونفوذ وقوه عن التاني , وده الي انا عامل حسابه , اسمع يا زياد يبني , دي فلوسكو قدام وده شغلكو انتو الاتنين الي لازم تقفو مع بعض فيه على حد سواء وده انا هحرص عليه كويس وكل واحد هياخد حقه في الوقت المناسب , الله اعلم بالي جاي وانا راجل كبير زي ما انت شايف ومضمنش ان كل الي انا بنيته السنين دي يفضل على حاله من غير ما يتخرب ..


انا كا زياد الي بيشوف المشهد الي قدامه كنت بدرس نظرات والدي الي كانت صح , في البدايه كانت تحليلي ليها سطحيه , حقد وغل بيني وبين اخويا الي اتربيت معاه على المساواه بس انا ساويته بالأرض في نهايه المطاف , وبدل ما كنت الطخ ايدي بالزيد والشحم لطختها بالدم .. الطمع كان فرع منه العدل والحق الي اختفى وفرع اخر الخيانه , جوع فوهه مبتتمليش من مطامع لزياده الثروات والنفوذ لأن الفوهه اخرها ضلمه بتبلع الي بيخشها وبتسلب اماله ونوره , الظاهر ان ده انسب تجسيد لمفيستوفيليس في حياتي , يمكن قبل ما اعرفه ودلوقتي وصلني لطريق تحت ارض ضلمه , محاط بجنس من المخلوقات كل الي بتسمعه صوت صراخ , نحيب و تقطيع الاوتار ..

من على بعد امتار كنت سامع صوت الطرق على الحديد , انا متاكد اني صاحي المره دي وحواسي شغاله عشان اتأكد ان الصوت لازال موجود ,

في ضوء خافت متسلل ظهر وانا بتمشى وصالب طولي بالعافيه وساند عالحيطه , الجهه اليمين الي دخلت فيها في الممر وضح ماهيه الشئ الي ظاهر منه الضوء .. جمجمه مقلوبه ومتوصله بجنزير مدقوق بمسمار في السقف , الضوء الي صادر كان مصدره المواد المشتعله الي جوه الجمجمه والي مش بيمس حريقها قشره الجمجمه ..

بالنسبه للأضائه دي معموله لمين ؟ كانت للشئ الي صادر منه صوت الطرق , وهو شخص قاعد على الأرض ومعاه مطرقه بدائيه بيدق بيها على ازميل معدني مدبب في قطعه من الحجر , تحديدا تمثال حجري ..

توفيق !! , او للمره التانيه قرين توفيق .. بيدق بالأزميل على بق التمثال لتظهر ابتسامه واسعه عليه , يمكن خلاص بقا التمثال علامه بتتبع توفيق في كل حته ..

ملامحه الداميه والخدوش والفتحات في جسم توفيق بقت ابشع ,وضوافره الاشبه بالمخالب الحاده , وهو بيبصلي بنفس الابتسامه الي بيرسمها وبيقول : كان نفسي اسألك احساسك ايه وانت في بؤره الجحيم مع واحد انت عارف انه ميت .. بس للاسف لو جاوبتني يبقى في حالتك هيبقى احساسك كاذب ..

سامع دقات قلبك السريعه , مع ان عقلك مش بيقول كده ..
قولتله : كلامك بيدل ان انت فعلا موجود جوه دماغي بس , اذا كنت انا الي برد على نفسي , يعني مش قرين ؟

توفيق : انا قولتلك قبل كده اني ممكن اكون هواجس جواك وانت اقترحت اني قرين , بس لازالت مش هقولك الرد القاطع انا مين فيهم ولا شئ تالت.. بس يكفي اقولك ان نظرتك للموتى احيانا بتكون زي مشاعرك معاكسه , ودماغك هي الشئ الميت ..

زياد : اخرج من دماغي احسن والي انت بتحاول توصله ده مش هيحصل , انت ميت , انت مش موجود يا توفيق , ولو اقتضى الأمر اني اقول السبب في موتك هو انا مش هنكر , لو ده سبب ظهورك ليا , من ناحيه الحقد والغل الي عندك تجاهي , موصلكش غير لموتك .

توفيق : انت بتأكد من ناحيتك اني مجرد خيال جوه خيالاتك المريضه , يبقى متلومنيش على اي فعل ومطارده صادره من خيالك , انا زي الشخص المفقود في حكم القانون ميت, قتلي للي حوليا مش هيخليني اتحاكم بالموت للمره التانيه , الا لو ..... قتلتني بنفسك ..


قولتله : هههه , اه انت , انت مش توفيق الي بيطاردني في خيالاتي او قرينه حتى , هههه ازاي , ازاي مخدتش بالي , موتك وسحبك للبؤره المحاطه بالسحر الباطني دي حولتك لكيان من كيانات اهل الأرض , امثال العرجه , رجعت خطوتين لورا بعد ما ادركت الموقف الي انا فيه ..


كمل توفيق ابتسامته المبالغه لدرجه ان جلد وشه اتشق واتقطع وغرز ضوافر ايديه الاتنين في رجلي ..

توفيق : كانت تايهه منك فيين , بس , بس مش هينفع اقتلك ..

مش هيسمحولي اقتلك انت بالذات , انا بقيت تابع لمواثيقهم , غير ان انت ميت من جوانب كتير , الحي فيك هو الي معاك ومحركك , الفرق في تقطعيك لأشلاء الي هيحسسني بنوع من النشوه .. بس مسيرك هتجيلي تاني وانت بتشوف كل الي حوليك بيموتو ..

شال ضوافره من رجلي وانا حاسس بألم رهيب ومش قادر اتكلم على قد ما بحاول ارجع زاحف بأيدي لورا , فين حين انه جرى على رجليه وايديه ودخل بسرعه في مكان في الحيطه واختفى ..

هو مخترقش الحيطه بس شوفت من بعيد فراغ في الجزء السفلي , جيب من الجيوب الي بتبقى في الانفاق , لما كنت بعافر عشان اوصل لمخرج عديت من جمبه ووضحلي معالمه اكتر , جيب لازم ازحفله عشان اقدر انزل منه , بس لفين ؟ ده المعنى الحقيقي للعتمه الي بمجرد ما حطيت ايدي اختفت وسطها , ايا كان الي كنت فيه ده ولا حاجه قصاد الي ممكن اشوفه تحت ..

ميفيستوفيليس : المنشأ , العرين السفلي الي طالما كنت موجود فيه بحس بالأمان , اسوء بقعه ممكن تنزل منها هي الي قدامك , هيبقى منها نزولك بشكل مباشر للعالم السفلي ..

كان ده تحذير من ميفيستوفيليس لأنه عارف اني لو نزلت تحت مش هطلع , وده بيمثل وجودهم كلهم تحت وبيخرجو بس وقت تقديم القرابين .. الطريقه الوحيده للنزول عن طريق الوصله والوصول ليها على ما اعتقد من مكان تاني غير هنا ..

اصوات الهمس مش في دماغي لا طالعه من الفراغ الي تحت الجيب , مع اصوات الهمس سمعت صرخه عاليه أكدتلي عمق الحفره من صدى الصوت فيها ..

بعد مشي كتير محستش غير اني بفقد الوعي تاني بسبب الخلل الي عندي في الدماغ مع عوامل الظروف الي ساعدتها , وقعت وعيني كانت اخر حاجه تبص عليها عالسقف هي المخرج ..