صدفه رسمها القدر الفصل الأول
جاري التحميل...
بدون عنوان
عن الصدف وقد ايه القدر ساعات بيرسملنا صدف ممكن تغير حياتنا للاحسن وساعات بتقلب حياتنا جحيم بس النهارده الصدفه مختلفه لأنها صدفه رسمها القدر 💜
الشمس كانت ضاربة في البحر لدرجة تخلي المية بتلمع كإنها دهب سايح. هي نزلت بدري تمشي على الرملة حافية بتحس بحرارتها وبتضحك من غير سبب يمكن من ريحة الصيف اللي تحسس أي حد إن الحياة لسه حلوة. وقفت عند عربية عصير قصاد الشط طلبت مانجا وقبل ما تمد إيدها للكوباية خبطت في حد جنبها بالغلط. لفت بسرعة وقالت اسفة والله ماخدتش بالي هو ضحك الضحكة اللي أول ما تتسمع تحسي إنها طالعة من حد قلبه خفيف. كان لابس تيشيرت أبيض ونضارة شمس شعره مبهدل من الهوا بتاع البحر. قال لها وهو ماسك كوباية جوافة ولا يهمك بس واضح إن القدر كان عايز يخليكي تشوفيني النهارده. اتوترت وبصت بعيد وهي بتشرب من العصير: قدر إيه بس الدنيا زحمة🙄🙄 رد وهو ماشي جنبها كأنه عارفها من زمان زحمة؟ طب ليه خبطتي فيا أنا بالذات مقدرتش تمنع الضحكة اللي طلعت منها. كانت خفيفة زي مشاعر بدأت تتحرك جواها من غير ما تاخد بالها. فضلوا ماشيين جنب المية الشمس دافية والهوا ريحته ملح وسعادة. وكل ما يقول كلمة قلبها يرد عليه من غير ما تنطق. لما وصلت لآخر الشط قال لها بابتسامة مالهاش تفسير أنا حسيت إن اليوم ده هيبدأ لما شوفتك تحبي نكمل ولا كفايه وقفت بصت له وحست للمرة الأولى إن المصيف مش مجرد فسحة ده بداية حاجة كانت مستنياها من زمان ومجتش غير في عز الحر. هي وقفت قدامه ورغم إن الشمس كانت قوية برضه حست بدفا تاني دفا طالع من طريقته وهو مستني ردها كأنه متأكد إنها مش هتمشي. قالت له بخجل خفيف نكمل بس ما تفهمهاش غلط😏🥲 ضحك غلط إيه بس دي أحلى صدفة حصلتلي مشيوا جنب بعض تاني بس المرة دي ببطء كأنهم بيدوا للقدر فرصة . الهوا كان بيهز شعرها وهو بيبص عليها من غير ما يبين وهي حاسة بنظراته بس عاملة نفسها مش واخدة بالها. عند اخر الكورنيش لقى مركب صغيرة بتطلع رحلات بص لها وقال يالا نركب ساعة واحدة وهتشكري القدر بعدها. اترددت ثانية بس قلبها قال ايوه قبل عقلها. ركبوا المركب والموج خفيف والدنيا كلها صوت البحر مسك طرف القارب وقال لها عارفة أنا اصلاً ماكنتش ناوي أنزل البحر النهارده بس صحيت فجأة وقلت لنفسي لازم أنزل دلوقتي فهمت ليه😌 بصت له وسألت وهي بتحاول تخبي توترها ليه؟ رد بهدوء وابتسامة من اللي تخبط القلب عشان أقابلك😍 سكتت لحظة سكوت بس جميلة كأن البحر نفسه بيستمع الموج خبط في المركب خبطة بسيطة وهي اتمايلت غصب عنها مد إيده بسرعة يمسكها قبل ما تفقد توازنها. إيده كانت سخنة وساعتها هي حست إنها وقعت فعلًا بس مش في البحر وقعت في إحساس جديد. سابته يمسكها ثانية زيادة قبل ما تبعد. ولما رفعت عينها عليه لقت نظرة واضحة وصريحة نظرة حد قلبه اتعلق من أول لحظة ومش مخبي قال لها بنبرة جدية لأول مرة "أنا نفسي اليوم ده ما يخلصش" هي بصة له بخجل وفرحة وخوف في نفس الوقت وقالت بصوت واطي ممكن ما يخلصش لو إحنا عايزين والمركب كملت قدام والصدفة بقت بداية. والصيف بقى حكاية جديدة اتكتبت تحت شمس المصيف. اه نسيت اعرفكم بنفسي انا رهف وده زياد حبيبي اقصد جوزي 😂😂 ماهو اصل بعد اليوم ده وهو جه كلم بابا وحاليا احنا في بيتنا ومعانا أسر والحمدلله على قدر ربنا دي كانت احلي صدفه. لانها "صدفه رسمها القدر" #دعاء_يوسف #صدفه_رسمها_القدر 💜
