بدون عنوان

الحلقة الرابعة
*عمرو يوصل ريهام لحد باب العمارة وتكون عيزاه يطلع عشان يتغدا عندهم وتفضل تتحايل عليه عشان يطلع معاها*
ريهام:تعالا ياعمرو اطلع معايا عشان تتغدى
عمرو:لا انا هروح اكل عندنا فى البيت
ريهام*بحزن*:ليه طيب ماتطلع تقعد شوية
عمرو*وهو بيبص قصاده وبيقول لنفسه:صبرنى يارب*:معلش ياريهام مرة تانية انا بجد تعبان عايز اروح عشان انام
ريهام:طيب والف سلامة عليك خلى بالك من نفسك
عمرو:ماشى
*وتخرج من العربية وتفضل واقفة لحد ماهو يمشى وتطلع وتفتح باب الشقة ويكونوا قاعدين بيتغدوا*
ريهام*بهزار*:خيــــــــانة بتتغدوا من غيرى
هنا*بتضحك*:حمد الله بالسلامة 
ريهام*تبتسم*:الله يسلمك ياهنا ,حمد الله على سلامتك انتى كمان
هنا:الله يسلمك يا حبيبتى
ريهام:ماما انا جعانة اوى 
حنان:هقوم اجيبلك طبقك
ابراهيم:ايه اخبار عمتك وجوزها وولاد عماتك
هنا*موبايلها يرن*:عن اذنكوا
ابراهيم:اتفضلى
*وتقوم هنا وتدخل الاوضة*
ريهام:كويسين الحمد لله بس عمرو كان هيموت امبارح
ابراهيم*بخضة*:ازاى ايه الحصل
ريهام:كان راكب القطر ولابس لبس خفيف وماكنش معاه جاكيت والجو طبعا كان تلج وربنا ستر و واحدة اديته الجاكيت بتاعها عشان يدفا
ابراهيم*بقلق*:وهو عامل ايه دلوقتى
ريهام:كويس الحمد لله
ابراهيم:الحمد لله
حنان*تخرج من المطبخ ومعاها طبق وتكون ماسمعتش الحوار ده وتبص متلقيش هنا*:هى هنا فين
ريهام:جالها موبايل ودخلت ترد عليه
حنان:ماشى اقعدى كلى بقى 
*وقعدت ريهام تاكل هنا فى اوضتها وبتكلم سلمى*
هنا:الو ياسلومة
سلمى:ماتصلتيش بيا امبارح ليه قلقتينى عليكى
هنا:والله ياسلمى الجو كان ساقعة اوى ويدوب غيرت واقعدت مع خالته وبعد كدا نمت
سلمى:طيب,انتى ايه اخبارك مرتاحة فى القاهرة
هنا:انا مش بقالى غير يوم بس الواضح انه الاخبار هتبقى تمام ,انا هدور على شغل عشان مش افضل قاعدة كدا
سلمى:يارب تلاقى شغل ,ماما بتسلم عليكى ع فكرة
هنا*تبتسم*:الله يسلمها وحشانى والله سلميلى عليها كتير
سلمى:من عنيا ,انا هقفل بقى وهبقى اكلمك تانى سلام
هنا:سلام
*بعد ما تخلص مكالمتها تخرج تلاقى ريهام قاعدة بتاكل وخالتها وعمها قاعدين بيتفرجوا على التلفزيون قاعدت معاهم لحد ما ريهام تخلص اكل ,عمرو روح البيت وكان مضايق اوى وطول ما هو ماشى بالعربية بيدور عليها وبيبص على كل الماشى كان نفسه يلاقيها اوى وعمال يفكر ياترى هيقابلها تانى ولا ده مستحيل ياترى هيشوفها تانى ولاخلاص كدا والتفكير ده كان مسيطر عليه جدا ووصل لحد باب بيته وفتح الباب ودخل على اوضته ونام على سريره وفضل باصص للسقف وسرحان مها خبطت على الباب ودخلت*
مها:انت هتنام تانى
عمرو*سرحان ومش سامع هى بتقول ايه*
مها*قربت منه وندهت بصوت عالى*:عمــــــــــــــــرو
عمرو*يتفزع*:ايه يامها فى ايه
مها:مش معقول ياعمرو مجرد واحدة اديتك جاكيت تفكر فيها بالطريقة دى 
عمرو*بجدية*:صدقينى انا مش عارف فى ايه خطفت قلبى مش قادر انسى شكلها ولا ملامحها انا مجرد مابغمض عينى بشوفها انا بجد مش عارف ليه 
مها*بستغراب*:بصراحة دى حاجة غريبة اوى ,عموما ياحبيبى سيبها على ربنا لو مكتوبلك تشوفها هتشوفها تانى
عمرو:يـــــــــــــــارب اشوفها ,عارفة لو شوفتها تانى هعمل ايه
مها:ايه؟
عمرو:همسكها من ايديها وهروح على اول مأذون وهكتب الكتاب على طول
مها*بتضحك*:ياسلام ده ايه الجنان ده
عمرو:هو كدا بقى
مها*بجدية*:عمرو تعالا نتكلم جد شوية ,البنت دى انت مش عارف عنها حاجة واصلا ممكن تكون مخطوبة او متجوزة
عمرو:فال الله ولا فالك ياشيخة ,ايه الاحباط ده
مها: يا ابنى فكر بعقلك مش بقلبك بس انت لزما تحط كل الا حتمالات والاحتمال الاقرب ان ممكن ماتقبلهاش تانى خالص مش معقولة هتوقف حياتك ودُنيتك عشان مجرد يوم شوفت فيه بنت واديتك جاكيت!!
عمرو:ياخربيت الاحباط ,اطلعى برة يامها وسبينى لوحدى
مها:انا بفوقك بدل ماتصحى من الحلم الجميل ده على كابوس ,وعموما انت اخويا واكيد اتمنالك كل خير بس صدقنى انا خايفة عليك ومش عايزاك تتعلق بحاجة وفى الاخر تطلع مش ليك وساعتها هتنجرح اوى
عمرو*بصصلها بهتمام وبيفكر فى كلامها ولقه انه فعلا صح*
مها*بصت لآخوها بحنية وابتسامة*:وعشان متقولش انى عيزاك تبقى متشائم فيه حاجة ممكن تخليك متفاؤل ,لو قابلتها فى وقت قريب اعرف انها ليك ومكتوبالك وطبعا الله اعلم دى فى حالة لو هى مش مخطوبة او مش متجوزة او مثلا مش مرتبطة وبتحب حد تانى لكن لو مش قابلتها فى الفترة الجاية دى يبقى انساها خالص ودور على واحدة تانية بنت حلال تسعدك وتعيش معاها عمرك كله بسعادة وربنا يسعدك ديما يارب
عمرو*ابتسم لآخته*:ايون كدا ادينى شوية تفاؤل ,ربنا يخليكى ليا يا احلى ميهو يارب واشوفك عروسة قريب واخلص منك بقى بدل ما كل شوية تفزعينى كدا
مها*تضحك*:بقى كدا ,بكرة تقول ولا يوم من ايامك يا ميهوتى 
عمرو:اكيد طبعا انتى العاملة حس فى البيت ده بصوتك العالى على طول ده 
مها*ابتسمت*:تصدق انك رخم يا واد انت ,ماشى ياخويا انا قايمة وسيباك ,بس بقولك اعمل حسابك بكرة هننزل سوى
عمرو:ليه؟
مها:عايزة اشترى حاجات للبيت انت عارف انى فى خلال شهرين هكون فى بيت العدل فلزما اظبطه 
عمرو:ومؤمن خطيبك فين يا اختى
مها:ما انت عارف شغله وكمان ما انت واخد اجازة من النادى وقاعد طول اليوم ايه المشكلة بقى
عمرو:ماشى يلا اهوه اكسب فيكى ثواب
مها*بتضحك*:حنين اوى يا واد
عمرو:طول عمرى حونين وقلبى زى البافتة البيضة ,ربنا يزيدنى تواضع
مها*بتضحك*:متواضع اوى فعلا
*تدخل عزة على صوت ضحكهم*
عزة:خد ياعمرو الجاكيت اهوه بس مدام حريمى اديه لآختك بقى
عمرو*قام بسرعة من على السرير وخد الجاكيت وحضنه*:اختى مين!! انا معنديش اخوات الا الجاكيت ده, احبيبى اجاكيت
مها:ماشى ياندل ,عموما ياخويا انا عندى جواكيت كتير مش عايزاه
عزة*بستغراب*:انا مش عارفة انت مهتم بالجاكيت ده ليه
عمرو*بحنية*:بحبه ياماما بحبه
عزة*تضحك على اسلوب ابنها وطبعا ماتكنش فاهمة*:عيشت وشوفت ابنى مجنون بيحب جاكيت ،ماشى ياحبيبى ربنا يخليكم لبعض وتجيبولنا بلوفرات صغننين كدا
عمرو*بص لمامته*:اتريقى اتريقى
مها*فضلت تضحك على كلام مامتها*
عمرو*بص لاخته*:اضحكى اضحكى 
*وفضلوا التلاتة قاعدين مع بعض يهزره ويضحكوا وريهام خلصت الغدا وقامت غيرت هدومها وفضلت هنا مستنياها عشان تخرج وتقعد معاهم وماخرجتش دخلت الاوضة عشان تشوفها &كانت ريهام قاعدة على السرير وماسكة صورة عمرو ومبتسمة وسرحانة اوى& هى كانت بتحبه من زمان من صغرها ورغم انها بنوتة جميلة وكانت بتغير كتير من هنا وبتحس ديما انها افضل منها عشان كدا كانت بتغير منها واحيانا بتحسدها*
هنا*تقرب منها*:احم احم
ريهام*تتخض*:ايه ,خضتينى ياهنا
هنا*تبتسم*:سورى مش كان قصدى بس انا واقفة بقالى فترة وانتى مش مركزة خالص ،ماجتيش تقعدى معانا برة ليه
ريهام:عادى يعنى
هنا*بتبص على الصورة*:هى صورة مين دى
ريهام*تبتسم*:ده حبيبى
هنا*بستغراب*:حبيبك!! انتى مرتبطة ياريهام؟
ريهام:لا ماتفهميش غلط ,,ده عمرو ابن عمتو وانا بحبه اوى بس مفيش بينا اى حاجة ومش مرتبطين
هنا*ارتاحت بعد كلامها*:طيب مدام بتحبيه وهو بيحبك مش اتقدملك ليه
ريهام*فكرت شوية*:اصله لسه بيكون نفسه اول لما يجهز هيتقدملى على طول
هنا*بأبتسامة*:ربنا يسعدك ياحبيبتى ويوفقك
ريهام*بصالها*:يارب ,ها وانتى ايه اخبارك العاطفية
هنا*اتصدمت من السؤال ده*:ايه ال انتى بتقوليه ده ياريهام
ريهام*بخبث*:يعنى عايزة تفهمينى ان مفيش حد كدا ولا كدا فى حياتك
هنا*اتحرجت اوى من كلامها*:لا طبعا مفيش ,انا مستنية ابن الحلال الـ هييجى و يتقدملى لكن موضوع الارتباط ده مُستحيل عشان انا عايزة الحب الحلال مش اى حب كدا وخلاص
ريهام*بتريقة*:وهتفضلى مستنياه لحد امتى بقى 
هنا*بحيرة*:لحد ما ييجى ,انا مش عارفة هييجى ولا لا بس انا مستنياه
ريهام*ابتسمت بخبث*:ماشى يا ام حب حلال 
*شوية وابراهيم نده عليها قامت بسرعة عشان تكلمه ومن لهفتها اديت الصورة لهنا وخرجت وهى وقتها كانت قاعدة وسرحانة وبتفكر ياترى هييجى الانسان اللى هى بتتمناه ولا لا ،هى ماكنتش عايزة غير انسان يحبها ويحترمها وكانت رافضة اى ارتباط لحد ما تقابل شخص تحس بحبه بجد وساعتها تحبه وتسلمه قلبها وفجأة لقيت صورة عمرو فى ايديها بصيت للصورة وركزت فيها وفى ملامح وشه*
تأليف:فاطــــمة هـــــشام