نَّاصِيَةُ من غبار الماضي - عقود روفوسيل
جاري التحميل...
نَّاصِيَةُ من غبار الماضي
انا عارف ان مكنش سهل عليك حاجه زي كده وانا قدامك اهو عديت بفتره صعبه .. على الرغم من اني فاهم المعضله دي والمفروض اني اقدر اتعامل معاها بشكل طبيعي بحكم شغلي .. بس مش هتقدر تكبت مشاعرك في الاول وفي الاخر او المرحله الي متقدرش تطلع فيها مشاعرك وتخش على مرحله الصدمه علطول زي ما حصل معاك .
كل حاجه بدأ عقلي يستوعبها وقتها كان صوت دقات قلبي , نبضات متسارعه تزامنا مع خطواته الي بره , صوت احتكاك رجله بالارض على ما يبدو انه كعب جزمه .. او ده الي استنسجته من صوته .. المشهد حوليا ضبابي بس قدرت اكون صوره قدامي تترجم لي حالتي الصحيه المتدهورة , محلول متعلق وجسمي الي مش حاسس بيه بسبب مخدر , دقات قلبي زادت اكتر ومعاها زادت الخطوات وصوتها الي اتحول لمشي سريع بس اتغيرت من كعب الجزمه لرجلين حافيين , باب اوضه المستشفى اتفتح . الادراك بالمشهد حوليا بدأ يقل تدريجيا من تاني ونظري بيتشتت بمجرد ما دخل الاوضه .. مكنتش قادر اكون ملامحه بس كان واقف قدامي وسامع رجله بتقرب مني وخطواته وقفت لحد السرير , نبضي رجع يبطئ تاني لمستواه الطبيعي على الرغم من ان مفروض العكس , ان انا في موقف يستدعي اقلق ..رد بصوته الغليظ : انت نسيت كل حاجه , بس تدريجيا هتفتكر ...... ز: انت مين ؟ وافتكر ايه ؟ , انا مش فاكر انا جيت ازاي ... انا مش قادر احرك رجلي , حاسس بعجز , حتى في التفكير . م : هتفتكر ز: يا دوووكتور انا بيتهيالي حاجات غريبه , مش قادر اشوفك كويس ونظري مشوش وصوتك متغير وغري.. م : مع كل حدث هيعدي هتفتكر ,وهتعرف انا جبتك هنا ليه ومسيبتكش تموت . ز : انا كل الي فاكره اني اسمي زياد , تقريبا 28سنه ,اخر حاجه فاكرها عربيه كنت راكبها وغالبا كانت عربيتي واتقلبت بيها , وتقريبا ده الي خلاني افقد الذاكره . م: لا فكر تاني ز : انت دكتور وفاهم اني في الحاله دي مش قادر افتكر كويس م : دكتور ؟ حاول تفتكر انا مين بعد مرحله ادراكك لأيه الي وصلك لهنا غير الحادثه .. ذاكرتك ليها صله بالعقد يا زياد . ز : انا مش فاكر اي عقد . م : مش هتفتكر دلوقتي مين الي خبطك ؟ ز : الخبطه الي خدتها كانت من عربيه سودا معديه على الناحيه التانيه من الطريق وكانت ماشيه بسرعه عاليه وخبطت فيا وقلبتني بالعربيه . م : ومين الي خبطك ؟ ز : معررفش .. مععرفش .. بحاول افتكر , وشه كان مشوش ومشوفتهوش وهو بيخبطني , او ده على حسب الي فاكره , بس في اللحظه دي زي مايكون الزمن وقف , اتقلبت بالعربيه وازازها اتكسر واتفرق في كل حته حوليا , والمشهد ما قبل فقداني للوعي , كان ايد ظهرت بره وشخص طلع من عربيته وكأنه متمسش او اتصاب , الوقت كان متاخر , مفيش حد تقريبا كان موجود غيرنا . على الرغم من انها كان خبطه قويه الا انه متلمسش , لاحظت ايده الي كان فيها ساعه مميزه مقدرتش افتكر تفاصيلها كامله , كانت هي تقريبا اخر حاجه اتعرف عليها والوحيده قدام مجال رؤيتي, نظري متحركش منها غير لما فقدت الوعي , او فقدت البصر, انا مش شايف كويس . م : انت مفقدتش البصر لا بس ده طبيعي نظرا لظهوري ليك . رديت وقولتله : لا ثواني انا , انا فعلا مفقدتش البصر , انا لما ببعد نظري عنك بحس بوضوح اكتر رغم تشويشها, وكأن الضوء بيهرب بمجرد ما ابصلك. وبعدين انت عرفت از... م : ايوه انت متقدرش تشوفني الا لو ظهرتلك بمظهر مطابق ليك . لان المظهر الحالي الفص البصري في الدماغ المسؤل عن معالجه الصوره الي عينك بتلقطها مش قادره تترجم المشهد , انت مش قادر تشوف جسم محاط او بيشع بالضوء لينعكس على قرينتك لأني بمتص الضوء من حوليا , مفيش اي نسبه منه انه ينعكس تجاهك . قولتله : قصدك ايه ؟ , انت اكيد بتخرف ولا تعبان في مخك , طب فين الدكتور ؟ ممكن يكون في خلل في عيني اكيد ............ انت يعم , انا بكلمك . اينعم انا كنت بشوف بس المشهد ضبابي شويه قدامي , بس لما بحرك نظري على الشخص الي كان بيكلمني , كان في فراغ مكانه وضباب وكأنه ممسوح او مكانه ثقب اسود مفتوح ... جاب كرسي حديد كان في زاويه في الاوضه وحطه قدامي وقعد .. م: في تساؤلات كتير لسه ملهاش اجابه , على الاقل مش لازم تعرف كله دلوقتي. ز: قولي انت مين حتى , حابب اشكرك قبل اي شئ انك جبتني هنا , بس بجد معرفش انت مين لسه , و م : غلط , السؤال ده من الاسئله المؤجله انك تعرفها ومظنش ان من الطبيعي في حالتك انك تتقبل حاجه زي دي دلوقتي . .. قرب الشخص ده من كيس المحلول المتعلق وحقنها بسائل اخضر سرعان ما انتتشر وانتشر المحلول كله في جسمي . ايه ايه الي انت حطيته ده ؟ يااا جماعه يا دكتور , صوتي مبقاش يخرج غير بالعافيه مش قادر اتكلم عالاقل للفتره الزمنيه الي اتحقنت بيها . حاسس بشبه فقدان للوعي . م : انا بحاول اساعدك , لو عايز ائذيك فعلا مكنتش هجيبك ولا هستناك تفوق عشان تبقى قدامي . الحقنه الي اديتهالك هتعزز ذاكرتك لفتره مؤقته للحظه انك تسترجعها طبيعيا فيما بعد , بس استرجاع بعض الذكريات ليها تمن تقيل .. قام من مكانه وبدأت اسمع خطواته الي صوتها اشبه بجزمه بكعب بعد ما كان صوت رجله الحافيه , فتح الباب وخرج , دقات قلبي تسارعت من تاني تزامنا مع خطواته الي بتبعد . بعدها الرؤيه اتحولت من ضبابيه لعتمه , بس الفرق اني بجد المره دي كنت فارقت الوعي .. _____________________________ ابدأ معاك منين ؟ لو مفكر ان الي عندك ده مرض الي خلاك تحس بعيبه في نفسك يبقى انت غلطان , مش كل الي درسته كان الي بؤمن بيه او بمعنى اصح ، الحياه علمتني منهج مختلف فا بقا في تناقض ما بين نصوص الي انا درستها والي بتفاجئ بيه , حقيقي انا مش بطبق معاك ده في علم النفس بس , حاجات كتيره جدا مش كلها منهج صحيح , من الرياضيات والتاريخ وعلم النفس بالاخص . بس انا متضطر اتعامل معاك بالموجود في منهجي , لكن انا مش هستخدم كل المنهج الي معرض يبقى فيه اخطاء وارد أذيك بيها . انت مش مختلف اوي عني الحقيقه , ولا يعيبك الي انت مفكره مرض .. احيانا في تساؤلات انا كا طبيب نفسي مش هقدر اجاوب نفسي فيها . بس لازم تعرف يا مدحت ان انا مش بتعامل معاك زي اي حد هنا , لأنك اخويا والصله الي بتربطني بيك متخلينيش اسيبك في حالتك دي . عارف ان الصدمات لما بتيجي ورا بعض مش اي حد يقدر يتحملها وهنا هتضطر اخرج من المنهج شويه واقولك اني مش بسميه صدمه نفسيه انما انت طاقتك التحمليه مش قد الموقف . رد مدحت عليا وقالي : انا فاهمك يا زياد , عارف قصدك كويس بس , بس لو فعلا انت مش ثابت في مبدأك وبتعاملني اني مش من المرضى الي انت بتقول انك بتعالجهم , لمجرد اني اخوك , وهل لمجرد ان اخوك يبقى انت بتكدب على باقي الناس , ولا بتكدب عليا انا , فكك من ان انت مش عايز تحسسني اني مش مريض عندك بيتعالج , واقدر اقول ان انا طاقتي مش حمل الموقف فعلا , ده يخلي الي انا فيه اسوء . عالاقل انا كا شخص ممكن اكون في صدمتي النفسيه في احتماليه ان يتم شفائي انما انا غير مؤهل لتحمل مواقف اي شخص تاني يتعرض ليها ، انما انا مقدرش . ز : مدحت يا حبيبي ، انت في بعض الحالات تحملك لمواقف تانيه يبقى احسن من غيرك .. انا عارف ان مكنش سهل عليك حاجه زي كده وانا قدامك اهو عديت بفتره صعبه .. على الرغم من اني فاهم المعضله دي والمفروض اني اقدر اتعامل معاها بشكل طبيعي بحكم شغلي .. بس مش هتقدر تكبت مشاعرك في الاول وفي الاخر او المرحله الي متقدرش تطلع فيها مشاعرك وتخش على مرحله الصدمه علطول زي ما حصل معاك . مدحت : زياد انت فاهم كل حاجه غلط , الي انت عايش فيه اكبر كدبه ودليل انك في حاله اسوء مني وانا بجاريك فيها عشان نمشي حالنا , في نفس الوقت حاسس ان انا اتضحك عليا , انا ابويا وامي ماتو ورا بعض بدون سابق انزار ، حتى مبقتش املك اي حاجه . ز : مدحت احنا قولنا مش هنفتح السيره دي وبلاش تخش في الجزء ده , انت تقدر تتكلم براحتك عن موقفك من وفاتهم ، لكن انت مشكلتك مع فلوسهم ؟ اكتر من انا اخوك وموجود جمبك , انا متولي امورك كويس ومقصرتش معاك , مش هسيبك في كل الاحوال لحد ما تعدي الفتره دي على خير . رد مدحت بنبره فيها غضب : زياد , انا مش اخوك الصغير الي انت فاكره لسه مش فاهم حاجه في الدنيا ، انا عندي ٢٤ سنه , انت مش اكبر مني كفايه انك تشيل معاك كل مبلغ من الي ابويا وامي سابوه و انت بتديره لغرض ..... قاطعته وقولتله : بأمن مستقبلك يا غبي .. مش فاهم اني لو سيبتك في الوقت ده انت مش هتقدر ولا تدير فلوس وحياتك هتبوظ اكتر . رد بهمجيه : بالنسبه ههه , بالنسبه لابوك , الي كان مدمن مخدرات ومسؤل عنك وعني وهل ده تصرف حكيم انه يديك سلطه انك تكون وصي عليا وعلى حقي , طب ابوك المدمن الي مات اوفردوز , لا انا طبعا غير مسؤل ومش في وعي صح , وامك الي بعد ما عرفت الي حصل لابويا , مع مرضها بالسكر والخبر الي خلاها تطب ساكته وتموت قدامي, وانا مش قادر اعملها حاجه , وانا حاسس اني لوحدي الي عليا المسؤليه بينما اخويا الي هو كل حاجه في الدنيا والي شايلنا شيل .. مش قادر يبقى في بيت اهله ساعه واحده يتطمن اذا كانو عايشين ولا لا . ز : عيب الي انت بتقوله ده , اذكرو محاسن موتاكم , مدحت كل حاجه حصلت قضاء وقدر , وبناء على كده ده يعلمنا ان نكون جاهزين لاي ازمه ممكن تحصل قدام , واحمد ربنا ان انا معاك , انا مكنتش باجي البيت لاني كنت شغال وبحاول اكبر في فلوس ابوك الله يرحمه , باصص ليك وليا وعامل حساب قدام اني اكبرك معايا . قربت من اخويا وقعدت جمبه حطيت ايدي على راسه وضميتها لصدري , بحاول احبس دمعتي الي في اي لحظه ممكن تنزل . اخر حاجه قالهالي مدحت قبل ما يقوم ويمشي هي : انا عايزك بس تسيبني في حالي ومش محتاج منك مساعده نفسيه انا قادر كفايه اني اتحسن لوحدي , مش انا الي مريض يا زياد صدقني , كده كده انت هتفهم قصدي بعد ما تفوق من الي انت فيه .. مقدرتش اتكلم , او كان وقتها شاغل تفكيري حاجات كتير سرحت فيها , يليها خبط على باب العياده . اتفضل خش , ازيك يا توفيق , عينيك بتلمع يعني شكل في جديد . رد وقالي : انت عارف انا بعزك قد ايه , قولت صفقه زي دي مينفعش افوتها عليك . طلعت سيجار من درج المكتب وولعتها وبدأت اسمع . توفيق : انت عارف السنين الطويله,و العشره الي ما بينا وان لو كان حد تاني مكاني كان ممكن يستعين بغيرك وياخد نسبه اقل واخنصر انا منها. رديت عليه وقولتله اينعم سنين الجامعه مكنتش بطيقك فيها وكنت بعتبرك بني ادم بتاع مصلحتك وبس لكن بانتك جدعنتك معايا بعد كده في مصالح كتير .. قولي المفيد يا توفيق انا سامعك . توفيق : بص يا سيدي , عزام باشا كلمني في شغلانه جديده محتاجين فيها حد يكون خبره في المجال الي احنا فيه وانا ملقتش انسب منك الصراحه . قولتله : متحورش عليا وقولي انه باعتك ترجعني تاني , انت عارف يا توفيق ان انا سيبت الشغل مع عزام من فتره طويله , اينعم مواجهتش مشكله بس انا دلوقتي ليا شغلي , والملايين الي انا حطيتها في الشغل ده مستعد اني اكمل بيهم وهقدر اطلع ارباح كويسه غير املاك ابويا , الا اذا كان .. قاطعني وقالي : بصراحه هو اصر عليك , وهيعرض عليك نسبه محترمه ممكن تكسبك اضعاف ارباح شغلك . بس دي محتاجه سفريه بعيده شويه زياد : مش مشكله اعتبر الموضوع خلصان بس يكون كلامك صح فعلا ومتكونش حركه من عزام عشان يرجعني الشغل على حاجه متستاهلش. توفيق : صدقني يا زياد عزام باشا ملقاش انسب منك في شغل زي ده خصوصا اني مش هقدر اروح , مش عارف , فكرت كتير وحاجه جوايا تقول مروحش ولا انها صفقتي , يمكن لو عزام اقنعني بنسبه كويسه ممكن اروح .. توفيق فجأه جاتله مكالمه حسيت منها انه استعجل وانه هيمشي من العياده وخرج على طول من غير ما يقولي كلمه . بس توفيق وهو داخل كان معاه شنطه صغيره ولما خرج كان ايده فاضيه . لما دققت اكتشفت انه نسى الشنطه تحت المكتب . لوهله حسيت بصوت همس في العياده اصوات خفيفه يمكن مش مسموعه الا لو ركزت معاها , على الرغم من تركيزي الا اني مقدرتش اميز اللغه الي بيتهمس بيها بس , بس اللغه دي نوعا ما قدرت اميز انها لغه قديمه ومتمتش صله بأي لغه حاليه . نوعا ما كنت متعلم لغات قديمه كتيره بحكم شغلي مع عزام . الصوت ده جاي من شنطه توفيق ! ..........