بدون عنوان

الفصل ال1 


(في نهار يوم جديد الشمس فيه كانت حلوه كان ماجد رايح جاي في مكتبه لان دي فتره الاستراحه بتاعته وفي ايده فنجان قهوه بيشربه باستمتاع قبل ما يقتحم مكتبه مؤمن صاحبه يفزعه كالعاده والقهوه تغرق قميصه ودي اكتر حاجه بيكرهها ماجد ان هدومه تتوسخ..


ماجد: يعني اعمل فيك ايه دلوقتي هو انت مش ناوي تكبر مش هتبطل غباء بقى في حد يدخل كده على حد والله انا لو كبير شويه في السن كان جالي ازمه قلبيه ومت منك... دنتى مش مدينى فرصه اتخيلك كبير وعاقل وممكن يبقالك بيت وعيله وتتجوز وكده.. اهطل يعني. 


مؤمن: مش انا دخلت كده يبقى فيه..!! وبعدين يا عم ما كانوش نقطتين قهوه يعني وقعوا على القميص ده حتى دلق القهوه خير روح البس البدله الاحتياطي اللي انت ماشي بيها على طول وقارفنا وما تكبرش الحكايه بقى يا ميجو..وانا مقولتش انى ناوى اتجوز أنا كده حر طليق بمزاجى ومش عاوز اتجوز هى رخامه يعني..


ماجد: قال يعني انا ماشي ببدله زياده رخامه مني ما هو بسببك دي المره ال 12 اللي تخليني اقف الوقفه دي وانت عارف ان بكره اوسخ هدومي بالشكل ده تفتكر يعني لو انا مش ماشي ببدله احتياطي كنت همشي في وسط الناس ازاي ولو في اجتماع ولا حاجه احضره ازاي... وبعدين انت فاكر ان فى اصلا. واحده هتقبل تتجوزك.. دى تبقى امها داعيه عليها فوق السطوح وهى كاشفه راسها فى يوم مطرر. 


مؤمن: اقعد انت زي كل مره حقق في التفاهه و قولى سطوح وجواز وبتاع و اتعصب عالفاضيه والمليانه وسيب الحاجات المهمه..عشان تعرف انك تافه وسطحى.. 


ماجد:أنا بردوا اللى تافه وسطحى طيب يا سيدى ايه بقى هو المهم يا اخرة صبري ما تنطق بدل ما انت عمال تضيع في الوقت والاخر تقولي انت نستني كنت جاي اقولك ايه.


مؤمن: انا كنت دلوقتي عند ابوك في مكتبه وتخيل بقى يا معلم كان بيكلم مين على التليفون وانا سمعته ولا اخفيك سرا جيت على طول علشان اقولك...وقبل ما تعلى صوتك و من غير لف ودوران مش هسيبك تحتار كثير وهقولك ابوك كان بيكلم عمك عز الدين بنفسه.


( اتفاجئ ماجد من كلام مؤمن وان ابوه كان بيكلم عمه بعد كل السنين دي.


ماجد بصدمه: ليه ثاني مش انا قفلت الموضوع ده من سنتين فاتوا.... ايه اللي فكرهم بينا تاني وخلاهم يرجعوا يفتحوا القديم هو أنا مش هخلص من الموضوع ده بقى و افوق لنفسى..


مؤمن: ما يمكن ما بيتصلش علشان حكايه جوازك من بنته ويكون عايز حاجه ثانيه خالص احسن تكون ياض فاكر نفسك الحلو اللي سابق سنه هو مفيش غيرك على الكوكب... أنا سمعت من ود اختك ان العروسه دى كانت مزه على حق و امورة.. 


ماجد: والله انت عيل تافه انا مش قصدي كده خالص بس هما كل ما بيتكلموا ما بيبقاش عندهم غير الموضوع ده.. وبعدين لم نفسك دى بنت عمي بردوا.... على كل حال لو حاجه ثانيه هتلاقي بابا بيرن عليا حالا علشان يقولي ما انت عارفه.


مؤمن: اكيد هو بيعرف يخبي عنك حاجه وكمان شفت اديك نسيت القهوه اللي اتدلقت عليك وده معناه في علم النفس ان الموضوع ما كانش مهم يلا سلام انا بقى. 


(خرج مؤمن بسرعه وهو بيضحك وساب ماجد واقف يبص لهدومه بغضب شديد وبعدين راح عند الشماعه وغير بدلته بسرعه ولقى ابوه بيرن عليه.


ماجد: الو صباح الخير يا باشا اخبار معاليك ايه النهارده والله كنت لسه هتصل بيك...


شرف: صباح النور يا سيدي ممكن حضرتك تشرفني بزيارتك الكريمه على المكتب بتاعي بسرعه علشان عاوزك... وهحاول اصدق إنك كنت هتتصل بيا وكده. 


ماجد: طيب ما تيجي انت تشرفني في مكتبي ونشرب القهوه سوا وتقولي انت عايزني ليه ده كلها يعني حيطه اللي ما بينا...هو انت جاى من الصين...


شرف: ده على اساس ان انت يعني هتجيلى من اخر الدنيا ده انا في الاوضه اللي جنبك قوم يلا تعالى هو مين اللي المفروض يروح لمين على فكره انا اللي الكبير وابوك كمان.


ماجد: لا يا باشا انت لو هتمشيها مقامات فانا اقوم اجيلك حالا انا بحسب انها زياره وديه مش اكثر واننا هنشرب مع بعض القهوه في جو اسري هادي. 


شرف: كفايه لماضه بقى وتعالى وقول للسكرتيره وانت داخل تبعتلنا القهوه ولو اني عارف انك شربتها من غيري يا ندل زى كل يوم....


( وبالفعل راح ماجد لمكتب ابوه وهو شايل صينيه القهوه بنفسه واتفاجئ شرف الدين ابوه لما لقاه داخل عليه بالقهوه ابتسم وقعد على الكنبه.


شرف: انا قلتلك اطلبلنا القهوه في طريقك مش تجيبها في ايدك وانت جاي.... من امتى التواضع المبالغ فيه ده يا باشمهندس تتحسد والله. 


ماجد: يا سيدي فوت ده حتى من تواضع لله رفعه المهم انا مشغول جدا ومع ذلك جيت اهو علشان اشوف طلباتك برغم ان انت اللي موصيني على الشغل اللي في ايدي الا انك بردو انت اللي معطلني عنه يلا اهري.


شرف: اهري يا قليل الادب.. تقصد اقصر يعني واجيب من الاخر في ولد محترم يقول لابوه كده ماشي يا سيدي شوف عمك كلمني النهارده وطلب مني طلب وبصراحه انا وافقت.


( اتعصب ماجد وفكر ان هو وافق على جوازه من بنت عمه ووقف وهو متغاظ.


ماجد بتسرع: ثاني يا بابا مش احنا قفلنا الحوار ده بقالنا سنين وحضرتك ازاي توافق على الكلام ده من غير ما ترجعلي هو انا عيل صغير يعني مش انت اللي عودتني ان قراراتي اخدها بنفسي وما اسمحش لحد انه يتحكم فيا حتى لو كان حضرتك. 


شرف: جرى ايه يا ماجد انت هتعلي صوتك عليا ولا ايه ثم ان الموضوع ابسط من كده هو انت ان شاء الله لما تكبر هتكبر عليا انا ويوم ما تاخد قرارات هتلغيني...أنا مفيش حاجه تقدر تلغى قراراتى فى حياتك..انت فاهم..


ماجد بغضب: ابسط من كده بقى حياتي ومستقبلي عندك تافهين للدرجه دي يا بابا انا رفضت من زمان وسامحني انا مش موافق على الكلام ده ولو جيت تكلمني في الموضوع ده بعدها ب 100 سنه كمان بردو هرفض.


شرف: رفضت ايه ومش موافق على ايه انا مش فاهم قصدك ولا فاهم حتى انت بتتكلم على ايه بالظبط...ما توضح كلامك عشان افهمك. 


ماجد: اقصد ايه انت هتعملهم عليا يا شرف انا اقصد نجمه هو في غيرها مش موضوع جوازنا ده انا قفلته من زمان وانتهينا ايه اللي جد بقى يخليك ترجع تفتحه تاني وتتكلم فيه وتدى كلمه لعمى كمان. 


شرف: اللي جد انك اتجننت يا حبيبي مين اللي قالك ان هو ده الموضوع اللي انا عاوز اكلمك فيه انت فاكر نفسك مين توم كروز.


ماجد: امال لو عمي مش عايزك في كده يعني هيكون عايزنا في ايه ثاني هو في عنده موضوع بيفتحه غير موضوع نجمه والجواز....ما انتوا ربتولى روشه فى دماغى من كلامكوا...


شرف: اه طبعا في مليون موضوع ممكن نتكلم فيه غير الموضوع ده..ده اخويا والكلام بنا ما بيخلصش.. 


ماجد: طيب يا سيدي حقك عليا عمي كلمك وعاوز ايه غير الموضوع ده يمكن انا ظالمكم وليكوا عندى حق عرب...


شرف: عمك يا سيدي هيبني عماره جديده في البلد وعايزك انت بالذات اللي تشرف عليها فهمت يا فالنتينو عصرك واوانك...يعني عاوزك فى شغل مش جواز ولا حاجه....


( وفي بيت عائله شرف كانت الرقيقه ود بتفطر مع والدتها بجمالها المتواضع خلصت اكل بسرعه وقالت لوالدتها فاديه..


ود: يلا يا ماما قومي معايا بقى علشان نجهز الشنط بسرعه ولا انتى عاوزه نتعطل زي كل مره وبابا يفضل يستعجلنا...


فاديه: تاني يا ود هتقوليلي شنط... شنط ايه بس يا بنتي مين اللي قالك اننا هنسافر بس. 


ود: يا ماما اسمعي الكلام وخلينا نكسب وقت بدل ما بابا يتعصب علشان بنتاخر في تحضير الشنط زي كل مره ويفضل يقول انتم مش منظمين ودي هرجله وما فيش حد فيكوا مسؤول.


فاديه: هو بابا كلمك وقالك نجهز الشنط ولا اكلمك على سفر اصلا علشان تتكلمي بالثقه دي يا قلب ماما... ولا انتى بتنجمى. 


ود: ابدا يا ماما مفيش حاجه من دي حصلت وبابا ما كلمنيش بس انا بقولك هنسافر انا حاسه ان بابا هيكلمك بعد شويه ويقولك جهزي الشنط يا فاديه علشان هنسافر البلد انا بقى علشان بنت اموره ومطيعه قلت نكسب وقت واقولك تحضري الشنط من دلوقتي يلا بقى.


فاديه: حاسه يا سلام عليك يا ست الحساسه وانتى بقى عايزاني اقوم اجهز الشنط واشيل واحط بناء على احساسك بس طب واحساسك ده بقى ما قالكيش هنغيب قد ايه علشان اعمل حسابي في الهدوم وخلافه وما ننساش حاجه.


(ود كانت من الناس الروحانيين اللي بيعرفوا الحاجات قبل ما تحصل ويحسوا بيها كمان ضحكت ساعتها على تريقه امها على كلامها وبصتلها ببراءه.


ود: مش عارفه بالضبط والله بس برغم تريقتك عليا الا اني اعتقد اننا هنغيب شهرين او اكثر على حسب يعني الجو هناك عامل ايه وايه اللي هيحصل فى فترة وجودنا هناك. 


(كانت ود لسه ما خلصتش كلامها مع فاديه وتليفون فاديه رن برقم شرف وبصت لود بخوف وقتها وردت.


فاديه: الو ايوه يا حبيبي. 


شرف: ايه يا حبيبتي صحيتوا ولا لسه نايمين.


فاديه: لا يا حبيبي صحينا من بدري وفطرنا كمان. 


شرف: طيب انا عاوزك تحضري الشنط بقى علشان احنا مسافرين.


فاديه برعب: مسافرين..!!!! مسافرين رايحين فين. 


شرف: هنروح البلد عند اخويا عشان طلبني وعاوزنا.


فاديه: البلد اه.. حاضر هجهز الشنط بس ما تعرفش هنقعد قد ايه تقريبا. 


شرف: يمكن نقعد شهرين او اكثر لسه ما اعرفش حسب الظروف يعني.


فاديه: شهرين اه تمام ماشي يا حبيبي هحضرهم سلام انت دلوقتي. 


(خلصت فاديه المكالمه وبصت لود بخوف لانها كانت عارفه اللي هيحصل قبل ما يحصل. 


فاديه: انا هتجنن انتى عرفتى ازاي ان احنا رايحين وبالتفاصيل دي.


ود: انا بقول بدل الكلام الفاضي ادخل اجيبلك كوبايه ليمون علشان شكلك هتقعي مني واجهز شنطتي في السريع.


( وفي الوقت ده عند ماجد ووالده في الشركه كان بيدور ما بينهم الحوار كالتالي.


ماجد: يعني انا شايفك وافقت وقررت وكلمت ماما كمان تجهز الشنط من غير حتى ما تفهمني اشمعنا انا اللي اروح ما عادي ان اي مهندس ثاني يحل محلي ويروح هو يشرف على العماره دي ليه انا بالذات.


شرف: علشان انت عارف عمك كويس شكاك وموسوس وما بيثقش في حد وهو بيرتاحلك فقالي بقى ان ما فيش حد غيرك هيخلصله الشغلانه دي وانه هيزعل جدا لو انت رفضت يا ريت بقى نبطل عند وما تقلش مني قدامه كفايه احراجي معاه في الموضوع القديم بتاع نجمه.


ماجد: معاش ولا كان اللي يقل منك يا بابا مش قصدي والله بس الشغل اللي هنا هيتعطل وانت عارف ان تحت ايدي شغل كتير مين بقى اللي هيخلصه في غيابي


شرف: انا هكلف حد من الموظفين التانيين يخلصوا بدالك الموضوع بسيط يا ابني ما تعقدهاش.


ماجد: بس كده الحمل هيبقى كثير عليك يا بابا لحد ما ارجع وانا مش عاوز اتعبك. 


شرف: لا ما انا هاخد اجازه واجي معاك هو انت يا اهبل مش لسه سامعني بكلم امك واختك علشان يجهزوا الشنط اهو بالمره نغير جو وبعدين المدير التنفيذي هيحل محلي امال لازمته ايه.


ماجد: انت بتقفلهالي يعني طيب خلاص انا موافق بس على شرط.


شرف: شرط ايه ثاني اللي بتشرطه على ابوك يا استاذ عقد دي القوالب نامت والانصاص قامت.


ماجد: انا عاوز مؤمن يجي معايا يا اما مش هروح انا ما بعرفش اشتغل من غيره فلو هو ما جاش مش هسافر قلت ايه بقى.


شرف: لا ده انت خذ مؤمن وابوه وامه وجيرانه وجيران جيرانه هو يعني مؤمن غريب ده زي ابني انا موافق قوله يجهز شنطته علشان هنسافر الصبح بدري ويجي يطلع معانا في عربياتنا كمان مرضي كده يا عم.


ماجد: اوف كده يبقى مفيش قدامي غير اني استسلم واروح اجهز الشنط بتاعتي ده انت رهيب.


( وهناك في شمال الصعيد في بيت عز الدين كان قاعد مع مراته وبنته نجمه وبيدور بينهم الحوار ده.


عز: انا جلتلك يا صفيه شرف كلمني وجالي ان ماجد ولده وافج ان هو اللي يشرف على عمارته الجديده بنفسه هو انتي فاكره انه يقدر يكسر لابوه ولا ليا كلمه حجى دي كانت تبجى حكايه العيال يحكوها والله. 


صفيه: وهو انت ايه اللي خلاك تفكر ان ماجد ممكن يرفض يجي البلد ويباشرلك العماره الجديده ما هو طول عمره ولد حلال وطيب وما سبجش جبل اكده انه رفضلك طلب ايه اللي اتغير يعني.


( ما كانش عز الدين عاوز يرد على سؤال صفيه علشان خايف على مشاعر نجمه لكن نجمه هي اللي ردت عليها. 


نجمه: ابوي يجصد علشان موضوع جوازنا ياما فاكر انه الحديت ده لسه في عجل ماجد ما يعرفش انه تلاجيه نساه من زمان ومش بعيد يكون حب واحده ثانيه كمان وما بيفتكرش اصلا الحكايه دي.


عز: يا ابوي عليكى يا نجمه لما تتخني عجلك انا والله ما كانش جصدي اكده انا كل غرضي ان اخليهم يرجعوا ثاني يجوا البلد عشان ما حدش يجول انهم جطعوا رجلهم لما عرضنا عليهم موضوع جوازك من ماجد ويفكروا اننا كنا هنغصبهم عليكى ولا حاجه ده انتى ست البنات واللي يرشك بالميه اغرجه في الدم هو انتى مش عارفه ابوكي ولا ايه ولا تكونيش مستجليه بيا. 


نجمه: ما حصلش حاجه يا ابوي انا بس اللي بجيت بزعل من اجل حاجه حتى اتفه كلمه بجت بتدايجني وعلى كل حال ده ابن عمي ويشرف وجت ما يحب الدار داره هو انت ناسي ان هم كانوا كل اجازه عندنا وفي اي وجت كانوا يحبوا يغيروا جو كانوا بيجوا على هنا على طول من غير دعوه.


عز: ما هو انا عايز ده يحصل ثاني مش عاوز يبجى ده السبب اللي يجطعنا من بعض بس ما كانش جصدي ازعلك بكلامي.


صفيه: بنتك عاجله يا عز ولا هتزعل ولا حاجه والموضوع ده اصلا مش في دماغها ربنا يكملك بعجلك يا بنتي اهو اكده العجل زينه. 


عز: اهو انا عايزك اكده لما يجوا يا بنتي عاوزك تبجي بنت عمه وبس ولا كأن حاجه حصلت جبل اكده حتى انا وامك مش هنفتح معاه الموضوع ده واصل. 


نجمه: اللي تشوفه يا ابوي.


( قامت نجمه وسابت امها وابوها قاعدين لان كل ما الموضوع ده بيتفتح بيضايقها.


صفيه: هو صحيح يا عز الموضوع ده اتجفل زي ما انت جلت لنجمه دلوك ولا انت بتصبرها وبس. 


عز: الموضوع ما اتجفلش بالنسبالي يا صفيه لكن انا مش عاوز اضغط على الواد علشان ما يفكرش ان احنا راميين روحنا عليه لكن انا جايبه مخصوص البلد علشان اشوف اخرتها معاه ايه.