الشايب - فريق الربيع!
جاري التحميل...
فريق الربيع!
نظر له الجميع بإهتمام صاحبه العديد من التساؤلات في مخيلتهم ... في تِلك اللحظة فُتِح الباب وظهر رجل يدخل رأسه من الباب بخوف فقال "رائِف" بسخرية :
_ممنوع الدخول .
أخرج بطاقته التعريفية فأدّى الشُرطي التحية العسكرية وادخله إلى مسرح الجريمة ... بعدما دخل أخرج قناعٌ طبي ووضعه على أنفه حتى لا يختنق من تلك الرائحه الكريهة ..اتاهُ صوتُ رجل يقول :
_راكان باشا
نظر له راكان ثم قال بتساؤل :
_اي الريحة دي ..وفين الجثة ؟
فأجابه رجل البحث الجنائي بهدوء :
_دي ريحة حمض الهيدروفلوريك القاتل استخدمه لتحليل الجثة.
فقال راكان وهو يبحث بعينيه داخل المنزل :
_طب اللي عمل بلاغ عرف منين؟
_القاتل ساب الباب مفتوح يا فندم .
فقال راكان بتفكير :
_يعني القاتل حلل الجثة بس ساب آثار الدم وسلاح الجريمة والباب مفتوح!
أومأ الرجل برأسه مؤكدًا على حديثه ثم قال :
"الغريب يا فندم إن القاتل ساب عظمة واحدة من الجثة جنب البانيو ...احنا بعتناها المعمل عشان نعرف هوية الجثة "
رمقه راكان بنظرات مليئة بالحيرة والدهشة كاد أن يقول شيئًا ولكن قاطعه صوت فتاة في منتصف العشرين وهي تحاول تخطي الشرطي :
_يافندم انا صحفية ومن حقي ادخل
اتاها صوت راكان وهو يخرج من الداخل ويقول :
_مينفعش تدخلي يا آنسة يلا لو سمحتي.
فقالت الفتاة وهي تنظر له بصدمة :
_حضرتك المقدم راكان الغزالي ؟
اومأ راكان بمعنى نعم فقالت وهي تعدل نظارتها الطبية :
_انا إسراء العامري ..كتبت مقال عن حضرتك قبل كدا .
فقال راكان بهدوء :
_اتشرفت بيكِ .
ثم حمحم وقال بصوته الرخيم :
_معتقدش إن دا مكان مناسب للتعارف ممكن حضرتِك تنزلي تحت عشان محدش هيدخل مسرح الجريمة .
فأردفت هي بسرعة :
_ طب ممكن اخد صورة واحدة بس .
حرك راكان رأسه بمعنى لا ..فشعرت أن وجودها بلا جدوى فغادرت بهدوء .
بعد مغادرتها عاد راكان إلى الداخل ونظر عن كُثب فوجد ورقة لعب على شكل "الشايب" وبجوارها سلاح الجريمة .
بعد يومين في قسم الشرطة .
كان راكان يقف داخِل غرفة إجتماعات وأمامه رئيسه وشرطي برتبة رائد وشرطية برتبة مقدم ... هتف رئيسهم المدعو "رائِف" بحدة :
_يعني ايه 3 جرائم بشعة زي دي تتم ولحد دلوقتي منعرفش القاتل ؟.
اجابه راكان بهدوء وهو يخرج عدة صور من مسارح الجرائم :
_اعتقد الجاني واحد يا فندم ... لو بصينا هنا هنلاقي إن جنب كل جثة أداة الجريمة موجودة وكمان القاتل بيتعمد إنه يُظهِر الجريمة مش يخفيها وآخر حاجة إن كل مرة بيبقى موجود ورقة كوتشينه على شكل الشايب ...ماعدا اول ضحية ورقة الكوتشينه على شكل بنت.
فقالت الشرطية المدعوّه "ليلى" :
_ آه يا فندم انا كمان لاحظت إن الضحايا الـ 3 كانوا في نفس المدرسة الثانوية وكمان كانوا صحاب وفيه بينهم بيزنس ... لما عملت تحريات عرفت إنهم كانوا 5 صحاب واحد منهم مـات في حادثة اتقيدت ضد مجهول وواحد منهم بيشتغل دلوقتي في مجال المعمار .
فقال "رائف" بتساؤل:
_طب واللي اتوفى دا عنده أبناء او عائلة ؟ .
فقالت ليلى بهدوء :
_ كانوا معاه في الحادثة والعربية اتحرقت بيهم يا فندم.
أومأ لها الرئيس ثم نظر إلى زميلهم الثالث وقال بتساؤل :
" وانت يا خالد معندكش حاجة تقولها "
فقال خالد بهدوء :
_في مغنية اسمها كاميليا شغالة فـ نايت إسمه الخريف .
اردف راكان بسخرية :
_نايت إسمه الخريف دا ازاي يعني .
ابتسم خالد ثم أكمل حديثه:
_الإسم غريب بس الأغرب إن كاميليا دي مبتغنيش غير مرة واحدة بتبقى كل شهر يوم 22 والأغرب إن كل واحد من الضحايا اتقتـل بعد ما حضر الحفلة دي بحوالي 4 ساعات .
نظر له الجميع بإهتمام صاحبه العديد من التساؤلات في مخيلتهم ... في تِلك اللحظة فُتِح الباب وظهر رجل يدخل رأسه من الباب بخوف فقال "رائِف" بسخرية :
_اهلاً اهلاً بـ آسر باشا نموسيتك كحلي يا بيه.
دخل آسر ثم أغلق الباب وقال بسرعة محاولاً كبح غضب الرئيس:
_انا بتأخر لية يعني ..جايبلك اخبار سخنة إنما إيه طازة كدا.
ضحك الجميع على طريقة حديثه عدا "رائِف " الذي تهكم بسخرية لاذعة قائلًا :
_ اشجيني يا بتاع قراقيش ستي .
فقال آسر وهو يضع أمامهم عدة أوراق:
_شوف يا ريس ..بعد العديد من التحريات التي قمت بها وحدي وبمفردي.
تمتم راكان بهمس لم يسمعه احد سوى آسر :
_إخلص عشان الريس على آخره .
حمحم آسر بقلق ثم قال :
_الـ 3 ضحايا قبل موتهم بشهر اخدو قرض من واحد كدا شغله مشبوة إسمه "جمال الماظ".
ضحكت ليلى بخفوت على الإسم فقال آسر بنبرة مازحة:
_مش عاجبك الماظ ؟ عارفة معاه كام دا ؟
ضرب الرئيس بيده على الطاولة بغضب وقال :
_ مش وقت استظراف يلا .
اقترب منه آسر ووضع ثلاثة ورقات أمامه بترتيب وقال :
_الضحية الأولى "مريم هادي السعدي" اللي ماتت عن طريق الإختناق وشق العنق اتنصب عليها من شخص مجهول خسرها كل ثروتها فـ خدت قرض قبل موتـها بـ500 الف .
نظر له الجميع بإهتمام ثم أشار له الرئيس بمعنى أن يُكمل فقال وهو يشير إلى الورقة الثانية :
_الضحية الثانية "عزت الحلفاوي" اللي تم تقطيـع جثته وترك رأسه على سفرة بيته ...تعرض للإحتيال الصوتي وخسر كل فلوسه والحقيقة معرفش ازاي محامي يتعرض للإحتيال .. المهم بعدها اخد قرض بـ 500 الف بردو.
ثم أكمل وهو يُشير إلى الورقة الثالثة :
_الضحية الأخيرة حتى الآن "تُركي الصبّاح" بتاع مصانع أدوية اللي الغريب إنه مصنع منهم بيصنع حمض الهيدروفلوريك اللي القاتل حلل جثته بيه ..هو كمان اخد قرض بس لحد دلوقتي مش عارفين ثروته اختفت فين ..القرض كان بقيمة مليون جنية .
ثم أكمل بمزاح :
_جنية ينطح جنية .
فقال راكان بهدوء :
_كدا عندنا 2 مشتبه فيهم ..كاميليا المغنية وجمال الدهب .
فقال آسر بتصحيح:
_المـاظ ...جمــال المــاظ.
فقال له رائِف بعصبية طفيفة:
_ الماظ دهب كله زينة .
في تِلك اللحظة خرج صوت خالد قائلًا بإستيعاب :
_ثانية واحدة ..ليلى قالت إنهم كانوا خمسه صحاب واحد منهم مات في حادث من زمان والتلاتة الضحايا الحاليين يبقى كدا فاضل واحد .
فقال راكان بسرعة:
_ قصدك إن إحتمال دا يكون الضحية الجاية .
أومأ له الجميع فقال الرئيس وهو ينهض من مقعدة :
_ المديرية عينتكم فريق للبحث عن القاتل المتسلسل ومهمتكم دلوقتي تحددوا هوية القاتل وتحموا الضحية المستهدفة .
ثم أكمل بهدوء :
_ هنسمي القضية الشايب .
_وانتم فريق الربيع .
فقال آسر بصدمة :
_ربيع!!.
لو الفصل عجبك متنساش تعمل لايك وكومنت ❤️
التفاعل ياحلوين عشان اللي بعدة ينزل ❤️❤️🌚
