القضيه الأولي "تسجيلات أناليس"

"صرخت وقالت أنا خايفة… وبعد ساعات كانت جثة! القصة الحقيقية اللي خلت العالم كله يرتعش!"

سنة 1952، في قرية صغيرة هادية في بافاريا بألمانيا، اتولدت بنت اسمها أناليس ميشيل. بنت عادية جدًا، ملامحها بريئة، عايشة وسط أسرة كاثوليكية متدينة، بتروح الكنيسة، بتصلي، وبتعيش حياتها زي أي طفلة في سنها. محدش كان يتخيل إن البنت دي بعد كام سنة هتبقى واحدة من أكتر القضايا المرعبة والجدلية في القرن العشرين كله.
كبرت أناليس، وكانت شاطرة في دراستها، هادية، مفيهاش أي حاجة غريبة. لحد ما وصلت لـ16 سنة… وهنا البداية الحقيقية للكابوس.
فجأة بدأت تتعرض لنوبات غريبة جدًا. جسمها يتجمد بالكامل، تقع على الأرض، ترتعش رعشة قوية كأن في قوة بتعصرها من جوا. عينيها تثبت في نقطة معينة، ومتبقاش شايفة اللي حواليها. أهلها افتكروا في الأول إنها حالة صرع. وفعلاً راحت المستشفى، والدكاترة شخصوا حالتها على إنها صرع في الفص الصدغي. بدأت تاخد أدوية تقيلة جدًا.
بس الغريب إن حالتها ما اتحسنتش… بالعكس.
أناليس بدأت تحكي إنها بتشوف وشوش مرعبة بتبصلها من كل حتة. وجوه مش بشرية. بتسمع أصوات بتصرخ جوا دماغها، أصوات بتقولها: "إنتي هتتحرقي في جهنم". تخيلوا بنت عندها 16 سنة، كل يوم تصحى على صوت بيقولها إنها ملعونة!
كانت بتقول للدكتور إن في حاجة ساكنة جواها. إن جسدها مش ملكها. وإن الأصوات دي بتأمرها تعمل حاجات هي مش عايزاها. الدكتور قال دي هلوسة نتيجة الصرع والاكتئاب الديني. لكن هي كانت مقتنعة إن الموضوع أكبر من كده بكتير.
ومع الوقت… الموضوع خرج عن السيطرة.
أناليس بقت تكره الرموز الدينية فجأة، رغم إنها متربية في بيت كله صلاة. كانت أول ما تشوف صليب تصرخ وتكسره. تمزق صور المسيح. تشتم أهلها بألفاظ عمرها ما قالتها قبل كده. كانت بتعض أي حد يقرب منها. حرفيًا تعضهم بأسنانها لحد ما يسيبوا أثر دم.
مش بس كده… كانت بتمتنع عن الأكل. تقول إن "اللي جواها" مانعها تاكل. تخيلوا بنت في عمر الزهور توصل لمرحلة إنها تاكل حشرات! كانت بتلتهم دبان وعناكب قدام أهلها. كانت بتشرب بولها أحيانًا. كانت تنام على الأرض وتصرخ بالساعات لحد ما صوتها يروح.
أهلها كانوا شايفين بنتهم بتضيع قدام عينيهم.
راحوا لرجال دين كتير يطلبوا جلسات طرد أرواح. الكنيسة رفضت في الأول. لأن في شروط معينة: الشخص لازم يظهر كره شديد للمقدسات، يتكلم لغات غريبة، أو يمتلك قوة غير طبيعية.
ومع الوقت… أناليس بدأت تحقق الشروط دي كلها.
كانت بتتكلم بأصوات رجالي تقيلة. أحيانًا كأن في أكتر من شخصية بترد على بعض جوا جسمها. كانت بتقول إن ست أرواح شريرة ساكنين فيها… من ضمنهم "قابيل"، والإمبراطور "نيرون"، وحتى "هتلر". أسماء مرعبة على لسان بنت ضعيفة وزنها ما بقاش يعدي الأربعين كيلو!
في سنة 1975، الكنيسة أخيرًا وافقت.
بدأت جلسات طرد الأرواح. جلسة أو اتنين كل أسبوع. واستمرت تقريبًا 10 شهور. حوالي 67 جلسة كاملة. كانوا بيسجلوهم على أشرطة كاسيت… حوالي 40 شريط صوتي لحد النهارده موجودين.
في الجلسات دي، كانت بتصرخ صراخ يهز المكان. صوتها يتغير تمامًا. ساعات تحتاج تلات رجالة يمسكوها عشان تتهدى. رغم إنها كانت هزيلة جدًا. كانوا ساعات يقيدوها بالسلاسل عشان متأذيش نفسها.
الغريب إن بعد بعض الجلسات كانت بتهدى شوية… كأنها رجعت لطبيعتها لحظات. تبتسم. تتكلم عادي. وبعدين فجأة… النوبة ترجع أقوى من الأول.
الوقت كان بيعدي… وجسمها بيضعف أكتر وأكتر.
وصلت لمرحلة إنها بقت جلد على عضم. جالها التهاب رئوي وحمى شديدة. ومع إنها كانت بتموت بالبطيء… محدش رجعها المستشفى. لأنهم كانوا مقتنعين إن العلاج الطبي مش الحل، وإن اللي عندها "مس شيطاني".
30 يوليو 1976 كانت آخر جلسة.
أناليس كانت منهكة تمامًا. مش قادرة تتحرك. بالكاد بتتنفس. في وسط الجلسة همست وقالت: "أتوسل من أجل المغفرة".
وفي نفس اليوم بالليل، بصت لأمها وقالت بصوت مكسور: "ماما… أنا خايفة".
وبعد ساعات قليلة… ماتت.
سبب الوفاة الرسمي كان الجوع وسوء التغذية الحاد. كانت تقدر تعيش لو اتدخل طبي قبلها بأسبوع واحد بس.
الشرطة قبضت على القسيسين ووالديها بتهمة الإهمال المؤدي للموت. في المحكمة، اتعرضت تسجيلات الجلسات. أصوات مرعبة، جدال بين "كيانات" مختلفة، نبرة صوت رجالي غليظة طالعة من بنت ضعيفة.
الدفاع قال إنها كانت ممسوسة. الطب قال إنها كانت مريضة نفسيًا وبتعاني من صرع حاد واكتئاب ديني شديد.
المحكمة حكمت عليهم بـ6 شهور سجن مع وقف التنفيذ.
بعد موتها، ناس كتير اعتبروها شهيدة أو قديسة اتعذبت. قبرها بقى مزار لناس من كل حتة. وقصتها وصلت لهوليوود، واتعمل فيلم مستوحى منها اسمه
The Exorcism of Emily Rose
اللي خلى ملايين يشوفوا القصة… لكن الحقيقة كانت أوجع بكتير من أي فيلم.
لحد النهارده، السؤال لسه مفتوح…
كانت ممسوسة فعلًا؟
ولا كانت ضحية مرض نفسي اتفهم غلط؟
ولا ضحية إيمان أعمى منع العلاج؟
القصة دي مش مجرد رعب… دي مأساة حقيقية لبنت كانت بتصرخ طلبًا للمساعدة… والكل كان بيسمع الصرخة بطريقته.
ولو فاكر إن اللي قرأته ده مرعب… تخيل التسجيلات الحقيقية لصوتها وهي بتصرخ في نص الليل.
ساعتها هتفهم ليه اسم أناليس ميشيل لحد دلوقتي بيخلي ناس كتير مبتقفلش النور وهي نايمة.

"فوز الجزار"