بدون عنوان

الحلقة الثامنة
*تفتح ريهام الباب وتلاقى عمرو وتكون مبسوطة اوى *
عمرو:صباح الخير
ريهام*بأبتسامة*:عمرو مش مصدقة نفسى ده حقيقى ولا بجد
عمرو:لا ده فعلا ,ايه هفضل واقف على الباب ولا ايه
ريهام*لنفسها:ده انا مصدقت انك جيت*:لا طبعا اتفضل ادخل
عمرو*يدخل ويلاقى حنان وابراهيم وهنا قاعدين بيفطروا*:السلام عليكم
هنا*اول ما تسمع صوته تبصله وبعد كدا تبص على الطبق القدامها وقلبها يدق جامد اوى ووشها يحمر خالص وتسكت*
حنان,ابراهيم:وعليكم السلام ورحمة الله وبركاته
عمرو*بص لهنا وبهزار*:بقول سلام عليكم ,الناس اللى هنا مش سمعانى ولا ايه
حنان*ضحكت*:لا هى بس بتاكل عشان كدا مش بترد
عمرو:طيب
حنان*بتشاور عليها*:دى هنا بنت اختى وجت تعيش معانا بعد وفاه والدها الله يرحمه 
عمرو*مد ايده عشان يسلم عليها*:ربنا يرحمه,اهلا وسهلا تشرفنا
هنا*سلمت عليه وبصتله وبعد كدا بعدت ايديها بسرعة*
ابراهيم*بستغراب*:خير يا عمرو حصل حاجة!!
عمرو:لا خير يا خالو محصلش حاجة اصل بقالى كتير ماشوفتكش*وبص لها بجمب عينه*:وبصراحة وحشتنى ياخالو قولت اجى اشوفك
حنان:خالك بس يا واد
عمرو*ابتسم*:وطبعا مرات خالى حنونة 
حنان*ضحكت*:طيب اقعد افطر بقى
عمرو*قعد بسرعة جمبها*:فعلا يا مرات خالى انا كنت جعان اوى ونزلت من البيت من غير مافطر
ريهام*قعدت جمب عمرو الناحية التانية*:بس بجد مفجأه جميلة اوى ياعمرو
عمرو:متقلقيش انا هفجأكوا كتير بعد كدا
هنا*بتسمع كلامه وساكته خالص*
عمرو:هى الاخت مش بتكلم ليه
حنان*بصيتله*:واد ياعمرو ملكش دعوه بهنا هى مش حملك انا عرفاك 
عمرو*ضحك*:انا عملت حاجة انا ساكت اهوه ,هى المش بتكلم ولا صوت المراه عورة
حنان*ضحكت اوى*:ياواد بطل ,هنا هادية اة بس لو اتنرفزت انا مش مسئولة عنك
عمرو:ايه ده دى طلعت شرسة اوى ,اطلع اجرى ولا اعمل ايه دلوقتى
هنا*ابتسمت*:انا خلصت ,عن اذنكوا
عمرو*وهو شايفها قايمة*:مش اكلتك دى والله ,متخافيش انا الهدفع الحساب
*هنا ابتسمت ودخلت الحمام عشان تغسل ايديها وبعديها دخلت على اوضتها *
ابراهيم*ضحك*:بطل يا واد انت, يالهوى على لسانك ,يلا انا نازل انت قاعد ولا ايه؟
عمرو:شكلك بتطردنى صح يا خالو
ابراهيم:لا ياخويا لو عايز تقعد اقعد
عمرو:لا انا نازل عشان عندى ماتش 
حنان:ابقى تعالا تانى يا واد ياعمرو ملحقناش نقعد معاك
عمرو:ماشى مادام مُصرة تعزمينى على الغدا يبقى هاجى تانى
حنان*ضحكت اوى*:بس كدا ماشى تعالا اتغدى عندنا النهاردة
عمرو*بهزار*:بصراحة مش عارف هقدر اجى ولا لا بس هحاول اجى
ريهام*ضحكت*:هنستناك على الغدا ياعمرو
عمرو*وهو بيبص على اوضة هنا مستنيها تخرج عشان يشوفها*:اكيد ان شاء الله
ابراهيم:طيب يلا عشان توصلنى
عمرو:ادفع الاجرة الاول وانا اركبك العربية
ابراهيم*بيضربه على راسه براحة*:يا واد هضربك
عمرو:تسلم ايدك يا معلم *وفضل واقف كان نفسه يشوفها قبل ما ينزل بس مخرجتش*
ابراهيم:انت هتفضل واقف يلا يا ابنى عشان متأخرش على الشغل
عمرو*وهو ماشى وراه*:ماشى يا خالو يلا سلام 
حنان,ريهام:سلام
حنان*بصت لريهام وحست انها مبسوطة اوى*:غريبة يعنى اول مرة عمرو ييجى يفطر معانا ويطلب كمان اننا نعزمه على الغدا
ريهام*مكسوفة*:مش عارفة يا ماما بقى 
حنان*تبتسم*:ماشى ياحبيبتى ربنا يوفقك ويسعدك
ريهام*بصت لمامتها*:قصدك ايه؟
حنان*مش عايزة تبينلها انها عرفت حاجة وان هنا قالتلها حاجة*:مفيش مش قصدى حاجة هدخل المطبخ بقى واشوف ورايا ايه, ما تدخلى تتعلميلك حاجة
ريهام:لا يا ماما انتى عارفة انى مش بحب اطبخ ,هنا هتقف تطبخ معاكى
هنا*تخرج من الاوضة وهى ماكنتش عايزة تخرج عشان هو برة بس لما سمعت انه نزل خرجت على طول بس معرفتش انه معزوم على الغدا*:انا هعمل معاكى الغدا يا خالتو
حنان:ربنا يخليكى يا بنتى ,اصل عمرو هييجى يتغدى عندنا ودى اول مرة عشان كدا هحتاج طلبات كتير
هنا*اول ما تسمع اسمه قلبها يدق اوى*:ليه هيتغدى معانا
ريهام*بأسلوب رخم*:هو ايه الـ ليه هو عايز يتغدى عندنا نقوله لا وكمان ده بيت خالو يعنى زى بيته
هنا:لا مش قصدى يعنى بس*وتسكت*:خلاص يا خالتو اى حاجة انتى عيزاها هنزل اجيبها
حنان*تبتسم*:ماشى يا حبيبتى ادخلى غيرى هدومك وانا هكتبلك كل ال احنا عايزينه والمحل قريب مش بعيد
هنا:حاضر يا خالتو
*وتدخل هنا تغير هدومها ومن جواها فرحانة اوى مش عارفة ليه كل ما تشوفه وتسمع صوته بتنبسط اوى واتفجأت فعلا لما شافته النهاردة خصوصا انها ماكنتش متوقعة خالص انها هتشوفه لكن برده كانت خايفة اوى انها تصحى على كابوس كل ما تعرف ان ريهام بتحبه مستحيل انها هتكسر قلب بنت خالتها عشان خاطر هى تفرح كل ما تحس بحب من ناحيته وتفكر فيه كحبيب تطرد الفكرة دى بسرعة وقررت انها هتتعامل معاه عادى وانه هيبقى مجرد واحد قريبها وبس,عمرو كان مبسوط اوى انه هيشوفها تانى وبيفكر ازاى يخليها تحبه وتأمنله وتصدق انه هو بيحبها بجد من اول يوم شافها فيه واديتلوا الجاكيت وفضل يفكر فيها بعد ما خلص وقف مع اصحابه*
كريم:عمرو احنا هنخرج النهاردة هتيجى معانا
عمرو:لا مش هينفع
اسامة:ليه دى هتبقى خروجة جامدا يامعلم
رامى:تعالا معانا ياعمرو عشان الخروجة تكمل
عمرو:مش هينفع والله ياشباب 
بسام:ليه وراك ايه يعنى
عمرو*بص ل بسام وغمزله عشان يفهم*:عندى مشوار مهم يا بسام
بسام*مفهمش*:مشوارايه ده
عمرو*قرب منه وقال بصوت مش مسموع*:انا لو بفهم فى بيهيم كان فهم ,مشوار زى ما كل الناس بتروح مشاوير
بسام:ايون ايه هو برده
عمرو:يا ابنى افهم عندى مشوار *وبصله وكأنه بينفض الجاكيت بتاعه*:فى حاجة واقعة على الجاكيت بتاعك شوف ايه الـ على الجاكيت ده
بسام*بص على الجاكيت بتاعه ملقاش حاجة بس فهم قصده اول ما قال الجاكيت*:اة صح خلاص ياعمور روح مشوارك
رامى:هو فى ايه بظبط انت رايح تقابل ياعمرو 
عمرو*بص لرامى جامد*:رامى انت عارف كويس انى مليش فى حوار المقبلات والكلام الفارغ ده 
رامى:اومال مش عايز تخرج معانا ليه
عمرو*بضيق*:معزوم عند خالى على الغدا
كريم:طيب ياعم ما تقول كدا من الصبح
عمرو:انا قولت اهوه 
اسامة:خلاص يا معلم روح وتتعوض فى خروجة تانية ان شاء الله
عمرو:ان شاء الله
بسام:ماشى ياعمور ,مع السلامة ومتنساش تبقى تلبس الجاكيت
عمرو*ابتسم لصاحبه*:سلام ياجماعة
*وخرج من النادى وركب العربية وبعد ما مشى بشوية شاف واحدة واقفة وبتعيط قرب بالعربية شوية لقاها هنا وقف بالعربية ونزل منها بسرعة وقرب منها*
عمرو:هنا
هنا*اول لما شافته فرحت اوى*:عمرو
عمرو*مسك ايديها*:فى ايه مالك
هنا:انا كنت نازلة عشان اشترى حاجات لخالته وفضلت ماشية زى ما ريهام وصفتلى بالظبط بس انا فجأه لقيتنى توهت ودخلت فى شوارع كتير ومش عارفة اوصل خالص وكمان نسيت الموبايل يعنى مش هعرف اتصل بخالتو او بأى حد
عمرو*يمسح دموعها ويبتسم*:طيب اهدى يا حبيبتى ,هى شوارع القاهرة كلها شبه بعضها وتلغبط 
هنا*تهدا وتبص لعيونه وتسرح وشوية وتبعد عنه وتبعد ايديه*:انا عايزة اشترى حاجات لخالتو تعرف محل اشترى منه 
عمرو*بهزار*:اعرف محل يا بنتى انا اعرف محالات ده انا الى راسم خريطة مصر دى اصلا
هنا*تبتسم*:طيب لو سمحت ودينى اشترى الحاجات
عمرو:بس كدا من عنيا الاتنين ,اتفضلى اركبى
هنا*تتردد شوية*:مينفعش نروحها مشى
عمرو:يا بنتى هو انا هاكلك اركبى متخافيش مش حاطط كلب حراسة فى العربية ,اركبى بقى ماتتعبيش قلبى *وبصالها بحنية*:رغم ان تعبك راحة
*هنا اتكسفت اوى وركبت من غير ماترد عليه وراحت محل بتاع خضار وراحت محل فاكهة وجابت فواكه وحاجات كتير وبعد ما اشتريت ده كله ركبت معاه*
عمرو:ده كويس انى معاكى انتى كنتى هتشيلى ده كله ازاى
هنا:اة كويس
عمرو*ابتسم*:بس انتى توهتى ازاى
هنا:مش عارفة فجأه لقيتنى فى شوارع كتير وكل ماسأل حد يدخلنى فى شارع تانى بس انا كنت هتصرف يعنى
عمرو:تتصرفى ايه ده لولا انك شوفتينى كنتى هتفضلى واقفة تعيطى
هنا*اضايقت اوى من كلامه*:على فكرة الغلط مش منى بس ريهام وصفتلى المكان غلط هى قالتلى المحلات بعد 3 شوارع وهتدخلى شارع جانبى هتلاقيهم لكن هو كان غير كدا خالص
عمرو:خلاص انتى اتنرفزتى كدا ليه انا مش قصدى اضايقك قصدى يعنى ان ربنا بيحبك عشان شوفتك وجيتلك يعنى مكتوبلنا اننا نشوف بعض كل مرة بالصدفة 
هنا*فهمت قصده وباصتله وقامت بصيت قدامها وسكتت*
عمرو:على فكرة انا جيت النهاردة عشان اشوفك وبرده اصريت ان طنط حنان تعزمنى على الغدا عشان اجى واقعد معاكى اطول فترة ممكنة
هنا*كانت بتسمع كلامه ومبسوطة اوى ووشها يحمر*
عمرو*بصصلها*:بجد انا بعشق كسوفك ده شكلك حلو اوى وانتى عاملة زى الطمطماية كدا
هنا*ابتسمت وبعد كدا بصتلوا*:ممكن تسوق وانت ساكت شوية هتفضل تتكلم كدا كتير
عمرو*بجدية*:صوتى مش عاجبك ولا ايه ياهانم فى واحدة تقول لجوزها كدا
هنا*اضايقت من الكلمة دى*:بطل بقى كلمة جوزك دى 
عمرو:ما دى الحقيقة
هنا:حقيقة ايه لو سمحت ارجوك بلاش تتعدى الحدود اكتر من كدا انت مجرد واحد قريبى بس مش اكتر
عمرو*وصل ووقف قصاد باب العمارة*:بس مش اكتر وانتى بالنسبالى حبيبتى وروح قلبى ومراتى
هنا:يووووووووووووووووه *خرجت من العربية وقفلت باب العربية جامد اوى*
عمرو*بصلها من شباك العربية*:اصله باب تلاجة هو
هنا*طلعت ومش ردت عليه على قد ما كانت مضايقة من كلامه ده على قد ما بتفرح اوى لما بتسمعه بس مش قادرة تبينله ده وفتحت باب الشقة*:انا جيت
حنان*لبسة هدوم خروج*:ايه ده يا هنا اتأخرتى كدا ليه انا كنت لسه هنزل ادور عليكى
هنا:اصل انا توهت يا خالتو 
حنان:توهتى ازاى
عمرو*طالع وشايل حاجات كتير*:حد يشيل منى حد يلحقنى *حنان وهنا ياخده الحاجة منه*
حنان:ايه ده ياعمرو انت جبت الحاجات دى منين
هنا:اصل لما توهت قابلته وروحنا سوى نجيب الحاجة ورجعنا
حنان:معلش ياعمرو تعبناك معانا
عمرو:لا ياطنط عادى ولا يهمك
هنا*بغضب*:هى ريهام فين؟
حنان:ريهام جوه فى الاوضة
هنا:طيب عن اذنكوا
*دخلت هنا وهى مضايقة اوى عشان تكلم ريهام وتسألها ليه عملت معاها الموقف ده وليه وصفتلها الشارع غلط*
تأليف:فاطــــمة هـــــشام