الفصل الأول

دارين عهد سهى وميرنا… أربع بنات ماكانوش قريبين من بعض في الأول وماحدش كان متوقع إنهم يبقوا أصحاب بس القدر كان ليه رأي تاني.
في البداية دارين وعهد كانوا مجرد معارف بسبب الدروس كلامهم كان عن المذاكرة والامتحانات بس سلامات سريعة وكلام بسيط وخلاص. دارين كمان كانت تعرف ميرنا عن طريق صاحبة مشتركة بس برضه ماكانوش قريبين.


عهد، بروحها الاجتماعية، كانت أكتر حد قريب من سهى صحاب من الطفولة بيتكلموا في كل حاجة وبيحكوا لبعض عن أحلامهم. ومع الوقت لما عهد بدأت تقضي وقت أكتر مع دارين وميرنا قررت إنها تجمعهم مع سهى ومن هنا بدأت علاقتهم تتغير.
في الأول الموضوع ماكانش سهل كل واحدة فيهم شخصيتها مختلفة. دارين كانت هادية وحساسة شايلة هموم أكتر من سنها خصوصًا بعد وفاة باباها وهي في الثانوية اللي كان كل حياتها. ميرنا كانت مقفولة شوية مش بتتكلم عن مشاعرها بسهولة وعلاقتها بوالدها ماكنتش قوية فكانت حاسة إنها لوحدها. عهد كانت طموحة جدًا بتحاول توصل لكل اللي بتحلم بيه بس دايمًا كانت تحت ضغط وحاسة إن أهلها مشغولين عنها. أما سهى فكانت عايشة حياة مستقرة بس كانت بتتعامل مع الدنيا ببساطة مش بتحب تشيل هم حاجة.


مع الوقت الحواجز اللي بينهم اختفت، وبقوا مش بس صحاب.. بقوا أخوات. كل واحدة فيهم لقت اللي كانت ناقصها عند التانية. بقى بينهم سند ودعم مش بيتغير، حتى مع زحمة الدراسة والمسؤوليات اللي كبرت مع الأيام.
عهد وسهى دخلوا نفس الكلية ودارين وميرنا مع بعض في كلية تانية، بس ده ماخلهمش يبعدوا عن بعض، بالعكس كل يوم كانوا بيقربوا أكتر. دارين كانت مع ميرنا في الامتحانات وعهد كانت مع سهى وكانوا بيسندوا بعض في كل لحظة. في مرة دارين كانت حاسة إنها مش قادرة تكمل وقاعدة لوحدها حزينة، لقت مكالمة فيديو منهم كلهم بيزعقوا: "افتحي الكاميرا يا بنتي مش هنسيبك لوحدك!" ضحكت من قلبها وحست إنها مش لوحدها.


وفي يوم امتحان عملي لميرنا اتوترت ووقعت حاجتها وسط الامتحان حست إنها هتتكسف، بس دارين بصتلها من بعيد وقالتلها: "ركزي ولا هنعزمك على قهوة وإنتِ اللي هتدفعي!" ميرنا ضحكت وكملت الامتحان. كانوا بيمروا بمواقف طريفة زي يوم ما قرروا يطلعوا رحلة فجأة ولاقوا نفسهم على البحر بيضحكوا وبيجروا حافيين وبيتصوروا.
بس الدنيا ما بتفضلش على حالها وبعد الكلية دخلوا على مرحلة جديدة الخطوبة والجواز. وكل واحدة فيهم واجهت مشاكل مختلفة بس كانوا دايمًا مع بعض.


دارين دخلت الخطوبة وهي حاسة إنها مش مستعدة خايفة من المسؤولية حاسة إنها مش قادرة تكون زوجة وأم وهي بالكاد مهتمة بنفسها. ميرنا كانت أكتر واحدة حاسة بيها وفضلت جمبها لحد ما طمنت قلبها.
عهد، اللي كانت دايمًا مشغولة بطموحها اكتشفت إن الحياة مش سهلة وإنها لازم تلاقي توازن بين شغلها وحياتها، وسهى كانت أكتر واحدة بتساعدها تفهم ده.


سهى دخلت في مشاكل مع أهل خطيبها اللي كانوا تقليديين بزيادة، وحست إنها بتضيع وسطهم بس دارين قالتلها: "ما تسمحيش لحد يغيرك حطي حدودك من الأول!" وقدرت سهى تلاقي طريقة تحافظ بيها على نفسها وحبها.
ميرنا، اللي مش بتعرف تعبر عن مشاعرها، كانت عندها مشكلة مع خطيبها إنه مش فاهم سكوتها، عهد نصحتها تكتبله رسالة لو مش قادرة تقول ولما عملت كده حست لأول مرة إنه فهمها بجد.


مرت الأيام، واتجوزوا كلهم وطبعًا الجواز كان مختلف عن اللي كانوا متخيلينه مسؤوليات ضغط، ومشاكل. دارين كانت بتحس أوقات إنها مش قادرة تتحمل الضغط بس دايمًا لاقيتهم معاها بيسندوها. عهد كانت بتحاول توازن بين حلمها والجواز وسهى كانت أكتر حد بيساعدها. وسهى نفسها كانت مصدومة من المسؤوليات الجديدة، بس دارين كانت جنبها تفكرها إن الحياة مش وردية بس الحب والصحوبية بيهونوا كل حاجة.
ميرنا كانت أكتر واحدة اتغيرت بعد الجواز خصوصًا مع الأمومة اللي حست إنها مش جاهزة ليها. عهد اللي سبقتها في التجربة وقفت جنبها وقالتلها: "هتخافي في الأول بس هتعرفي قد إيه ده يستاهل"


ورغم إن الجواز خلّى كل واحدة فيهم مشغولة بحياتها بس ولا الزمن ولا المسافات قدرت تفرقهم. حتى بعد ما بقوا أمهات قرروا إن أولادهم يكونوا صحاب، زيهم بالظبط. أزواجهم بقوا أصحاب وأطفالهم كبروا مع بعض، وعيلتهم كبرت بس حبهم لبعض فضل زي ما هو، يمكن أقوى كمان.
مكنتش صداقتهم متوقعة ومكنوش فاكرين إنهم هيبقوا بالشكل ده بس القدر جمعهم عشان يفضلوا مع بعض العمر كله.. مش مجرد أصحاب دول أخوات.. للأبد.


الكاتبة والمؤلفة/ دودي عبدالله